Wir^a) diz nâchgenempten Adelhait Karrerin Hainrichs Burkartz saligen, den man nampt der Karrer, wilent êlichi husfrow, Haintz, Walther, Herman, Adelhait vnd aber Adelhait iru êlichi L kind tugint kûnt vnd veriehent offenlich mit disem brieue fur vns vnd fur alle vnser êrben allen, die in sehent lesent oder horent lesen, daz wir allu sechsi mit ainhellem wolbeLdâchtem mute von den wisen wolbeschaidenn Vlrichen Rudger, Johansen Eggrichen vnd Johansen Iten von Oberndorf¹ phleger vnd maister der siechen dez spittals ze sant Gallen² recht L vnd rêdlich enphangen habent den hof, den man nemmet Odenhofen³, der dez selben spittals recht aigen ist vnd ainhalb stosset an Hofen⁴, der och dez selben spittals ist, andert an Wisun⁵, zer dritten syten an Kappel⁶, zer vierden an Kranbul⁷, zer funften an den Rodmonten⁸ vnd zer sechsten syten an Staig⁹, vnd daz gutli, daz man nemmet die Armhub¹⁰, och inrunt den ietzgeschribenn anstossen gelegen ist, alles mit hus mit hof mit allen iro zimberren mit dem holtz, daz vns darzu vsbeschaiden ist, mit veld mit akkern mit wisen mit grund mit grât mit wûnne mit waiden mit stok mit stain mit wasen mit zwi mit stegen mit wegen mit gengen mit strâssen mit wasser mit wasserflussen mit allen rechten nutzen vnd gewonhaiten vnd mit allen zugehorden, vnd enphahentz mit disem brieue vns vnd allen vnsern êrben frowen alz mannen tochtern alz knaben, vssgelâssen aigenn luten, die von den liben aigen vnd nut gotzhus lute sint, ze ainem rechten rêdlichen êrbzinslêhen vmb ainen staten zins, mit dem gedinge vnd in den rechten, daz wir vnd alle vnser êrben den selben vorgeschribenn hof mit aller zugehorde in êren vnd vnwustlich haben niessen buwen besêtzen vnd entsêtzen sont, vnd sullent dem selben vorgenanten spittal vnd sinen phlegern zu dez selben spittals gewalt nûtze vnd handen da von aller jarlich ie ze sant Martins tag funf malter vesen vnd funf malter haber gutes vnd vngefârlichs kornes sant Galler messes, ain phûnt phenning ie zwen gut geng haller fur ainen Costenzer phenning ald aber samlich geng munse vnd werschaft dâ fur, die ze sant Gallen in der statt ie ze den ziten, alz dirre zins gefallen sol, vngefârlich geng vnd genam ist, sechs hêrbsthunr vnd hûndert ayer ze rechtem jarlichen vnd staten zins ân furzug ân allen abgang ân alle minrûnge vnd ân alle widerrêde geben richten vnd antwurten ze sant Gallen in der statt ân allen dez selben spittals vnd siner phleger schaden, ân gefarde, vnd habent och den obgenanten spittals phlegern ze êrschatz dâr vmb geben drissig phûnt phenning ie zwen gut geng haller fur ainen Costenzer phenning, deren wir su gantzlich gewert habent, vnd welhes jâres wir ald vnser êrben dem vorgeschribenn spittal vnd sinen phlegern den egenanten zins nut richtint vnd gabint gantzlich vnd gar ze dem zil vnd in den rechten, alz dâ vor beschaiden ist, so sullent dez selben spittals besorgern vnd iro botten vnd iro aller helffern och dâr vmb erlobt sin, vnsru vnd vnser êrben phender vff dem lande vnd in den stetten mit gericht vnd ân recht an klag vnd ân zorn uber alle fryhait vnd gewonhait uber alles burgerrecht uber allu recht vnd gesêtzt der herren der stetten vnd der landluten gaistlichs vnd weltlichs gerichtes alz vil vnd alz dik, vntz der selb spittal vnd sin besorger dez vorgeschribenn zins vnd alles dez schaden, der dâr vf geloffen war, wie ald von waz sachen sich daz gefuget hett, gantzlich vnd gar gewert vnd vsgericht werdent. Beschah aber daz, das sich der selb zins alz lang verzug, daz ain sant Martins tag den andern vnd ain zins den andern erlangiti vnd begriffe, es ware, daz inen ain tail dez selben zins oder gar vil ald wênig vssgestanden vnd nut worden war, daz den andern zins erlanget vnd begriffen hett, so ist vnd sol der vorgeschriben hof zem Odenhof mit aller zugehorde dem obgedâchten spittal vnd sinen phlegern zu dez selben spittals gewalt nûtze vnd handen zinsfellig vnd gantzlich vnd gar ledig vnd los sin vnd haissen vnd von aller manglichem ledeklich vnd êweklich vnansprachig beliben, ân alle gefarde. Es sullent och dez selben spittals besorger vnd iro botten vnd iro knecht, wer die sint, gut recht vnd vollen gewalt han, in allen vnd vss allen den holtzern, die zu dem vorgeschribenn hof gehorent, raiff ze howen vnd ze nemen, wo su die vindent vnd ankoment, wenn wo vnd wie vil su wollent, vnd daz wir noch dehain vnser êrben noch niemant andre an vnser statt noch von vnsern wegen dez vorgenanten spittals besorgern noch iro botten noch iro knechten daz dehains wegs spêrren noch su dâr an nit sûmen noch ierren sullent weder mit worten noch mit getaten noch mit dehainen sachen, vnd daz wir och daz selb raiffholtz vngewust lâssen vnd getrulich schirmen sullent. Ez sol och ze wissenn sin, daz dez samen, der vns vff dem vorgenanten hof gelâssen vnd beuolhen ist, sechs malter vesen sint vnd funf malter haber, vnd daz berêdt vnd bedinget ist worden, wie oder wenn ald von waz sachen der selb hof dem obgedâchten spittal ledig wurde, daz och denn also vil kornes dem selben spittal ân alle minrûnge vnd ân allen abgang dâr vff beliben sol ân alle gefarde. Es ist och bedingot vnd berêdt worden, ware daz wir oder vnser êrben dehaines jâres von den vorgeschribenn vnsern rechten vnd êrbzinslêhen gân vnd die verkoffen woltint, so sullen wir sie dez egeschribenn spittals phlegern dez êrsten vail bieten vnd vor manglichem zekoffenn geben funf schilling phenning Costenzer munse naher vnd bas denn iemant andre, ob su sie koffen wollent. War aber daz su sie nut koffen woltint, so mûgen wir dannenhin die selben vnsru recht wol zekoffenn geben, wem wir wollen, vssgelâssen aigenn luten, dem egeschribenn spittal an sinen rechten gantzlich vnschadlich, vnd och in samlicher mâsse, daz su den selben koff mit aller zugehorde zu dez egeschribenn spittals gewalt nûtze vnd handen dennoht wol ziehen nemen vnd haben mûgent, aber funf schilling phenning Costenzer munse naher vnd bas, denn wirs verkofft hettint. War aber, daz die selben phleger dem ietzgedâchten koff dem selben spittal nut behan woltint, so sullent su vns vnd vnser êrben an dem selben verkoffenn gantzlich vnd gar vngesûmt vnd vngeierrt lâssen sullent, wo wir die selben vnsru recht verkoffent, vnd wem wir och denn die selben vnsru recht zekoffen gebent, dem sullentz och denn dez vorgeschribenn spittals besorger vnuerzogenlich lihen vmb den zins vnd in den rechten, alz an disem brieue geschriben stât, dem selben spittal an sinen rechten vnd an andern sachen gantzlich vnschadlich, doch alweg vssgelâssen aigenen luten, die von den liben aigen vnd nut gotzhus lute sint, den sullent die phleger nut schuldig noch gebûnden sin, der selben recht iht zelihen, ân alle gefarde. War aber, daz die selben spittals besorger dehaines jâres den vorgeschribenn hof verkoffen vnd dâ von gân woltint, so sullent vns vnd vnsern êrben die selben recht gen inen behalten sin ze glicher wise vnd in allen den rechten, alz dâ vor geschriben stât vnd mit worten beschaiden ist, ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so haben wir vorgenempten Adelhait Karrerin Hainrichs Burkartz saligen, den man namt Karrer, wilent êlichi husfrow, Haintz, Walther, Herman, Adelhait vnd aber Adelhait iru êlichi kind, won wir aigener insigel nut hattent, vns allu sechssi willeklich gebûnden vnder dez erbern wolbeschaidenn Vlrichs ab dem Berg insigel burger ze sant Gallen, der daz selbe sin insigel von vnser aller ernstlicher bette wegen fur vns vnd fur alle vnser êrben offenlich an disen brief gehenket hât, dez och ich ietzgenempter Vlrich ab dem Berg vergich, mir vnd minen êrben gantzlich vnschadlich. Diz beschach vnd wart dirre brief geben ze sant Gallen in dem jâre, do von Cristi geburt wârent druzehenhûndert vnd nunzig jâr vnd dârnâch in dem sibenden jâre, an vnsers herren vffart âbent.