Wir^a) Leupolt von gotes gnaden hertzog ze Osterrich ze Styr ze Kernden vnd ze Krain graf ze Tyrol etc. tun kunt, alz wir vns vormalen zu den erbern L wisen vnsern sunderlieben den burgermaistern reten vnd allen burgern gemainlich des hailigen richs stetten mit namen Costentz, Rauenspurg, L Wangen vnd Buchorn fur den hochgebornen fursten vnsern lieben herren vnd vettern hertzog Albrechten vnsern lieben bruder hertzog Wilhalmen L vnd vnser nachkomen veraynet haben mit vnsern landen Turgow, Ergow, Swaben, mit vnser herrschaft ze Veltkilchen vnd ze Churwalhen vnd mit vnsern stetten vestinen vnd slozzen, die in denselben vnsern landen gelegen sind, vnd wes si vnd ouch wir vns gen in verschriben haben, alz das die brief, die darvmbe gegeben sind, wisend vnd sagend, daz wir durch bett willen der vorgenanten richs stett die erbern vnd wysen die purgermaister ret vnd alle burger gemainlich rich vnd arm der stett Vberlingen, Lindow vnd sant Gallen in die vorgenant veraynung emphangen vnd genomen haben, vnd versprechen in by vnsern furstlichen trewen eren vnd gnaden, die vorgenant veraynung vnd wes wir vns fur den egenanten vnsern herren vnd vettern hertzog Albrechten vnsern bruder vnd vns selb gen den egenanten richs stetten verschriben haben, fur denselben vnsern herren vnd vettern, vnsern bruder vnd vns gen den egenanten von Vberlingen, von Lindow vnd von sant Gallen vnd gen den iren getrewelich ze halten nach lut vnd sag der brief, die den egenanten richs stetten darumb gegeben sind, vnd ze gelicher wis, als ob sy in denselben briefen mit nemlichen worten begriffen weren vnd verschriben stunden, an all geuerd. Doch so nemen wir gen denselben richs stetten in diser veraynung vzz den erwirdigen vnsern lieben frund hern Chunraten byschof ze Basel¹, die stat ze Basel, den erwirdigen apt Chunen zu sant Gallen², den edeln vnsern lieben ohem graf Fridrichen von Toggenburg³ vnd ouch des richs stett in Swaben, alz sich die sidmals zu vns verbunden hand, nach dem vnd sich die vorgenanten von Costentz, von Rauenspurg, von Wangen vnd von Buchorn zu vns verpunden hetten. Mit vrkund ditz briefs. Geben ze Baden⁴ in Ergow an mitwochen nach sant Jacobs tag nach Cristz gepurde drewtzehen hundert jar, darnach in dem fumff vnd newntzigisten jar.