Ich^a) Burkart der Nagel, den man nempt Schellen, vergich offenlich fur mich vnd fur Margreten Vnraininen min elich L wib vnd fur alle vnser erben vnd nachkomen mit disem brieff vnd tun kunt allen den, die in an sehent oder horent lesen, L wan daz ist, das mir vnd der egenanten Margreten der Vnraininen minem elichen wib die ersamen vnd wisen dez L hailigen Romischen richs stette Costentz, Vberlingen, Rauenspurg, Lyndow, sant Gallen, Wangen vnd Buchorn, die den bund mit ainander haltend vmb den Bodemsêw, als von der clag vnd zuspruch wegen, die si vnd die iren von in selb vnd von dez gemainen lands wegen zu vns gehebt hand, vnser burg vnd vestin die alten Schonstain ab gewunnen geschlaipft vnd gebrochen hand, bekennen wir vns mit disem brieff, das wir darumbe vnd vmb allez daz, daz sich dar inne oder davon erhaben erloffen vsgangen vnd gewachssen ist, vnd sunderlich vmb all ander zuspruch vordrung stozz vnd misshellung, die wir zu in allen gemainlichen zu ainer stat oder merr ald zu den iren besunder bisher vnd vntz vf disen huttigen tag, als dirr brieff geben ist, ye gehept haben gehaben solten oder mochten, wie die alle genant oder gehaissen gewesen sint nutzit vsgenomen, mit guter vorbetrachtung sinnes vnd mutes vnd ouch nach rate vnser guten frunde vnd lieben herren mit den selben vorgenanten dez hailigen Romischen richs stetten allen gemainlich vnd ir yeglicher besunder vnd mit allen iren helffern vnd den iren fruntlich tugentlich vnd gutlich vnd ouch gar vnd gentzlich verricht vnd gesunt sigen luterlich vnd aller ding, also daz ich obgenanter Burkart der Nagel ietzo frilich willeklich vnd vnbetwungenlich gesworn han ainen liplichen aide zu got vnd den hailigen mit gelerten worten vnd mit vfgebotnen vingern, das weder ich noch die obgenant Margret min elich wib noch niemant von vnsern vnd vnsers haissentz wegen von der sach vnd getat wegen wider die obgenanten siben stette noch die iren nimmer mer sin noch wider si tun wellin weder mit worten noch mit werken mit raten noch mit getaten haimlich noch offenlich in kain wise, darzu versprechen wir in vnd den iren bi dem obgenanten aide, daz wir iro aller gemainlich vnd ieglicher stat besunder vnd manglichs von ir wegen von der sach vnd getat wegen vnd vorgeschriben stat vnd ouch vmb allez daz, daz sich zwischen vns vnd in bis vf disen hutigen tag ergangen hat, alz vorgeschriben ist, luterlich gut frunde haissen vnd sin wellen vnd sullen in darumb frund ze frunden gewinnen, als gewonlich ist, ane alle geuerde, vnd och also, daz weder ich noch die obgenant min elich husfrôw noch vnser erben vnd nachkomen noch niemant von vnsern wegen die vorgenanten siben stette noch die iren gemainlich noch besunder noch niemant von iren wegen bi dem obgenanten aide darumb niemmermer geuehen gehassen bekumbern beklagen sullen noch wellen noch darumb dehainer lay vordrung ansprach noch recht mit dehainen gerichten weder gaistlichen noch weltlichen noch âne gericht noch mit dehains herren noch niemands andre hilff noch rate vnd gemainlich mit dehainen andren sachen furzogen noch funden, wie man die ietzo oder hienach mit sinnen mit worten oder mit werken jmmer furgeziehen oder mit begriffen mocht mit recht oder ane recht zu in nimmer mer haben noch gewinnen sullen mugen noch wellen in kainen wege. Vnd dez ze offem vnd warem vrkund so gib ich obgenanter Burkart der Nagel genant Schell fur mich vnd fur alle min erben vnd nachkomen den obgenanten siben stettn vnd den iren vnd wer von iro wegen darzu gehafft ist, disen brieff daruber bestat vnd besigelt mit minem aigen insigel. Darzu han ich obgenante Margret Vnrainin sin elich husfrow min aigen insigel fur mich vnd fur alle min erben vnd nachkomen och offenlich gehenkt an disen brieff, allez daz war vnd stat ze halten vnd ze haben, so hieuor an disem brieff verschriben stat, âne alle geuarde vnd argenlist. Vnd darzu habin wir beidu vlizzig gebetten den edeln wolgebornen herren grauff Wilhalm von Montfort herre ze Pregentz, das der sin aigen insigel ze ainer gezugknuzz der vorgeschriben sach zu vnsren insigel offenlich gehenkt hat an disen brieff doch im selb âne schaden. Geben an fritag nach sant Michels tag, do man zalt nach Cristi geburt druzehenhundert jar vnd darnach in dem funff vnd nuntzigosten jar.