Allen^a) den, die disen brief ansehent lesent oder horent lesen, kund ich Cunrat Wigerman von Willa¹ vnd vergich offenlich mit disem brief L fur mich vnd fur alle min erben, das mir die erbern wolbeschaidenn Vlrich Spiesser vnd Johans Appaceller maister vnd phleger L der armen veltsiechen ze sant Gallen an dem Linsibul² an der selben armen siechen stat vnd in iro namen reht vnd redlich verlihen L hant disu nachgenemten zwai guter, das gut ze Willa, das gelegen ist entzwuschent Tatenwill³ vnd dem Friien Dorff⁴, vnd och das gutly gelegen ze Gumaswille⁵, das man nempt das frii aigen vnd ainhalb stosset an Gumaswille vnd anderthalb an das vorgedaht gut ze Willa vnd stosset ze der dritten siten an das egenant Friie Dorff, mit allen rehten nutzzen vnd gewonhaiten vnd mit aller zugehorde ze ainem rehten staten erbzinslehen vmb ainen staten zins, also mit der beschaidenhait vnd in dem rehten, daz ich vnd min erben, ob ich enwar, frowen alz man tohtren als knaben die selben vorgeschribenn zwai guter, daz gut ze Willa vnd das gutli genant das friie aigen mit allen rehten vnd zugehorden in eran vnd vnwustklich haben niessen besetzen vnd entsetzen sont, vnd sullen ich vnd min erben den selben egenanten maistern vnd phlegern der armen siechen oder iren nachkomen, welhe ie da selbs maister vnd phleger sint, zu der selben armen siechen handen von den selben zwain gutern hinnenhin aller jarlich ie vff sant Gallen tag zehen schilling phenning guter Costentzer munse funf mutt vnd zwai viertail vesan sechs viertail haber alles gutes vnd vngefarliches kornes sant Galler messes vnd vier herbst hunr ze rehtem jarlichem zins vnd darzu von dem egenanten gut Willa gen Arbon⁶ ainen mutt habern des vorgeschribenn messes gantzlich vnd gar geben vnd rihten vnd och antwurten gen sant Gallen an das Linsibul ân furzug ân alle minrung vnd ân allen der selben maister vnd phleger der armen siechen vnd ir nachkomen schaden ân alle geuarde. Vnd welhes jares ich ald min erben daz niht tatint, so sont vnd mugent die selben phleger vnd maister der armen siechen vnd ir nachkomen, welhi ie dann da selbs maister vnd phleger sint, vnd iro helffer, wer die sint, mich vnd min erben ie nach sant Gallen tag, wenn su wend, darumb angriffen phenden noten vnd heften vff den selben gutern oder anderswa an allen vnsern gutern vff dem lande vnd in den stetten mit gaistlichen vnd mit weltlichen gerihten vnd ân geriht ân klag vnd ân zorn, wie vnd wa si das getun mugent, alz vil vnd alz dik, vntz si ie des vorgedahten iro zins vnd des mutt habern in der wise, alz vor ist beschaiden, vnd och dez schaden, in den si vnd ir helffer von des selben phendens notens heftens vnd an griffens wegen koment, gantzlich gewert vsgeriht vnd entschadgot werdent. Vnd mit namen ist berett, war daz ich ald min erben inen den vorgedahten zins vnd den mutt haber gen Arbon dehaines jâres versassint vnd verzugent alz lang, biz das ain zins den andern erloffen hetti, so sont danne die vorgenanten guter daz gut ze Willa vnd daz gutli, daz man nempt das friie aigen, den vorgedahten maistern vnd phlegern der armen siechen ald iren nachkomen, welhi ie dann da selbs maister vnd phleger sint, zu der armen siechen handen gantzlich zinsvellig vnd ledig vnd los sin, vnd sont vnd mugent och danne die selben phleger vnd maister der armen siechen vnd ir nachkomen die selben vorgedahten zwai guter mit allen rehten vnd zugehorden haben niessen verkoffen versetzen besetzen vnd entsetzen vnd da mit tun, waz si wend ald in fugklich ist, vnd sullen wir si daran niht sumen noch ieren in kain wise. Ez ist och bedingot, beschach daz ich oder min erben dehaines jares von vnseren rehten der vorgeschribenn guter vnd erblehens gan vnd die verkoffen woltint, daz wir danne die selben vnseru reht den vorgedahten phlegern ald iren nachkomen an der selben armen siechen statt des ersten vail bieten vnd vor manglichem ze koffen geben sollint funf schilling phenning Costentzer munse naher dann ieman andre, ob su sie koffen wend, war aber daz su sie dann niht koffen woltint ald mohtint, so mugent wir dannenhin die selben vnseru reht wol ze koffenn geben, wem wir wend, inen vnd allen iren nachkomen an allen iren rehten gantzlich vnschadlich. Beschach och, daz die obgenanten phleger oder ir nachkomen dehaines jâres von der obgenanten arman siechen rehten der vorgeschribenn guter vnd erblehens gan vnd die verkoffen woltint, so ist och bedingot, das si mir vnd minen erben, ob ich enbin, die selben iru reht des ersten vail bieten vnd vor manglichem ze koffenn geben sont och funf schilling phenning der vorgenanten munse naher dann ieman andre, ob wir si koffen wellent, war aber daz wir si danne niht koffen woltint ald mohtint, so mugent si dannenhin die selben iru reht och wol ze koffenn geben, wem si wend, mir vnd minen erben an allen vnseren rehten gantzlich vnschadlich. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so han ich der vorgenant Cunrat Wigerman erbetten die ersamen Nycolausen Rupreht stat amman ze sant Gallen⁷ vnd Vlrichen ab dem Berg den smit burger ze sant Gallen, daz su baid iru insigel fur mich vnd min erben gehenkt hant an disen brief, vnder der selben insigel ich mich willeklich gebunden han, won ich aigens insigels niht han, des och wir die obgenanten Nycolaus Rupreht vnd Vlrich ab dem Berg offenlich veriehen an disem brief vns vnd allen vnsren erben gantzlich vnschadlich. Dirre brief ist geben ze sant Gallen an dem nahsten zinstag vor sant Hylarien tag in dem jar, do man von Cristus geburt zalt druzehenhundert jar, nunzig jar vnd darnach in dem sechsten jâre.