Ich^a) Beringer von Landenberg von Grifense sesshaft ze Sunnenberg wilent Rudis salgen von Landenberg von Grifense¹ L elicher sun vergich vnd tun kund allermenglichem mit disem brief, daz fur mich kam ze Sunnenberg² vff miner vesti der L beschaiden Claus Tuchler ab der Wis³ vsser Turtal⁴ wilent Cuni Tuchlers salgen elicher sun vnd offnot vor mir L vnd sprach, daz der ietzgenant Cuni Tuchler sin vatter salig von mir zu lehen gehebt hetti ainen akker im inuang, der da stosset an Burgis Tuchlers sines vettern gut, item den akker halben im bongarten, item den akker halben in der schwendi, item ainen sehstentail des akkers in der hindren wis, den man nempt des Schmids akker⁵, item ainen sehsten tail des akkers in dem sor, den man nempt des Schmids akker, item den akker vff dem Lo⁶, vnd hetti och darzu derselb sin vatter salig vnd der obgenant Burgi Tuchler sin vetter gemainlich von mir ze lehen gehebt den akker in der Lowin⁷ am berg, der da stosset an Hermans ab der Wis akker, vnd batt mich derselb Claus Tuchler ernstlich, daz ich dise vorgeschribnen akker mit den tailen vnd rechtungen, so sin vatter salig dar an gehebt hat, lihen wolti im demselben Clausen Tuchler zu sinen vnd zu Vlis, Cunis, Johansen vnd Hainis siner elichen bruder handen, dar vmb erhort ich sin ernstlich bett vnd lech do ze stett wissentklich vnd wolbedaht vnd lich och redlich vnd recht mit disem brief dem ietzgenanten Clausen Tuchler zu sinen vnd zu der egenanten siner bruder handen den obgenanten akker im inuang an der obren wis, den akker halben im bongarten, den akker halben in der schwendi, ainen sehstentail des akkers in der hindren wis, ainen sehstentail des akkers in dem sor mit allen rechten nutzen gewonhaiten vnd zugehorden, alz der obgenant sin vatter salig die inne gehebt vnd vntz an sinen tot braht hett, ze rechtem lehen vnd in lehens wis an geuard, vnd han och demselben Clausen Tuchler vnd Burgin Tuchler sinem vetter baiden gemainlich ze lehen vnd ze gemaind gelihen den obgenanten akker in der Lowi mit aller siner zugehord an geuard. Dar zu han ich och demselben Clausen Tuchler zu sinen und siner obgenanten bruder handen gelihen, waz ich inen von rechtes wegen lihen solt an dem obgenanten akker vff dem Lo gelegen, doch also, wenn derselb Claus Tuchler abgestirbet, daz dann dar nach allweg der eltost vnder sinen brudern die vorgeschriben lehen von mir oder minen erben enpfahen sol nach lehens recht an geuard. Des alles ze warem vrkund so han ich min insigel gehenkt an disen brief. Der geben ist an vnser lieben frowen aubent ze mittem ogsten, do man zalt von Cristi geburt druzehenhundert vnd nuntzig iar, dar nach in dem sibenden jar.