K Reverendo K in Christo patri ac domino domino Burkardo dei et apostolice sedis gratia episcopo Constantiensi¹ eiusque vicario in spiritualibus^a) generali ac illi vel illis, ad quem seu ad quos collatio provisio presentatio electio L seu quevis alia dispositio parrochialis ecclesie in Helfenschwile² Constantiensis diocesis communiter vel divisim pertinet, omnibusque aliis et singulis, quorum interest vel intererit et quos infrascriptum tangit negotium L seu tangere poterit quomodolibet in futurum, et presertim Johanni im Gaessli presbytero predicte ecclesie occupatori ac Lutino Schenk³ laico eiusdem diocesis Franciscus eadem gratia episcopus Segobiensis⁴ L executor ad infrascripta una cum infrascriptis nostris in hac parte collegis a sede apostolica specialiter deputatus salutem in domino et mandatis nostris ymo verius apostolicis firmiter obedire. Litteras sanctissimi in Christo patris et domini nostri domini Bonifatii divina providentia pape noni vera bulla plumbea cum cordula canapis ipsius domini nostri pape more Romane curie bullatas sanas integras et illesas non viciatas non cancellatas nec in aliqua parte suspectas sed omni prorsus vicio et suspicione carentes per discretum virum dominum Jodocum Winuelder de Episcopalicella⁵ presbyterum Constantiensis diocesis coram notario publico et testibus subscriptis presentatas nobis, nos cum ea, qua decuit, reverentia noveritis recepisse tenorem qui sequitur continentem: Es folgt der Text von Nr.6657. Post quarum quidem litterarum apostolicarum presentationem et receptionem nobis et per nos sic ut premittur factas fuimus per discretum virum dominum Jodocum Winuelder principalem^b) predictum principaliter in dictis litteris apostolicis nominatum coram nobis personaliter constitutum cum instantia debita requisiti, quatenus ad executionem predictarum litterarum apostolicarum et contentorum in eisdem procedere curaremus iuxta ipsarum litterarum apostolicarum formam et tenorem. Nos igitur Franciscus episcopus et executor prefatus attendentes requisitionem huiusmodi fore iustam et consonam rationi volentesque predictum mandatum apostolicum nobis in hac parte directum reverenter exequi, ut tenemur, predictam parrochialem ecclesiam in Helfenschwile Constantiensis diocesis sic ut premittitur per mortem quondam Alberti Handelberg ultimi ipsius ecclesie rectoris sive alio quovismodo aut ex alterius cuiuscumque persona aut per assecutionem alterius beneficii ecclesiastici apostolica auctoritate collati seu per liberam resignationem alicuius per eum de illa in manibus ad id potestatem habentis apud sedem apostolicam sponte factam et per ipsum huiusmodi potestatem habentem apud sedem eandem admissam aut per constitutionem felicis recordationis domini Johannis pape vicesimisecundi, que incipit Execrabilis vacantem, etiam si predictus quondam Albertus iniquitatis filio Roberto olim basilice Duodecim Apostolorum presbytero cardinali nunc antipape⁶ adheserit, cum omnibus iuribus et pertinentiis suis eidem domino Jodoco Winuelder presenti et id petenti auctoritate apostolica, qua fungimur in hac parte, contulimus et assignavimus ac conferimus et assignamus per presentes ipsumque Jodocum in ipsius ecclesie parrochialis iuriumque et pertinentiarum predictorum pacificam et quietam possessionem per annuli nostri traditionem et sui digiti impositionem induximus et investivimus de eadem ac inducimus et investimus tenore presentium de eisdem. Quocirca vos reverendum patrem et dominum dominum Burkardum episcopum Constantiensem necnon Johannem im Gaessli presbyterum et Lutinum Schenk laicum omnesque alios et singulos supradictos et vestrum quemlibet insolidum eadem auctoritate primo secundo tertio et peremptorie requirimus et monemus vobisque nichilominus et vestrum cuilibet in virtute sancte obedientie et sub penis et censuris infrascriptis districte precipiendo mandantes, quatenus infra sex dierum spacium post presentationem et notificationem predictarum litterarum apostolicarum et presentis nostri processus computandum, quorum sex dierum duos pro primo duos pro secundo et reliquos duos dies pro tertio ac peremptorio termino et monitione canonica vobis universis et singulis supradictis assignamus, predictum dominum Jodocum Winuelder vel procuratorem eius nomine in et^c) ad ipsius parrochialis ecclesie in Helfenschwile per nos auctoritate predicta, ut prefertur, collate iuriumque et pertinentiarum eiusdem pacificam vacuam quietam et expeditam possessionem inducatis recipiatis et admittatis ac induci recipi et admitti, quantum in vobis est et ad vos et vestrum quemlibet pertinet, faciatis mandetis et percuretis amonentes abinde prefatos Johannem im Gaessli eiusdem ecclesie illicitum detentorem ac Lutinum Schenk et quoslibet alios indebitos occupatores, quos nos sic amonemus et denuntiamus amoni per presentes sibique vel dicto procuratori suo eius nomine de ipsius ecclesie fructibus redditibus proventibus iuribus et obventionibus universis sine omni dilatione difficultate contradictionem vel oppositionem respondeat et ab aliis, quantum in vobis constiterit, cum integritate respondere. Monemus insuper vos omnes et singulos supradictos et quoscumque alios modo et forma premissis vobisque ac eis et ipsorum cuilibet districtius inhibentes et interdicentes, ne vos vel ipsi aut aliquis vestrum vel eorum predictam parrochialem ecclesiam alicui alteri quam dicto domino Jodoco conferre aut ad eam quamvis^d) alium quam ipsum dominum Jodocum vel procuratorem suum pro eo eligere presentare recipere vel admittere vel quidquam de ipsa ecclesia vel aliquo iure ad ipsam pertinens in preiudicium dicti domini Jodoci aut iuris sui quoquomodo disponere facere vel ordinare presumatis vel presumant aut aliquis vestrum vel eorum presumat quominus dictam ecclesiam per nos, ut premittitur, sibi collatam cum^e) omnibus iuribus et pertinentiis suis pacifice assequi tenere et possidere ac fructus redditus et proventus iura et obventiones universos exinde percipere cum integritate et libere habere impedimentum aliquod prestetis seu prestent aut aliquis eorum vel vestrum prestet publice vel occulte directe vel indirecte vel alio quovis quesito colore neque impedientibus dictum dominum Jodocum vel procuratorem suum detis vel dent aut det auxilium consilium vel favorem. Monemus etiam modo et forma premissis omnes et singulos predicte ecclesie parrochianos utriusque sexus homines necnon censuarios undecimarios agricultores vineecultores reddituarios et aliorum bonorum mobilium et immobilium ipsius ecclesie occupatores et possessores, quatenus infra predictum sex dierum terminum, quorum sex dierum duos pro primo duos pro secundo et reliquos duos dies pro tertio et peremptorio termino ac monitione canonica assignamus, dicto domino Jodoco tamquam vero^f) et legitimo rectori ipsius ecclesie et pastori in temporalibus et spiritualibus obediant et omnibus et singulis fructibus redditibus proventibus iuribus et obventionibus universis cum integritate respondeant. Quod si forte vos domini omnes et singuli supradicti et quicumque et presertim vos Johannes im Gaessli et Lutinus Schenk ac parrochiani supradicte ecclesie aut quicumque vestrum premissa omnia et singula non adimpleverit ac mandatis et monitionibus nostris ymmo verius apostolicis non parueritis seu paruerint cum effectu aut aliquid in contrarium feceritis vel fecerint, nos in vos omnes et singulos supradictos ac quoscumque alios qui fuerint vel fuerit contradictores culpabiles in premissis vel aliquo premissorum necnon in dantes alteri^d) et recipientes ipsam ecclesiam vel aliquod ius ad eam pertinens aut de ipsa ecclesia contra predicta mandata et monitiones nostras ymmo verius apostolica in preiudicium prefati domini Jodoci aut iuris sui quomodolibet disponentes vel ordinantes aut ipsum impedientes vel in impedientibus dantes auxilium consilium vel favorem, cuiuscumque dignitatis status gradus conditionis vel preeminentie fuerint, nisi infra predictum sex dierum terminum a die scientie computandis a rebellione contradictione impedimento consilio auxilio vel favore destiteritis seu destiterint et mandatis nostris huiusmodi ymmo verius apostolicis in hac parte parueritis seu paruerint, exnunc prout extunc singulariter in singulos dicta canonica monitione premissa sex dierum excommunicationis ac in ipsam ecclesiam parrochialem in Helfenswile interdicti sententias ferimus in hiis scriptis et etiam promulgamus, vobis vero domino episcopo Constantiensi, cui ob reverentiam vestre pontificalis dignitatis in hac parte deferre volumus, si contra premissa aut aliquo premissorum diceritis vel feceritis per vos vel submissam personam predicta canonica sex dierum monitione premissa, ingressum ecclesie interdicimus in hiis scriptis, et si huiusmodi interdicti sententiam per alios sex dies prefatos sex inmediate sequentes sustinueritis, vos dicta sex dierum canonica monitione premissa suspendimus a divinis, verum prefatas interdicti et suspensionis sententias per alios sex dies prefatos duodecim dies inmediate sequentes animo, quod absit, sustinueritis indurato, nos dicta canonica sex dierum premissa vos exnunc prout extunc et extunc prout exnunc excommunicationis sententiis innodamus in hiis scriptis, contra vos et quoslibet alios artius processuri, prout facti qualitas exigerit et ordo dictaverit rationis. Ceterum cum ad executionem predicti mandati apostolici ulterius per nos faciendum aliis arduis in Romana curia prepediti negotiis amplius personaliter interesse non possumus, universis et singulis dominis abbatibus prioribus prepositis decanis archidiaconis thesaurariis scolasticis cantoribus tam cathedralium quam collegiatarum canonicis parrochialiumque ecclesiarum rectoribus plebanis viceplebanis vicariis perpetuis curatis et non curatis altaristis capellanis notariis et tabellionibus publicis clericisque quibuscumque per civitatem et diocesim Constantiensem ac alias ubilibet constitutis et presertim decano et camerario decanatus ruralis in Wil⁷ predicte diocesis et eorum cuilibet insolidum super ulteriori executioni^d) predicti mandati apostolici totaliter comittimus vices nostras per presentes, donec eas ad nos duxerimus specialiter revocandas, ipsosque et ipsorum quemlibet primo secundo tertio et peremptorie requirimus et monemus eisque et eorum cuilibet in virtute sancte obedientie et sub excommunicationis pena, quam in ipsos et ipsorum quemlibet exnunc prout extunc ferimus in hiis scriptis, nisi ipse et quilibet ipsorum fecerit et adimpleverint cum effectu ea, que eis in hac parte committimus et mandamus, districte precipiendo mandantes, quatenus infra tres dies, postquam pro parte dicti domini Jodoci fuerint requisiti seu alter ipsorum^g) fuerit requisitus, in hiis exequendis alter alterum non expectat nec unus pro alio se excuset, vos dominum episcopum Constantiensem ac omnes et singulos supradictos necnon dictam ecclesiam parrochialem aliasque personas et loca, ubi, quando et quotiens expediens fuerit, personaliter accedant seu accedat et predictas litteras apostolicas et hunc nostrum processum legant intimant et publicari procurant ac legi intimari et insinuari faciant et disponant, dictumque dominum Jodocum vel procuratorem suum eius nomine in ipsius ecclesie parrochialis iuriumque et pertinentiarum eiusdem pacificam et expeditam possessionem recipiant inducant et admittant ac induci recipi et admitti, quantum in eis est et ad eos et ipsorum quemlibet spectat, faciant et procurant, dictumque Johannem im Gaessli et Lutinum Schenk omnesque alios et singulos ipsius ecclesie iuriumque et pertinentiarum predictorum amoveant, quem nos, ut premittitur, sic amonemus et denuntiamus amonitum per presentes, sibique vel dicto procuratori de ipsius ecclesie fructibus redditibus proventibus iuribus et obventionibus universis respondeant et a censuariis undecimariis reddituariis agricultoribus vineecultoribus et aliorum bonorum ipsius ecclesie possessoribus cum integritate pro eorum possibilitate responderi faciant et procurent, et generaliter omnia et singula alia faciant ordinant et exequantur, que circa premissa neccessaria fuerint et oportuna et que nos facere possemus, si personaliter interessemus, iuxta traditam seu directam a sede apostolica nobis formam, ita tamen, quod dicti subdelegati nostri vel aliquis eorum nichil in preiudicium dicti domini Jodoci attemptare valeant vel circa nostras sententias et censuras per nos ut premittitur latas absolvendo vel suspendendo possint inmutare. Et si contigat super premissis vel aliquo premissorum ulterius procedere, de quo nobis omnimodam reservamus potestatem, nolumus nec intendimus commissionem seu subdelegationem nostram huiusmodi in aliquo revocare, nisi de revocatione huiusmodi plenam et expressam in nostris litteris fecerimus mentionem. Per processum autem nostrum huiusmodi nolumus nec intendimus nostris in hac parte preiudicare collegis, quominus ipsi vel eorum alter in huiusmodi negotio servato tamen hoc nostro processu ulterius procedere, prout ei vel eorum alteri visum fuerit expedire. Prefatas quoque litteras et hunc nostrum processum volumus penes predictum dominum Jodocum vel procuratorem suum remanere et non per vos vel aliquem vestrum seu quemvis alium contra voluntatem Jodoci et procuratoris predictorum retineri, contrarium vero facientes excommunicationis sententia per nos ut premittitur latas^d) subiacere volumus ipso facto, absolutionem vero omnium et singulorum, qui prefatas nostras sententias seu earum aliquam incurrerint seu incurrerit, nobis vel superiori nostro tantummodo reservamus. In quorum omnium et singulorum premissorum presentes nostras litteras seu presens publicum instrumentum hunc nostrum processum in se continentes sive continens per Theodericum notarium publicum subscriptum subscribi et publicari mandavimus nostrique sigilli iussimus appensione communiri. Datum et actum Rome apud sanctum Laurentium in Damaso⁸ in domo habitationis nostre ibidem situata sub anno a nativitate domini millesimo trecentesimo nonagesimo quinto, indictione tertia, pontificatus sanctissimi in Christo patris et domini nostri domini Bonifatii divina providentia pape noni predicti anno sexto, die vero sabbati nona mensis octobr. hora nonarum vel quasi, presentibus ibidem discretis viris dominis Henrico Villici de Dornhem⁹ presbytero et Nycolao Giering de Rotwil¹⁰ clerico coniugato Constantiensis diocesis testibus ad premissa vocatis specialiter et rogatis. (ST) Et ego Theodericus Spetzhardi clericus Constantiensis diocesis publicus apostolica auctoritate notarius, quia premissis litterarum apostolicarum presentationi requisitioni provisioni inhibitioni mandatorum et sententiarum promulgationi subdelegationi omnibusque aliis et singulis, dum sic ut premittitur fierent et agerentur, unâ cum prenominatis testibus presens interfui eaque sic fieri vidi et audivi, ideoque hoc presens publicum instrumentum de mandato prefati domini Francisci episcopi et executoris manu propria scriptum exinde confeci et in hanc publicam formam redegi signoque et nomine meis solitis et conswetis unâ cum impendenti sigillo ipsius domini Francisci episcopi subscripsi et signavi rogatus et requisitus in fidem et testimonium omnium et singulorum premissorum. De rasura in dictionibus vicario in spiritualibus in prima linea non vicio sed errore facta constat michi Theoderico notario predicto, que hic manu propria approbo et confirmo.