Wir^a) dis nachgeschriben Hans der Grauff von Balgach¹ der elter, Haini Brokker, Hans der jung Grauff, Vli Nusch, Hans vffer Hofstat, Vli Tierli, Hans Oler, L Haini Ovpp, Hans Muller, Kuni Schenk, Vli Ros, Hans Durrenmulli, Hans Rigel vnd Hans der Ros alle, alz wir dauor benempt sint, von Balgach, L tund kunt vnd veriehin offenlich mit disem brieff allen den, die in an sehent oder horent lesen, als wir ze Veltkirch² in der stat burgerrecht habin L enphangen vnd da burger worden sint, daz ist geschehen mit solichen gedingen vnd rechten, daz daz der erwirdigen vnser gnedigen frowen fro Claren abtissen vnser frowen gotzhus ze Lindow³ noch ir nachkomen noch dem selben gotzhus, des wir von dem libe recht aigen sien, an allen iren rechten gentzlich âne schaden sin sol. Vnd habint ouch alle vnd yeglicher besunder gelobt mit siner truwe vnd darnach gesworn liplich ze den hailigen mit gelerten worten vnd mit vffgebotnen vingern, das wir der vorgenanten vnser gnêdigen frowen der abtissen vnd ir nachkomen vnd dem obgenanten irem gotzhus tugentlich richten geben vnd volgen lazzen sullen alle die recht vnd rechtung, die si vnd ir nachkomen vnd ir gotzhus zu vns hant zu vnserm libe vnd zu vnserm gute vor tod vnd nach tode, alz daz von alter her komen ist, ez sien ir zinse erbschafft hoptrecht vall oder gelazz oder ander recht oder gewonhait, alz daz von alter her komen ist nichtz vssgenomen, vnd sol daz obgenant vnser burkrecht ir vnd iren nachkomen vnd irem gotzhus daran vnd an allen iren rechten gentzlich âne schaden sin vnd vns dauor nichtz schirmen in dehain wise. Vnd habin ouch in die selben aid genomen, daz wir dekainer ander burkrecht noch dehainen andern schirm an vns nit nemen sont weder in andren stetten noch hinder andren herren in dehain wise. Vnd wenne sich die nechsten zehen iar ergand vnd vss sint, wenne denn darnach die obgenant vnser frowe die abtissenn ald ir nachkomen vns manet in gemain oder sunder mit ir briefen ald mit iren amptluten, so sullen wir denn vnuerzogenlich daz obgenant burkrecht vffgeben vnd vns mit lib vnd mit gut hinder si vnd daz obgenant ir gotzhus ziehen vnd setzen bi den obgenanten aiden, alz wir dez ze den hailigen gesworn habin. Vnd dez alles ze offem vnd warem vrkund vnd stater vnwandelbarer sicherhait so habin wir alle vns dez verbunden vnder der ersamen lute insigel, won wir selb aigner insigel nit habint, dez ersten vnder dez erwirdigen herren herr Vlrichs von Wilbergs⁴ korherren der merren pfrund dez obgenanten vnser frowen gotzhus ze Lindow, darzu vnder Cunratz von Willers⁵, Hansen dez Wermaisters vnd Rudolffs dez Maigers, die alle iru insigel von vnser ernstlicher vnd vlizziger bett wegen offenlich an disen brieff gehenkt hant. Wir die selben alle vier Vlrich von Wilberg korherren der merren pfrund dez obgenanten vnser frowen gotzhus ze Lindow, Cunrat von Willer, Hans der Wermaister vnd Rudolff der Maiger veriehin, daz wir von ernstlicher bett wegen der obgeschribner aller vnsru aigenu insigel offenlich gehenkt habin an disen brieff, wan wir by allen vorgeschriben dingen gewesen sint, doch vns selb âne schaden. Der geben wart an sant Marien Magdalenen tag in dem jar, do man zalt von Cristus geburt druzehenhundert iar, darnach in dem funff vnd nuntzigosten jar.