Wir^a) Rudger von gotlicher fursehung probst vnd gemainer couent des gotzhus ze Ittingen¹ sant Augustinus orden in Costentzer bystum verLiehen vnd tund kunt allermenklichem mit disem brief, dz wir von grosses vnlidigen verderblichen gebresten vnd kumberhafti wegen vnsers obgenanten L gotzhus ze Ittingen, den selben gebresten wir och in dehain ander wis noch weg nit verkomen noch gewenden mochtend, dann daz wir etlichi vnsers obgenanten gotzLhus gelegni guter eweklich davon entfromden vnd verkoffen mustend, mit guter wissentklicher vorbetrachtung, die wir dar vmb vor mals dik vnd vil gehebt haben, vnd mit gemainem ainhelligen rat vnsers cappitels nach erber wiser luten vnd vnser vnd vnsers obgenanten gotzhus getruwosten vnd bester frunden rat vnd vnderwisung vnd och mit wissen gunst vnd vrlob des hochwirdigen fursten vnsers genadigen herren abt Cunen von gottes gnaden des gotzhus ze sant Gallen², vnder dz selb gotzhus ze sant Gallen och wir vnd dz obgenant vnser gotzhus ze Ittingen gehorent, vnd och mit willen vnd gunst aller andren vnserr vnd vnsers gotzhus obren vnd aller, dero gunstes oder vrlobs wir dar zu bedorften von recht oder von gewonhait, vnd och ze den ziten vnd in der wis vnd mass, als wir das von recht wol tun mochtend vnd als man solichi gotzhus guter von ainem solichen gotzhus nach vnsers gotzhus recht vnd och suss nach gemainem vnd geschribem recht eweklich wol entfromden vnd verkoffen mag, redlich vnd recht fur vns vnd fur alle vnser nachkomen vnd fur dz obgenant vnser gotzhus ze Ittingen ains vngeuarlichen rechten redlichen ewigen koffes verkoft haben den hof ze Resterbul³ vnd ain gutly vff dem berg ze Matzzingen⁴ gelegen, das man nempt des Oberwisers gutli, vnd stosset an den ietzgenanten hof ze Resterbul vnd lit och in dem selben hof, vnd die gemain bunt ze Resterbul, dasselb gutli vff dem berg vnd die gemain bunt libding warent Johansen Resterbulers vnd Annen siner elichen frowen, das selb libding aber der erwirdig herr apt Rudolf des gotzhus ze sant Johans in Turtal⁵ von inen geledget vnd an dz ietzgenant sin gotzhus gekoft hat vmb ainlif phund phenning Costentzer muns mit husern mit hofstetten mit hofraitinen mit garten mit akker mit wisen mit holtz mit veld mit wunn mit waiden mit wasser mit wegen mit grund vnd mit grat vnd mit allen rechten nutzen zinsen gewonhaiten vnd mit allem dem, so darzu vnd dar in von recht oder von gewonhait iendert gehort, es sie verschinen oder es gelt ietz, es sie ob erd oder vnder erd, besuchten oder vnbesuchten benemptem vnd vnbenempten, es sig mit worten an disem brief begriffen oder nit vnd als wir das vntz har inne gehebt vnd genossen habent vnd dz vormals ane vns bracht ist, das alles vnsers gotzhus recht aigen was, vnd haben denselben hof ze Resterbul vnd dz gutly vff dem berg ze Matzzingen mit der gemainen bund vnd mit allen vorgedachten rechten vnd zugehorden fur recht ledig vnansprachig aigen ze koffend geben dem obgenanten erwirdigen gaistlichen herren abt Rudolf des gotzhus ze sant Johans in Turtal sant Benedicten ordens in Costentzer bistum vnd allen sinen nachkomen zu desselben gotzhus handen vmb ains vnd sibenzig phund phenning alles guter vnd genamer Costentzer muns, dero wir och aller gantzlich vnd gar nach vnserm nutz vnd willen von im mit barem gelt bezalt syen an den stetten, da wir vnsers gotzhus wachsenden verderblichen schaden mit verkomen habent, wan och vns der selb apt Rudolf das bas vergolten vnd mer dar vmb gegeben hat, wan vns ieman andrer darvmb geben wolti, wie doch das wir dz vormals dikk vnd vil offenlich vail gebotten hettent. Vnd habend im denselben hof vnd dz gutly vnd die gemainen bund mit allen vorgedachten rechten vnd mit aller zugehord fur vns vnd fur alle vnser nachkomen vnd fur vnser obgenant gotzhus ledklich vnd frilich vf geben vnd zu siner vnd siner nachkomen vnd zu des obgenanten gotzhus ze sant Iohans handen vnd gewalt bracht vnd geuertgot vnd si des in liblich nutzlich gewer gesetzt mit des obgenanten vnsers genadigen herren apt Cunen von gottes gnaden apt des gotzhus ze sant Gallen gunst vrlob vnd willen vnd mit aller dero willen, dero gunstes oder vrlobs wir darzu bedorftend, vnd och ze den ziten vnd vor den luten vnd an den stetten, als wir das nach vnsers ordens vnd gotzhus recht vnd gewonhait wol tun mochtend vnd als recht sitt vnd gewonlich was vnd als es billich nu vnd hie nach vnd iemermer ewenklich kraft vnd macht hat vnd haben sol vnd mag, an geuard. Vnd habend vns och hier vber ze den ziten an den stetten vnd mit dero gunst vnd willen, als hie vor beschaiden ist vnd wie dz notdurftig was vnd wir dz durch recht wol tun soltend vnd mochtend, gegen dem obgenanten apt Rudolfen des gotzhus ze sant Johans gegen allen sinen nachkomen vnd gegen dem obgenanten gotzhus ze sant Johans mit gemainem ainhelligen rat vnsers cappitels fur vns vnd fur alle vnser nachkomen vnd fur das obgenant vnser gotzhus ledklich vnd frilich verzigen vnd entwert vnd verzihend vnd entwerend vns redlich vnd recht mit disem brief aller aigenschaft aller lehenschaft aller manschaft alles tails aller gemaind aller gewer aller kuntschaft aller zugnust lut vnd aller briefen, die von des selben hofes vnd gutlis wegen ie gegeben sint, das vns vnd vnsern nachkomen vnd vnserm gotzhus ze Ittingen die nu hinnanhin an allen stetten vnd vor allen luten vnd gerichten, da si gezogt wurdent, vnnutz vnd vnhilflich vnd dem obgenanten apt Rudolfen vnd allen sinen nachkomen vnd sinem gotzhus ze sant Johans vnschadlich sin sond, vnd darzu alles rechten gaistlichs vnd weltlichs gerichts aller gesetzt gewonhait frihait vnd genad, so wir oder vnser gotzhus oder orden von babsten kaisern kungen oder von ieman anderm ietz habent oder hie nach iemermer gewinnent erwerbent oder von ieman erdacht oder vfgesetzt wurdent, vnd och aller rechtung vordrung ansprach furzug vnd vszug vnd aller andren sachen geuarden vnd listen, dar mit wir oder vnser nachkomen oder ieman andrer von vnserr oder von vnsers gotzhuses oder ordens wegen den obgenanten hof ze Resterbul vnd dz gutly vff dem berg ze Matzingen vnd die gemainen bund mit aller zugehord gantzlich oder an dehainem tail iemermer kundent oder mochtend angesprechen oder dar mit wir wider dehaini ding, so an disem brief hie vor oder hie nach geschriben stant, kundend oder mochtend getun mit worten mit raten oder getaten mit gericht oder ân gericht oder in dehain ander wis, so ieman erdenken kan, ân geuard. Wir sollend vnd gelobend och ainhellenklich by guten truwen fur vns vnd fur alle vnser nachkomen, die wir och vestenklich herzu bindent mit kraft dis briefs, des obgenanten hofes vnd gutlis vnd der gemainen bund vnd mit allen vorgedachten rechten vnd mit aller zugehort fur recht ledig vnansprachig aigen vnd dar fur, das nieman nutz dar ab gang, vnd dis redlichen koffes des obgenanten apt Rudolfs des gotzhus ze sant Johans vnd aller siner nachkomen vnd sines obgenanten gotzhus gen allermenklichem vff gaistlichen vnd vff weltlichen gerichten allenthalben, wenn wa oder wie dik si des notdurftig sint oder dar vmb mit dem rechten von ieman vffgetriben oder angesprochen wurdent, recht weren ze sind nach dem rechten vnd als ain gotzhus dem andern solicher guter von recht oder von gewonhait wer sin sol vnd si dar vmb allweg gen allermenklichem an allen iren schaden ze verstand ze versprechend vnd von der ansprach ze entrichend vnd ze ledgend ân allen furzug vnd widerred an geuard. Vnd des alles ze warem offem vrkunt vnd ewigen staten sicherhait so haben wir obgenanten Rudger probst vnd gemainer couent des gotzhus ze Ittingen vnsru insigel fur vns vnd fur alle vnser nachkomen offenlich gehenkt an disen brief. Dar nach veriehen och wir Cun von gottes gnaden apt des gotzhus ze sant Gallen da obgenempt, wan das obgenant gotzhus ze Ittingen vnder vnser ietzgenant gotzhus ze sant Gallen gehort, das diser vorgeschriben koff vnd vertgung vnd alli andru ding, so an disem brief hie vor geschriben stant, mit vnserm vrlob gunst vnd guten willen geschehen vnd volfurt sind in aller wis, als hie vorgeschriben ist, vnd des ze offem vrkund so haben wir och vnser insigel offenlich gehenkt an disen brief. Der geben ist ze Wil⁶ in vnsers gotzhus stat an dem hailgen aubent ze phingsten, do man zalt von Cristi geburt druzehenhundert vnd nuntzig jar vnd dar nach in dem sibenden jare.