Wir^a) Cun von gottes gnaden abt des gotzhus ze sant Gallen¹, daz an alles mittel zu gehort dem L stul ze Rom, veriehent offenlich mit disem brief allen den, die in ansehent lesent oder horrent lesen, L das vns der halb hof ze Mos², den man nempt Rotellis hof, an der Murg³ gelegen, der reht aigen ist vnd L ainhalb stosset an die muli in der Ow⁴ gelegen vnd stosset andrent an der Bongarter hof, da fur ist ze koffenn geben, das ainem lupriester ze Wil⁵ in vnsers vorgenempten gotzhus statt ab dem von dem vnd vsser dem selben halben hof ze Mos genampt Rotellis hof jarlich zwen mutt kernen gutes vnd vngeuarliches Wiler messes vsgandes vnd ewiges geltes vor vs vor ab vnd vor aller mangklichen, die im durch Johans Lassers saligen burgers ze Wil vnd^b) siner elichen husfrowen saligen sêl hail willen geben sind, den selben kernen er och zertaillen sol, alz in dem jarzitbuch ze Wil verschriben stat. Vnd was denn mê zinses vber die vorgenempten zwen mutt kernen von dem selben halben hof jarlichen gat vnd geuallent, die selben vbrigen zins sollent vns vnd vnserm vorgenanten gotzhus geuallen vnd werden, vnd sollent wir noch vnser nahkomen noch anders nieman an vnser statt noch von vnsern wegen an die vorgenanten zwen mutt kernen furbass nit grîffen noch ainen lupriester ze Wil daran sûmen noch ierren in dehainen weg weder mit reht noch an reht luterlich an geuard. Vnd des hiervber ze offnem vnd warem vrkund alles des, so an disem brief verschriben stat, haben wir abt Cun da vorgenant vnser abtye insigel offenlich gehenkt an disen brief. Der geben ist in vnserm gotzhus ze sant Gallen an sant Bartholomeus tag des zwelfbotten in dem jar, do man zalt von Cristi geburt dusend druhundert nuntzig vnd funf jar.