Ich^a) Hainrice ab Husen¹ Hermans salgen ab Husen êlicher sun burger ze sant Gallen tun kunt vnd vergich offenlich mit disem brief allen, die inansehent lesent oder horent lesen, L als mich die fromen wisen der burgermaister vnd der rat ze sant Gallen gehaimot in iro vanknust vnd banden hatten, vmb daz ich wider den burgermaister vnd wider den rat L da selbs gefrauelt vnd getan hatt, besunder daran das ich Cunraden von Wichtraht² den schuler Johansen von Wichtraht des schribers burgers ze Bern in Vchtland³ êlichen L sun wider ir gebott beschalkot vnd gewundet vnd och ir gebott da mit uber sehen han, won aber su mich begnadet hant vnd mich durch min durch miner frunde vnd durch ander erber lut ernstlicher bett ledig vnd vss der vanknust gelassen hant, darumb so han ich willeklich vnbetwungenlich vngebunden vnd vngeuangen mit guter vorbetrahtung offenlich gesworn ainen gelerten aid liplich ze got vnd ze den hailigen mit vf gehabenen vingern, vmb die vorgedahten vanknust vnd getat der vorgedahten des burgermaisters des rates vnd aller burger vnd burgerinen gemainlich der stat ze sant Gallen vnd iro iekliches besunder vnd mit namen aller dero, wer die sint, die an der selben miner vanknust schuld gehebt hant haimlich oder offenlich mit raten ald mit getaten ald in dehain wis, luter gut frund ze sinne vnd alle min frund inen darumb ze frund ze gewinnen ân furzug vnd die selben vanknust vnd getat niemer ze andenn noch ze aferrenn weder mit gaistlichem noch mit weltlichem geriht noch ân reht weder mit worten noch mit werken noch in kain wis noch ieman andre an miner stat noch von minen wegen ân arge list vnd ân alle geuarde. Ich han och in den vorgedahten aide genomen vnd gesworn, beschach das ich dehainer lay zuspruch stoss sachen oder ansprachen vff disen huttigen tag hett oder nv hinnenhin iemer gewunni zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz da burger ald si werdent noch da selbs burger, wenne vnd alz dik daz beschach vnd wolt ich danne ie darumb rehtes nut enbern, das ich danne ie darumb rehtes phlegen vnd reht von in nemen sol vnd wil ze sant Gallen in der statt vor irem geriht vnd niendert anderswa won nach der selben statt reht vnd gewonhait, ez war dann, daz ich da selbs rehtlos gelassen wurd vnd das och daz kuntlich da wurdi, so ist mir behalten vnd in dem aid vss gelassen, das ich daz reht ie danne, von dem ich rehtlos gelassen bin, ander swa suchen sol vnd mag, da ez danne billich vnd muglich ist, ân geuarde. Beschach aber, das got niht welle, daz ich den vorgedahten aide iemer vber fur ald ieman von minen wegen an dehainen vorgeschribenn stuken in dehain wis, so sol ich den selben burgern vnd gemainer stat ze sant Gallen vier hundert phunt guter vnd genamer haller, die dann ze sant Gallen in der statt geng vnd gab sint, gantzlich verfallen sin ze gebenn ân allen furzug vnd widerrede, vnd han in vmb daz selbs gut zu mir ze merer sicherhait ze rehten angulten geben vnd gesetzt herr Vlrich Straiffen den priester, Johansen Straiffen sinen bruder min ohain, Johansen Rochlin minen swager, Kaspar Volin hofamman ze sant Gallen⁴, Cunrat Jochler ab der Hub⁵, Walther Schurphen den phister, Hainrich Rutzenwiller, Vlrichen in der Ow, Cunrat Musler, Herman Zilin, Hugen Zilin alle burger ze sant Gallen, die hant alle vnuerschaidenlich gelobt ieklicher besunder mit siner truwe, ob das wari, daz ich in des selben gutes verfieli, alz vor ist beschaiden, daz si dann alle vnuerschaidenlich den selben dem burgermaister dem rat vnd gemainer stat ze sant Gallen die selben vier hundert phunt alle guter vnd gaber haller gantzlich geben weren vnd rihten sont vnd inen och gebunden sin sont, daz selb gut gantzlich ze gebenn vnd vszerihtenn ân allen furzug vnd widerrede, vnd war daz ich ald die obgenanten angulten inen das selb gut danne niht rihtint vnd gabint vnuerzogenlich, so hant die selben der burgermaister der rat vnd die burger gemainlich ze sant Gallen vnd iro helffer, wer die sint, friies vrlob vnd vollen gewalt, daz su mich vnd och die obgenanten angulten darumb phenden noten heften vnd an griffen sont vnd mugent an luten vnd an gutern in stetten in dorffern vnd vff dem lande mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent vnd wellent ald in fugklich ist, vber alle frihait puntnust lantfrid gnad vnd gewonhait, alz vil vnd alz dik, vntz daz si der selben vier hundert phunt guter haller vnd och des schaden, in den si vnd iro helffer von des selben phendens notens heftens vnd an griffens wegen koment, gantzlich gewert vnd vsgeriht werdent, war aber daz mich die selben angulten den obgenanten dem burgermaister vnd dem rat ze sant Gallen nach der ersten vordrung inrent dem nahsten manot wider antwurtint in die selben stat ze sant Gallen in der selben burger band vnd vanknust, da su min sicher sien ze gelicher wis vnd in aller der mâsse, alz ich ietz vff disen huttigen tag in iro banden gewalt vnd vanknust gewesen bin, so soltint danne dannenhin die vorgenanten angulten vmb die vorgeschribenn vier hundert phunt haller vnd vmb die gelubt, so su getan hant, gar vnd gantzlich ledig vnd los sin, vnd sol mich noch die obgenanten angulten noch min noch der selben angulten lut nach gut hie vor noch hie wider niht schirmen noch gut sin weder babstlichs kunglich noch kayserlichs geriht gewalt gesetzt gnâd wihi noch frihait kain lantfrid kain buntnust kain geselleschaft noch gewonhait kain acht noch banne kain fund noch gesetzt, so ietz ist oder her nach funden gesetzt oder erdaht wurd, von babsten kaysern kungen herren oder stetten noch enkainer lay ander sach noch furzug. Ich han och in den vorgeschribenn aide genomen vnd gesworn, die obgenanten angulten alle gantzlich ze losenn vnd vnschadhaft ze machenn von allem dem schaden, in den su koment von diser gult vnd gelubt wegen, vnd han in och erlobt, min vnd miner erben gut, ob ich enbin, darumb an ze griffenn vnd ze phendenn in aller der wise alz den obgenanten burgern vnd der stat ze sant Gallen, alz vor ist beschaidenn, vntz in iro schad gantzlich ab gelait vnd vsgeriht wirt. Vnd des alles ze offem warem vrkunde so han ich Hainrice ab Husen da vorgenant erbetten den ersamen Nycolausen Rupreht och burger ze sant Gallen, daz er sin insigel fur mich vnd min erben offenlich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Nycolaus Rupreht offenlich vergich an disem brief mir vnd minen erben vnschadlich. Wir die obgenanten angulten herr Vlrich vnd Johans die Straiffen gebruder, Johans Rochli, Kaspar Voli, Cunrat Jochler, Walther Schurpf, Hainrich Rutzenwiller, Vlrich in der Ow, Cunrat Musler, Herman Zili vnd Hug Zili veriehent ainer gantzen warhait aller der dinge, so von vns an disem brief da vorgeschriben stant, vnd ze merer sicherhait der selben dinge so haben wir die obgenanten her Vlrich vnd Johans die Straiffen, Johans Rochli, Kaspar Voli, Cunrat Jochler, Walther Schurpf, Hainrich Rutzenwiller, Vlrich in der Ow, Cunrat Musler vnd Herman Zili vnseru aigenu insigel offenlich gehenkt an disen brief, vnd won ich der obgenant Hug Zili aigens insigels niht han, so han ich erbetten den beschaidenn Rudolf Lirer den brotkoffler och burger ze sant Gallen, daz er sin insigel fur mich gehenkt hat an disen brief, vnder des selben insigel ich mich willeklich gebunden han, des och ich obgenanter Rudolf Lirer offenlich vergich an disem brief mir vnd minen erben vnschadlich. Diz beschach vnd ward dirre brief geben ze sant Gallen an der nahsten mitwuchen nach sant Jacobs tag des hailigen zwelfbotten in dem howat des jares, do man von Cristus geburt zalt druzehenhundert jar, nunzig jar vnd darnach in dem funften jâre.