Ich^a) Cunrat Haym von Ainwille¹ tun kûnt vnd vergich offenlich mit disem brieue fur mich vnd fur alle min êrben allen, die in sehent lesent oder L horent lesen, daz ich mit guter vorbetrachtunge vnd mit wolbedâchtem mute mit willen wissen vnd gûnst mines genadigen herren Cunratz L von Ainwille hern Cunratz saligen von Ainwille² ritters êlichen sûns, dez aigen ich bin von dem libe, von den wisen wolbeschaidenn Vlrichen Rudger, L Johansen Êggrichen vnd Johansen Iten von Oberndorf³ phleger vnd maister der siechen dez spittâls ze sant Gallen⁴ recht vnd rêdlich enphangen han mir vnd allen minen êrben frowen alz mannen tochtern alz knaben vnd enphâh von inen mit disem brieue den zehenden alklich, der dâ gât vsser dem gut, daz man nemmt Volkreswilla^b)5, vnd ainhalb stosset^c) an die zelge ze Mettendorf⁶, andert an Ainwille vnd ze der dritten syten an die zelg ze Geriswille⁷, der dez vorgeschribenn spittals gantzlich ist vnd im zugehort, ze ainem staten rechten rêdlichen êrbzinslêhen vmb ainen staten zins, mit dem gedinge vnd in den rechten, daz ich vnd min êrben den selben vorgeschribenn zehenden gantzlich von dem egeschribenn spîttal haben vnd niessen sont, vnd sullent dem vorgeschribenn spittal vnd sinen phlegern, wer die sint ald noch werdent, dâ von eweklich vnd aller jarlich ie ze sant Martins tag vierdhalb malter baider korn gutes vnd vngefârlichs kornes sant Galler messes zu dez selben spittals gewalt nûtze vnd handen ze rechtem jarliche(n) state(n) vnd êwige(n) zins ân furzug ân allen abgang ân alle minrung vnd ân alle widerrêde geben richten vnd antwurten ze sant Gallen in der statt ân allen iro schaden ân gefarde. Welhes^d) ich oder min êrben daz nut tatint, so hant dez vorgeschribenn spittals phleger vnd botten vnd iro helffer, wer die sint, gut recht vnd gantzen vollen gewalt, ie nâch dem vorgeschribenn zil, wenn su wollent, mich vnd min êrben ze phenndenn vnd anzegriffen an allen vnsern gutern vnd an allen stetten mit gericht vnd ân recht ân klag vnd ân zorn uber alle fryhait vnd gewonhait uber alles burgerrecht uber allu recht vnd gesêtzt der herren der stetten vnd der landluten gaistlichs vnd weltlichs gerichtes alz vil alz dik vnd alz lang, vntz daz der vorgenant spittal vnd sin phleger der vorgeschribenn vierdhalben malter baider korn vnd alles dez schaden, der dâr vf geloffen war, wie ald von waz sachen sich daz gefuget hett, ân allen abgang gantzlich vnd gar gewert vnd vsgericht werdent, vnd sullent mich vnd min êrben bi dem selben zins êwiklich lâssen beliben, daz der selb zins niemer dehaines jâres vf noch ab gân sol noch vfgestaigt noch niht abgelâssen werden sol, ân alle gefarde. Dez vorgeschribenn spittals phleger hant mir och die besûndern genâde getân, beschahe, daz dehaines jâres landgebrest wurde ald kam, daz dez selben spittâls phleger an andern zehenden, die dâ vmb gelegen sint vnd dem selben spittal zu gehorent, iht libint vnd abliessint von dez landgebresten wegen, also vnd in samlicher mâsse sullent su och mir vnd minen êrben dez selben jâres liben vnd ablâssen ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so han ich vorgenempter Cunrat Haym, won ich aigens insigels nut hatt, erbetten minen genadigen herren Cunraten von Ainwille da vor genempt, daz er sin insigel fur mich vnd min êrben offenlich an disen brief gehênket hât. So vergich ich ietzgenempter Cunrat von Ainwille, daz diz alles mit minem guten willen gûnst vnd verhengnûsse beschehen vnd volfurt ist worden, alz an disem brieue geschriben stât, vnd ze mêrer sicherhait der selben dinge vnd gedinge so han ich min aigen insigel fur den obgenanten Cunraten Haymen minen aigen man, won er aigens insigels nut hatt, vnd fur alle sin êrben offenlich an disen brief gehênket. Der geben wart ze sant Gallen in dem jâre, do von Cristi geburt wârent druzehenhûndert vnd nunzig jâr vnd dâr nâch in dem sibenden jâr, an dem nah^e) fritag vor mitter vasten.