Ich^a) Haintz von Stainah¹ der alt bekenn vnd kund vnd vergih allermenglichem mit disem brief, das ich mit guter vorbetrahtung vnd mit wolbedahtem mute den kornzehenden von ab vnd L vsser den gutern des houes, den man nemmet Ffrankenruti², gelegen zwischen Hub³ vnd Lankwatt⁴ vnderthalb Berg⁵ mit allen sinen rehten nutzen vnd gewonhaiten, als ich in vntz her vff L den tag, als dirre brief ist geben, inne gehept vnd genossen han, reht vnd redlich fur mich vnd fur alle min erben vnd nachkomen verkofft vnd ains staten ewigen kôffes ze koffen geben hab L fur ledig vnbekumbert reht aigen der ersamen gaistlichen swoster Claren der Blarrerinen closterfrowen sant Katherinen closters vnd gotzhus gelegen ze sant Gallen⁶ in Irer vorstatt vnd irn erben, wer die sind gaistlich ald weltlich, vmb zwaintzig vnd vmb zwai pfund pfenning alles guter Costentzer munsse, dero ich och aller gar vnd gantzlich von ir gewert vnd bezalt bin mit barem beraitem gelt, dz an minen offen nutz komen vnd bewendet ist, vnd han ir och denselben zehenden mit allen sinen zugehorden fur ledig vnbekumbert reht aigen an des hailigen riches offner lantstrâss von vnd och mit minen handen in vnd zu ir handen vnd gewalt geuertgot vnd brâht mit allen behugten worten vnd getaten, als vmb rehti aigni guter reht sitt vnd gewonlich ist vnd als es nach aigens reht sitt vnd gewonhait allenthalben krafft vnd maht sol vnd mag han nv vnd och hienach, vnd han mich och in derselben vfgebung vnd vertgung des egedahten zehenden mit allen sinen zugehorden gar vnd gantzlich verzigen vnd entwêrt vnd entfromd vnd entwerr mich vestenklich mit vrkund diss briefs fur mich vnd fur alle min erben vnd nachkomen aller aigenschafft aller lehenschafft kuntschafft gewer gezuknuss lut vnd brief aller vordrung rehtung vnd ansprâch vnd alles gaistlichen vnd weltlichen rehtens vnd gerihtes vnd aller sachen funden invallen listen vnd geuarden vnd aller andrer sachen vnd furzug, von dero wegen ald da mit ich ald dehain min erben ald nachkomen ald ieman andre an vnser statt ald von vnsern wegen die êgeseiten swoster Claren Blarrerinen oder ir erben ald nachkomen, si siyint gaistlich oder weltlich frowen ald man, ald ieman andre an iro statt ald von iro wegen an dem vorgeschribnen zehenden gantzlich ald von dehainen desselben zehenden zugehorden wegen besunder von aigenschafft oder von dehainerlay sachen wegen nv hinnenhin von dem tag, als dirre brief ist geben, iemer kundin oder mohtin angesprechen geschadgen oder in dehain wîs ald weg bekumberren ald beswarren mit gaistlichen oder mit weltlichen gerihten ald ân reht oder mit dehainen andren sachen, ân alle geuard. Ich han ouch gelobt bi miner truw in aides wîs vnd loben vnd verbind och mich vnd min erben vestenklich mit crafft diss briefs, des egeseiten zehenden mit allen sinen zugehorden fur ledig vnd fur vnbekumbert aigen vnd och diss redlichen staten koffes reht vnd getruw wern ze sinne nach rehtes aigens reht ân allen furzug vnd ân alle uard, mit solicher beschaidenhait bedingd vnd in dem rehten, was irrung zuspruch ansprach vnd schadens dieselben swoster Claren Blarrerinen oder ir erben, wer die sind, an demselben zehenden gantzlich oder an ald von dehainen desselben zehenden zugehorden wegen besunder von ieman ald von dehainerlay sach wegen beschah ald widerfur nv hinnenhin von dem tag, als dirre brief ist geben, inwendig dem zil, als wir ir wern sond sin, das wir su da von ledigen vnd entrihen sollent vnd och wellent vnd inen denselben zehenden mit allen sinen zugehorden fur ledig vnbekumbert reht aigen wider zu iren handen vnd gewalt bringen in vnser kost vnd zerung ân allen iro schaden, wa wenn wie ald wie dik das ze schulden kumt vnd inen notdurfftig ist, es sig vff gaistlichen oder vff weltlichen gerihten oder gen gaistlichen ald weltlichen luten, wer die sind, vor raten vor hêrren vor bunden vnd vor stetten vnd allenthalben vnd gen allermenglichem ân alle geuerd, als dik vnd es ze schulden kumt. Tatin aber ich oder min erben, ob ich enwari, das niht, als dik so es ze schulden kumt vnd wir von der egeseiten swoster Claren Blarrerinen oder irn erben, wer die sind, darumb gemant werdent mit botten mit brieuen oder von iro selbes mund ze hus ze hof ald vnder ogen vnd sich das als lang verzugi vnd verlangti, das si oder ir erben sich selb versprechen musstint oder versprechen tatint vnd da von ze schaden kamint, den schaden allen sollen vnd wellen ich oder min erben, ob ich enwar, derselben swoster Claren vnd irn erben, ob si enwar, ablegen vnd bezaln ân furzug vnd ân allen irn schaden ze sant Gallen in der statt, als ich ir fur mich vnd alle min erben gelobt vnd verhaissen han bi minen guten truwen. Tatin aber ich oder min erben, ob ich enwari, das niht, so hand dieselb swoster Clar Blarrerin vnd ir helffer oder, ob si enwar, ir erben vnd dero helffer, wer die sind, friyes vrlob vnd vollen gewalt mit crafft diss briefs, mich vnd min lute oder, ob ich enwari, min erben vnd dero lut alle gemainlich oder welhi si wellent besunder vfzetriben ze pfenden ze noten ze verbieten vnd ze stellen vnd vnseri ligenden vnd varenden guter alli gemainlich oder welhu su wellent besunder darumb ze verkoffen ze versetzen ze verlihenn oder selber ze niessenn vnd inne ze habent, als vil vnd als lang, vntz das wir inen den egedahten zehenden ledgent vnd entrihent vnd wider fur ledig vnd fur vnbekumbert reht aigen zu iro handen bringent vnd inen och allen den schaden, in den su in dehain wis ald weg hie von koment, gar vnd gantzlich ab tund vnd bezalent, vnd mugen vnd geturen och dieselb swester Clar Blarrerin vnd ir erben vnd helffer mich vnd min erben vnd vnser lut vnd gut also noten vnd bekumberren, als vorgeschriben stat, mit gaistlichen oder mit weltlichen gerihten ald ân reht vnd ân clag vnd ân zorn in stetten in dorffern in frihaiten vnd vsserthalb vff dem land vnd allenthalben, wa su wellent mugent oder kunnent ald inen fuklich ist, vnd verzih mich vestenklich mit disem brief fur mich vnd fur alle min erben vnd nachkomen aller gaistlichen vnd weltlichen luten vnd gerihten vnd aller frihaiten gesetzen buntnuss aidgenosschafft vnd ainung vnd aller sachen funden invallen vnd furzug, so mich vnd min erben oder vnser lut ald gut hie wider ald hie vor geschirmen gefrijen ald gefriden kundin oder mohtin, ân alle geuerd. Vnd ze offem warem vrkund vnd gantzer sicherhait aller vorgeschribner ding vnd bedingd gib ich obgenanter Haintz von Stainah der egenanten swoster Claren der Blarrerinen vnd iren erben vnd nachkomen disen gegenwurtigen offen brief fur mich vnd fur alle min erben vnd nachkomen versigelten vnd gefestnot mit minem aignen anhangenden insigel. Dis beschah vnd ward dirre brief geben ze Stainah vor miner vesti an des riches offener lantstrass an dem nahsten mantag vor dem hailigen tag ze pfingsten in dem jar, do man zalt von gottes geburt tusent druhundert nuntzig vnd siben jare.