Wir^a) die burgermaister rate vnd alle burger gemainlich rich vnd arm des hailgen Rumschen richs stette Vberlingen¹ Lindow² vnd sant Gallen bekennen offenlich mit disem brief L fur vns vnd vnser nachkomen, als sich die erbern vnd wisen vnser sundern guten frunde vnd lieben aidgenossen die burgermaister rate vnd alle burger gemainlich des L hailgen Rumschen richs stette Costentz, Rafenspurg³, Wangen⁴ vnd Buchorn⁵ zu den durchluchten hochgebornen fursten vnd herren vnsern lieben gnadigen herren hern Albrecht, L hern Wilhelm vnd hern Lutpolten hertzogen ze Ostenrich⁶ ze Stir ze Kernden ze Krain vnd grafen ze Tyrol vnd iren nachkomen vnd zu iren landen Turgow Ergowe Schwaben mit der herschaft ze Veldkilch⁷ vnd ze Curwalchen⁸ vnd mit iren stetten vestinen vnd schlossen, die in den selben iren landen gelegen sind, verainet hand oder wes sy sich gen in verschriben hand, alz das die briefe, die si ynn dar vmb gegeben hand, aigenlich wisent vnd sagent, das wir vns ietzo mit gemainem rate vnd wolbedachtem sinne von vnser vnd der vnsern besunders nutzes wegen zu den egenanten richs stetten in die vorgenanten verainung gen den egenanten vnsern gnadigen herren vnd gen iren landen vnd luten, alz vorgeschriben stat, getretten komen vnd gestanden sien, vnd geloben vnd versprechen ouch, die vnd was sich die vorgenanten stette verschriben hand, mit vnsern guten trwen vnd geschwornen aiden, die wir dar vmb liplich zu got vnd den hailgen getan habent, gen den egenanten vnsern herren von Ostenrich vnd gen den iren, alz vorgeschriben stat, mit den egenanten richs stetten getrweklich war vnd statte ze haltend ze laistend vnd ze vollefurent nach lut vnd sag der brief, die si dar vmb gegeben hand, ze gelicher wise vnd in allem dem rechten, alz ob wir mit namlichen worten bi des vorgenanten richs stetten in den selben briefen begriffen werint vnd verschriben stundint, ane alle geuerde. Mit vrkunde dis briefs versigelt mit vnser aller vorgenanter driger stette anhangiden insigeln. Der gegeben ist nach Crists geburt druzehen hundert jare, nuntzig jar vnd dar nach in dem funften jare, an sant Jacobs abent ze der ernde.