Wir^a) Burkart von gottes gnaden byschoff¹ ze Costentz tund kunt vnd veriehent dez offenlich an disem L brieff allen, die in an sehent oder horent lesen, das fur vns komen sint die edeln vesten vnser lieben ochan L hern Eberhart vnd her Albrecht von Burglon² gebruder ritter vnd offnottent vor vns von der guter wegen, die hie L nach verschriben stand, die si von vns vnd vnserm gotzhus ze lehen^b) hand. Daz ist dez ersten der kelnhoff ze Lainbach³ vnd die vogtty lut vnd guter da selbs mit aller zugehort, die schuppus ze Muren⁴ gelegen, die ze disen ziten Hans Fritzschy buwet, die fry vogty ze obern Gottikain⁵, die fry vogty ze Buchakker⁶, der hoff ze Obern Golda⁷ gelegen, den man nampt Spatzen hoff⁸, der hoff ze Nuwenswendi⁸ gelegen ob der Egg⁹, die selben vogtien hoff vnd guter mit lut vnd mit gut vnd mit aller zugehord vnd den wyer gelegen zwuschen Sulgen¹⁰ vnd Hoff¹¹ in dem Thurgo, als die selben von Burglon das allez besezzen vnd genossen hand vnd si von vns vnd vnserm gotzhus ze lehen hand, also vnd mit den selben rechten woltent si die selben guter vnd vogtyen mit aller zugehord fugen vnd machen in rechtez gemachtez wis iren lieben ochemmen hern Johansen vnd Casper von Clingenberg¹² gebruder, also vnd mit dem gedingt, war daz gott vber sy gebutt, das si baid von todes wegen abgiengint an elich liberben, daz danne die vorgenanten vogtyen vnd guter mit aller zugehort vallen solten an die obgenanten von Clingenberg gebruder an sy baid oder ainen besunder, der dannocht in lip war. Vnd an den selben stunden gabent die vorgenanten von Burglon die obgenanten vogtyen vnd guter mit aller zugehord vff an vnser hand vnd batten vns domutklich, das wir das allez von inen vff nament an vnser hand vnd es allez wider vmb lichen woltent inen vieren. Der bett habent wir sy gewert vnd habent die obgenanten guter vnd vogtyen von inen vff genomen an vnser hand vnd habent daz allez mit aller zugehort inen allen vieren wider vmb gelichen vnd lichent mit disem brieff den obgenanten von Burglon baiden vnd den von Clingenberg baiden ze rechtem lehen vnd iren erben, die knaben sint, in gemachtes wis, also vnd mit dem gedingt, ob die selben von Burglon baid abgiengint an elich liberben, so sond die obgenanten guter vnd och vogtyen mit aller zugehort vallen an die obgenanten von Clingenberg gebruder vnd an ir erben, die knaben sint, vnd von vns ze lehen haben. Aber die selben von Burglon mugent daz gemacht by ir leben wider ruffen vnd ab sagen, wenne si wend, vnd habent och dis lehenschafft also gen inen allen getan vnd vollefurt mit allen den worten werchen ratten vnd getaten vnd mit aller krafft, so dar zu gehort vnd notturfftig waz nach gewonhait vnd recht. Vnd dez allez ze warem vnd offem vrkunt aller dirr ding gebent wir vorgenanter bischoff Burkart von Costentz vnser insigel an disen brieff doch vns an vnser lehenschaft vnschadlich. Dirr brieff ist ze Costentz geben, do man von Cristez geburt zalt druzehenhundert jar, dar nach in dem funf vnd nuntzigosten jar, an dem nachsten fritag nach sant Jacobs tag dez zwelffbotten.