Ich^a) Frik Nagelli ze disen ziten keller ze Host¹ sant Johans² von gnad wegen des edeln erwirdigen abt Cun L ze sant Gallen³ mines gnadigen herren kund vnd vergich offenlich mit vrkund diss briefs, das fur mich L kam ze Host in dem hof, da ich offenlich ze gericht sass hut diss tagss nach datum diss briefs die erber L frowe Alli Blatterin, vnd kam mit ir fur gericht ir elich man Hans Vogel sesshaft ze Host. Da mutot die ietz gena(nte) frowe Alli Blatterin vor gericht aines fursprechen. Da ward ir ze fursprechen geben der beschaiden Hans Mark burger ze Rinegg⁴. Der offnet von ir wegen, das sy ain wis hett, die ir war, der selben wise ware acht mann mad vnd gelegen amm rôr ze Haglilo⁵, die ainhalb stosset an Hannis Wetzels vnd an Burkartz Noschlers von Rinegg wisen. Derselben wis welt sy sich luterlich entzihen vnd mit allen rechten nutzen vnd zu gehorde vnd alli iri recht an der selben wis geben ir bruders salgen Hannis Blatters, den man nampt Owman, kinden Hansen, Vlin, Elsun vnd Kattrinen in allen vieren gemainlich ze ainer rechten gemaind, vnd batt mich der vorgene(mpt) Hans Mark der vorgena(nten) frowen fursprech ir ze ervarn an ainer vrtal, wie sy das tun solt vnd moht, das es kraft vnd macht hett vnd och also belibe vnd beliben solt ietz vnd och hie nach. Darumb fragt ich egene(mpter) richter vrtail vmb vff den aid, da ward ertailt mit gemainer vmbgander vrtal, das die vorgena(nt) frow Anna Blatterin des ersten vor gericht mit ir elichen mans willen ainen vogt nemen solt vnd den darnach geschehen, was recht war. Also ward ir ze vogt geben der erber kneht Haintz Knobelli sesshaft ze Host sant Johans, vnd also stalt sich die vorgena(nt) frowe Alli Blatterin mit vogt vnd mit fursprechen, als vrtal vnd recht da vor gericht gab vnd als recht ist, vnd gab och da vor offem gericht ze Host mit ir elichen mans Hansen Vogels willen vnd gunst vf an min hand die vorgeschriben wis die acht mann mad gelegen am rôr ze Hagelilo mit allen rechten nutzen vnd gewônhaiten vnd mit aller zu gehorde vnd och also, das sy vnd ir elichen man Hans Vogel nach iro baider erben kain ansprâch zu derselben wis niemer me nit haben sont, vnd batt mich sy also lihen den vorgene(mpten) ir bruders salgen Hannis Blatters kinden Hansen, Vlin, Elsun vnd Kattrinen in allen vieren gemainlich ze ainer rechten gemainde. Das han ich getan mit miner hand getat guten willen vnd gunst in aller der wise vnd bedingnust, als hie vor an disem brief mit worten beschaiden ist, minem herren von sant Gallen vnd sinem gotzhus an ir rechten ân schaden. Vnd ist dis alles geschehen, als vrtal vnd recht gab vnd als recht ist, vnd des ze vrkund so henke ich Frik Nagelli von des gericht wegen min insigel an disen brief mir vnd minen erben an schaden. Der geben ist ze Host an dem nahsten zinstag vor dem hailgen tag ze pfingsten in dem jar, do man zalt von gotes geburt druzehen hundert vnd in dem siben vnd nunzigosten jare.