Allen^a) den, die disen brief ansehent lesent oder horent lesen, kund ich Eberhart Held Rippreht Helds salgen wilunt elicher sun vnd verLgich offenlich mit disem brief fur mich vnd all min erben, das ich mit beschaidenhait vnd mit guter vorbetrahtungen gesundes libez L vnd mutes von miner redlicher not wegen ain gutli gelegen ze Hohst¹, das man nemet des Helds Buhhel², stosset ainhalb an sant MarLgarethen³ akker vnd andrunt an die mur vnd ze der dritten siten an des archen grund, mit holtz mit veld mit akker mit wisen mit wunn mit waid mit stok mit stain mit steg mit weg mit grunt mit grat vnd mit aller zugehorde, vnd zwai hunr ewiges vnd jarliches geltz darvs vnd da von aines staten ewigen kôffes reht vnd redlich verkôffet vnd ze kôffent geben han dem wolbeschaiden kneht Haintzen Custor burger ze Rinegg⁴ vnd sinen erben, ob er enist, des zinserblehen es von mir gewesen ist, vmb ain phunt vnd drij schilling phenning Costentzer muns, dero ich von im gar vnd gantzlich gewert bin vnd enphangen hân vnd an minen offenn nutz bekert, das selbe gutli vnd hunrgelt min reht lehen gewesen ist von dem erwirdigen gotzhus ze sant Gallen, dannen ich im es gevertgot vnd zu sinen handen braht hân, alz reht sitt vnd gewonlich waz vnd alz es nach gewonhait vnd nach reht kraft vnd maht sol vnd mag hân ietz vnd hienach. Vnd darvmb so han ich mich verzigen vnd verzich mich mit disem brief fur mich vnd all min erben frilich wilklich reht vnd redlich aller aigenschaft aller lehenschaft aller kuntschaft aller gewer lut vnd brief alles rehten gaischlichs vnd weltlichs gerihtes aller der reht vordrung vnd ansprachen aller reht vnd rehtung, so ich oder min erben an dem zu dem vnd von des vorgeschribnen gutlis vnd hunr geltz wegen noch zu kainer ir zugehorden ie gehebt habint ald noch hinnenhin iemer mer haben oder gewinnen mohtint, also das ich noch min erben noch nieman von vnser wegen noch an vnser statt den vorbenemten Haintzen Custor noch sin erben darvmb niemer mer sollint noch wellent ansprechen vfftriben bekumberren bekrenken noch in dehain wise beswarren weder mit gaischlichem noch mit weltlichem geriht noch ân geriht noch mit enkainerlaii andren sachen luterlich ân all gefarde. Ich han ôch gelôpt vnd loben mit disem briefe fur mich vnd min erben, des vorgeschribnen gutlis vnd hunr geltz mit aller rehtung vnd zugehorde vnd des kôffes reht wer ze sinne nach landes reht vnd den obgenanten Haintzen Custor vnd sin erben vnd nachkomen, ob er enware, darvmb ze versprechent vnd ze verstande an allen stetten gen allermenglich ân allen iren schaden, wenn wa vnd wie dik si darvmb angesprochen vnd vffgetriben werdent mit dem rehten, ân all gefarde. Vnd des alles ze offem warem vrkund vnd gantzer sicherhait aller dirre vorgeschribnen dinge vnd gedinge so han ich Eberhart Held da vorgenant min insigel fur mich vnd all min erben offenlich an disen brief gehenket. Der geben ward ze sant Gallen an dem nechsten mentag vor phingsten ze mittem maijen in dem jare, do man zalt von Cristus geburt druzehenhundert jar vnd darnach in dem sechs vnd nuntzigosten jare.