Wir nachgenante Rudolff von Rosenberg der elter von Bernang ritter vnd Rudolff von Rosenberg¹ sin elicher sun verjehen vnd tund kund menklichem mit disem brief fur vns vnd fur alle vnser erben vnd nachkomen, das wir an barem gelt ingenommen vnd enphangen haben von dem hochwirdigen fursten vnserm genadigen herren apt Cuonen von gottes gnaden des gotzhus ze sant Gallen² achtzehen phund phening guoter genamer Costentzer muntz, dero wir och aller gantzlich vnd gar nach vnserm nutz vnd willen von im bezalt syen, vnd haben im vnd allen sinen nachkomen zuo desselben sines gotzhus ze sant Gallen handen wissencklich vnd wolbedacht fur vns vnd fur alle vnser erben darumb abzekoffend vnd ains vngevarlichen ewigen kofs ze koffend geben ain phund phening Costentzer müns, die vnns jerlich giengend vsser desselben gotzhus ze sant Gallen kelnhoff ze Gossow³ vnd allen gutern, die darin gehorend, dasselb phunt phening geltz vnser lehen von demselben gotzhus was, vnd haben dasselb phund phening geltz vsser demselben kelnhof ze Gossow vnd den gutern, die darin gehorend, baid wilklich vnd wolbedacht ledklich vnd frilich vffgeben an dez obgenanten apt Cuonen vnsers genedigen herren hand vnd dz zuo sinen vnd siner nachkomen vnd zuo desselben sines gotzhus handen vnnd gewalt bracht vnd gevertgot vnd den egenanten kelnhof ze Gossow die guter, so darin gehorend, vnd dz gotzhus ze sant Gallen vmb dasselb phunt phening geltz furbas gantzlich vnd gar fur vns vnd fur alle vnser erben vnnd nachkomen quit ledig vnd loß gelassen vnnd gesait, als recht sitt vnd gewonlich was vnnd als das billich von recht vnd von gewonhait kraft haut nu vnd hernach. Vnnd haben vns hierüber baid wissencklich vnd wolbedacht fur vns vnd fur alle vnser erben vnd nachkomen gegen demselben apt Cuonen vnserm genadigen herren vnd gegen allen sinen nachkomen vnd gegen demselben sinem gotzhus ledklich vnd frilich verzigen vnd entwert aller aigenschaft aller lehenschaft aller mantschaft aller gewer aller kuntschaft aller zugnust lut rodel vnd brief, so wir jetz habent oder hienach von jeman funden wurdend, alles rechten gaistlichs vnd weltlichs gerichtes aller rechtung vordrung vnd ansprach, so wir oder vnser erben oder nachkomen oder jeman andrer von vnsern wegen zuo dem obgenanten phund phening geltz oder zuo dem kelnhof ze Gossow zuo den gutern, so darin gehorent, oder zuo dem obgenanten gotzhus ze sant Gallen von desselben phund phening geltz wegen je gehatten oder hienach jemermer gewinnen mochten von recht oder von gewonhait oder von dehainerlay andren sach wegen, so jeman erdencken kan an gevard. Wir sollend vnd gelobend och mit disem brief fur vns vnd alle vnser erben vnnd nachkomen, die wir och vestenklich herzuo bindent, des obgenanten phund phening geltz vsser dem kelnhof ze Gossow vnd den gutern, so darin gehorend, vnd diß kofs des obgenanten apt Cuonen des gotzhus ze sant Gallen vnd aller siner nachkomen gen allermenklichem allenthalben, wenn wa oder wie dik si des notdurftig sind oder darumb mit dem rehten von jeman angesprochen wurdend, recht weren ze sind nach dem rechten vnd nach des landes sitten vnd gewonhait an gevard. Vnd des alles ze warem offem vrkunt vnnd statter sicherhait so haben wir obgenante Rudolff von Rosenberg der elter von Bernang ritter vnd Rudolff sin sun baid vnsrü insigel fur vns vnd alle vnser erben vnd nachkomen offenlich gehenkt an disen brief. Vnnd ze merer zugnust vnnd sicherhait derselben ding so haben wir erbetten den fromen vesten ritter vnsern lieben vettern herr Rudolffen von Rosenberg von Zukkenriet⁴, dz er och sin insigel zuo den vnsern offenlich gehenkt hat an disen brief, das och ich jetzgenanter Rudolf von Rosenberg von Zukkenriet ritter also getan han von der obgenanten miner vetter ernstlichen bett wegen, doch mir vnnd minen erben vnschadlich. Diß geschach vnnd ward dirr brief geben ze Wil⁵ in der statt an sant Johans abend des Toffers ze sunnwendi, do man zalt von Cristi geburt drüzehenhundert vnd nüntzig jar vnd darnach in dem sibenden jare^a).