Wir^a) die nachgenanten Eglolf Odenhofer der schnider burger ze sant Gallen vnd Adelhait sin êlichi frow Johansen Wisseggers, den man nempt der Locher, L êlichi tohter tun kunt vnd veriehent offenlich mit disem brief allen, die in ansehent lesent oder horent lesen, das wir baidu mit wolbedahtem L mut willeklich frilich vnd vnbetwungenlich offenlich gesworn haben ietwedres besunder ainen gelerten aide liplich ze got vnd ze den hailigen L mit vfgehabenen vingern, wari daz wir baidu gemainlich oder aines vnder vns besunder dehainer lay zu spruch sachen stoss oder ansprachen vff disen huttigen tag hettint oder nv hinnanhin iemer gewunnint zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz da burger ald si werdent noch da selbs burger, wenne vnd alz dik daz beschach, vnd woltint wir ie danne darumb rehtes nut enbern, das wir ie danne darumb rehtes phlegen vnd reht von in nemen sullen vnd wellen ze sant Gallen in der stat vor irem geriht vnd niendert anderswa won nach der selben stat reht vnd gewonhait, es war danne, das wir da selbs rehtlos gelassen wurdint vnd das och das da kuntlich wurdi, so ist vns behalten vnd in dem aide vss gelassen, das wir das reht ie danne, von dem wir rehtlos gelassen sient, anderswa suchen sullen vnd mugen, da es danne billich vnd muglich ist, ân alle geuarde. Vnd des alles ze offem warem vrkunde vnd stater sicherhait aller der vorgeschribenen dinge vnd vergicht so han ich Eglolf Odenhofer da vor genant min aigen insigel fur mich gehenkt an disen brief, vnd won ich die obgenant Adelhait Odenhoferin aigens insigels niht han, so han ich erbetten den wolbeschaidenn Cunrat Jochler ab der Hub¹ och burger ze sant Gallen, daz er sin insigel fur mich gehenkt hat an disen brief, vnder des selben insigel ich mich willeklich gebunden han, des och ich obgenanter Cunrat Jochler offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten zinstag vor sant Laurencien tag in dem jar, do von Cristus geburt warent druzehenhundert jar, nunzig jar vnd darnach in dem sibenden jare.