Wir^a) graff Donat von Toggenburg herre ze Brettengow vnd ze Tafas veriehen offenlich L mit vrkund dis briefes allen den, die in ansehent oder horent lesen, als wir dem erwirdigen L vnd geistlichen in gott dem apt vnd dem couent gemeinlich des gotzhuses ze Ruti geben haben L die widem vnd den kilchensatz ze Elsow nach der brief lut vnd sag, die si von vns dar vmmb hand, die ewigen mess teglich ze volbringent vnd ze begand vff dem nuwen altar, der gewîcht ist in der er aller heiligen, den vnser lieber vatter graff Fridrich selig von Toggenburg in vnser capell ze Ruti gestift vnd gemachet hat, das si och tund sond nach der brieff lut vnd sag, die wir von inen^b) dar vmmb hand, das wir da die selben von Ruti von der vorgenanten ewigen mess wegen nut sond anreichen noch zusprechen, e das si die vorgenanten widem vnd zehenden an vahent ze niessent, doch sond die vorgenanten widem vnd kilchensatz ane alles mittel vnd ane alle sumung vnd irrung nach vnserm tod dem vorgenanten gotzhus ze Ruti angefallen sin nach ir brief lut vnd sag. Vnd des ze vrkund vnd merer sicherheit so haben wir der obgenant graff Donât von Toggenburg vnser eigen insigel offenlich gehenkt an disen brief. Der geben ist ze Liechtensteig an dem nechsten zistag nach vnser lieben frowen tag ze der liechtmess, do man zalt von Cristi geburt tuseng druhundert vnd nuntzig jar, dar nach in dem sechsten jare.