Ich^a) Eglolf von Roschach¹ ritter tun kûnt vnd vergich offenlich mit disem brieue fur mich vnd fur alle min êrben vnd nâchkomen allen, die in sehent lesent oder horent lesen, daz fur mich in gericht L kâment ze sant Gallen in der statt, do ich vff offnem markte offenlich ze gericht sass, die êrbern wolbeschaidenn Johans Rochli burger ze sant Gallen mit Margarethen siner êlichen husfrowen L Hermans saligen Abhusen êlichi tochter ze ainem tail vnd Vlrich Rudger phleger vnd maister der siechen dez spittals ze sant Gallen² an statt vnd in namen dez selben spittals vnd siner phleger L vnd besorger, vnd befogtat sich och do die ietzgenempt Margareth Johansen Rochlis êlichi husfrow mit sinem willen vnd gûnst vnd mit miner vnd siner vnd dez wisen wolbeschaidenn Nycolausen Ruprehtz statammans ze sant Gallen³ ir erkornen vogtes handgetaten, wie mit vmbgander vrtail ertailt wart vnd alz recht sitte vnd gewonhait waz, vnd veriâhent vnd offnotant och do die selben obgenanten Johans Rochli vnd Margareth sin êlichi husfrow mit dem ietzgenempten ir vogt mit dem wisen wolbeschaidenn Johansen Gossler ir wyser vnd mit iro aller fursprechen offenlich vor mir in gerichte vnd sprâchent, daz su mit guter vorbetrachtung vnd mit wolbedâchtem mute von iro rêdlicher note wegen recht vnd rêdlich verkofft hettint den zehenden ze Obern Goldach⁴ gelegen, der dâ gât ab der vnd von der hub, die man nemmet dez Haingarters hub, vnd ab minem hof, den man nemmet Buchenstains ⁵ hof, vnd ab dez ammans von Roschach hof, vnd aines staten êwigen koffes recht vnd rêdlich ze koffenn geben hettint dem vorgeschribenn spittal vnd sinen phlegern vnd besorgern zu dez selben spittals gewalt nûtze vnd handen vmb zwainzig phûnt vnd vier phûnt phenning ie zwen gut geng haller fur ainen Costenzer phenning, die su dâr vmb enphangen hettint vnd ir gantzlich gewert warint worden vnd an iro offenn^b) bewêndet warint, den selben zehenden die obgenant Margareth Johansen Rochlis êlichi husfrow von irm vatter saligen êrêrbt hett vnd ir lehen von mir gewesen war, vnd woltint och den selben zehenden zu dez vorgeschribenn spittals vnd siner besorger handen vfgeben vnd willeklich vêrtigen, vnd bâtent inen erfarn an ainer vrtail, wie su daz tun soltint, alz recht war vnd der selb spittal dâr an habende gesin moht. Do frâgt ich vrtail vmb, waz recht war, do wart ertailt mit ainheller vmganter vrtail, daz der obgenant vogt Nycolaus Rupreht die egenempten Margarethen Johansen Rochlis êlichen husfrowen ze drien mâlen vsser dez gerichtes ring furen vnd si ze ieglichem mâle frâgen solt, ob si willeklich vnd vnbezwûngenlich daz tat vnd tun wolt, alz von ir dâ vor geoffnot wari worden, vnd daz der selb ir vogt zem dritten mâle bi sinem aide sagen solt, waz si im gesait hett, vnd daz denn die selben obgenanten Johans Rochli, Margareth sin êlichi husfrow mit dem ietzgenempten ir vogt den vorgeschribenn zehenden mit allen sinen zugehorden von iro handen vnd mit vsbenempten worten an min hand vfgeben vnd mich bitten soltint, den selben zehenden lihen dem vorgeschribenn spittal vnd sinen phlegern vnd besorgern zu dez selben spittals gewalt nûtze vnd handen, vnd daz es denn nâch dem rechten wol kraft vnd maht hett vnd haben solt vnd moht ietz vnd hie nâch, daz och do zestûnde vnd ze stett alles gar vnd gantzlich volfurt wart. Der obgenant vogt Nyclaus Rupreht furt die egenempten Margarethen Johansen Rochlis êlichen husfrowen ze drien mâlen vsser dez gerichtes ring vnd frâgt si der ze ieglichem mâle, ob^c) es willeklich vnd gern tat vnd tun wolt, alz ir fursprech dâ vor von ir wegen geoffnot hett. Der selb ir vogt sait ze dem dritten mâle bi sinem aide, daz si im gesait vnd gsprochen hett, daz si es willeklich vnd vnbezwûngenlich tat vnd tun wolt, alz da vor beschaiden ist, vnd gâbent och dâ die selben obgenanten Johans Rochli vnd Margareth sin êlichi husfrow den vorgeschribenn zehenden mit vsbenempten worten, alz vor beschaiden ist, vnd mit aller zugehorde von iro vnd vss iro vnd dez egenempten ir vogtes handen frylich vf an min hand vnd bâtent mich mit ernst, daz ich den selben zehenden lihe dem vorgedâchten spittal vnd sinen besorgern zu dez selben spittals handen. Do erhort ich der selben Johansen Rochlis, Margarethen siner êlichen husfrowen vnd ir vogtes ernstlichen bette vnd nam den egeschribenn zehenden von iro handen vf an min hand vnd han den gelihen dem vorgeschribenn spittal vnd sinen phlegern vnd besorgern, wer die sint ald noch werdent, zu dez selben spittals gewalt nûtze vnd handen vnd lihs mit disem brieue in allen den rechten dinge vnd gedinge, alz an disem brieue geschriben stât vnd mit worten beschaiden ist, mir vnd^d) allen minen êrben vnd nâchkomen an allen vnsern rechten nutzen vnd gewonhaiten gantzlich vnschadlich. Vnd entzigent sich och do die obgenanten Johans Rochli vnd Margareth sin êlichi husfrow, wie recht waz, von iro vnd vss iro vnd dez egenempten ir vogtes handen frylich vnd willeklich in dez vnd zu dez vorgeschribenn spittals vnd siner phleger handen zu dez selben spittals gewalt nûtze vnd handen vnd verzihent sich mit disem brieue gantzlich vnd gar fur sich vnd fur alle iro êrben aller aigenschaft aller lêhenschaft aller kûntschaft aller manschaft aller rechtung aller gewêr lute vnd brieuen gaistlichs vnd weltlichs gerichtes, so su ald iro êrben an dem vnd zu dem vorgeschribenn zehenden ald zu dehainen sinen zugehorden ie gehebt hant ald hie nâch iemer mêr gehaben oder gewunnen mohtint ald iemant von iro wegen. Vnd ist diz alles beschehen vnd gantzlich volfurt mit allen den worten vnd getaten, wie recht sitte vnd gewonhait waz, alz mit vmbgander gemainer vrtail ertailt wart, daz es nâch dem rechten wol kraft vnd maht hât vnd haben sol vnd mag ietz vnd hie nâch. Vnd ze offenem wâren vrkunde vnd stater sicherhait aller dirre vorgeschribenn dinge vnd vergicht so han ich Eglolf von Roschach ritter dâ vor genempt min insigel mit vrtail von dez gerichtes wegen vnd von diser obgedâchten lêhenschaft fur mich vnd fur alle min êrben vnd nâchkomen offenlich an disen brief gehenket. So veriehen wir egenempten Johans Rochli vnd Margareth sin êlichi husfrow vnd Nycolaus Rupreht ir vogt in dirre vorgeschribenn sache, daz alles daz wâr ist, so der from vêst ritter herr Eglolf^e) Roschach da vor genempt von vns dâ vor veriehen hât, alz an disem brieue geschriben stât, vnd ze ainer gewussnen sicherhait so haben wir ietzgenempten Johans Rochli vnd Margareth sin êlichi husfrow baidu vnuerschaidenlich mit vnsern truwen gelobt vnd lobent mit disem brief fur vns vnd fur alle vnser êrben, dez vorgenanten zehenden mit aller zugehorde vnd och dez koffes recht wern ze sinne nâch recht vnd den vorgeschribenn spittal vnd sin besorger ân allen iro schaden dâr vmb ze versprechenn vnd ze verstanne vff allen gerichten gen aller manglichem vnd an allen stetten, wenn wo vnd wie dik su dez nâch dem rechten notdurftig sint oder dâr vmb angesprochen geschadgot genotigot oder vfgetriben werdent, ân alle gefard. Vnd dez ze wârem vrkunde aller dirre vorgeschribenn dinge vnd vergicht so han ich vorgenempter Johans Rochli min aigen insigel fur mich vnd fur alle min êrben offenlich an disen brief gehenket. Vnd ze mêrer sicherhait der selben dinge vnd vergicht so han ich egenempti Margareth Johansen Rochlis êlichi husfrow, won ich aigens insigels nut hatt, mich willeklich gebûnden vnder dez obgenanten Johansen Gosslers mines wisers insigel, der daz selbe sin insigel von miner ernstlicher bette wegen fur mich vnd min êrben offenlich an disen brief gehenket hât, dez och ich ietzgenempter Johans Gossler vergich mir vnd minen êrben gantzlich vnschadlich. Vnd ze noch mêrer sicherhait der selben dinge vnd vergicht so han ich obgenanter Nycolaus Rupreht vogt in dirre vorgeschribenn sache min insigel von der selben vogtye wegen offenlich an disen brief gehênket mir vnd minen êrben gantzlich vnschadlich. Diz beschach vnd wart dirre brief geben ze sant Gallen in dem jâre, do von Cristi geburt wârent druzehenhûndert vnd nunzig jâr vnd dâr nâch in dem sibenden jâr, an dem nahsten fritag nâch vnsers herren fronlichnams tag.