Ich^a) Hans der jung Ladergerw burger ze Lindow¹ tun kund fur mich vnd all min erben vnd vergich offenlich mitt disem brief allen den, die in an sehend lesend oder horend lesen, L daz ich mitt gutem willen vnd mitt wolbedachtem sinn vnd mut dem erbern Hainrichen Linden burger ze Wangen² vnd allen sinen erben mitt disem brief yetzo recht vnd redlich L ains staten ewigen kouffez recht vnd redlich verkouft vnd ze kouffend geben han den hoff ze Nydren Wangen³, der Schowburgs was vnd der Jaken Herdagens waltlehen ist vnd L der jarlich gilt vnd gelten sol ain pfund vnd fier schilling guter Kostentzer pfenning oder ander munss, die denn jarlich da fur geng vnd gab ist, der selben pfenning ain schilling pfenning gwint vnd verlurt, daz egenant gut war in nitt richt vff sant Martis tag nauch waltlehens recht vnd sechs schoffel habern Wanger mess sechz hunr vnd hundert aiger, vnd wenn daz eltost vff dem gut stirbt vnd von todz wegen ab gaut, daz wirt haisset vnd ist, von dem sol man in der drissigost ze tod vall richten vnd geben dem egenanten Linden vnd sinen erben ain halb pfund pfeffer, geschah daz nitt, alz bald denn die drissigost fur wirt, so ist dem egenanten Linden vnd sinen erben daz egenant gut mitt aller zugehord denn verfallen vnd ledig vnd loss worden nauch waltlehens recht. War ouch daz egenant gut inne haut, der sol dem egenanten Linden vnd sinen erben den vorbenempten jarlichen zinss pfenning vnd korn jarlich richten vnd bezalen zwischen sant Martis tag vnd wihennechten vnd antwurten ain mil wegz von dem gut, wa hin sy allergernost wend, an allen iren schaden, vnd sol ouch daz selb gut niessen berenden bomen vnd dem gezimber an schaden, vnd also sol ouch der egenant Lind vnd all sin erben den vorgeschribnen jarlichen zinss vnd gelt vnd die vorbenempten recht vss dem egenanten gut mitt aller zugehord nu furbas ewenklichen ymmer mer geruwklich niessen inne han vnd han alz ander ir aigen gut an min vnd miner erben vnd allermenglichz von vnser wegen irrung ansprauch vnd widerred, won ouch daz egenant gut vnd die vorbenempten zins vnd gelt lehen sind von dem erwirdigen dem gotzhuss ze sant Gallen, so han ich die mitt der lehenschaft in dez egenanten Hainrichz Linden vnd siner erben hand vnd gwalt braucht, wie recht ist, dar vmb er mir also bar gegeben vnd gar vnd gentzlich gewert vnd bezalt haut fiertzig pfund guter Kostentzer pfenning, vnd also sullen ich vnd min erben dez egenanten Linden vnd siner erben vff den vorgeschribnen kouff ir recht gweren sin nauch lehens recht mitt der beschaidenhait, waz irrung oder ansprauch im oder sinen erben an den vorgeschribnen zinsen vnd rechten beschah oder wider fur mitt dem rechten, vor vnd e sy die inne gehebt ingenomen genossen vnd besessen hettind nauch lehens recht, da sullen ich vnd min erben sy vmb versprechen nauch lehens recht gen allen luten vnd gerichten gaistlichen vnd weltlichen, wa vnd wenn vnd wie dik sy dez bedorfend, vnd ouch gar vnd gentzlich ane allen iren schaden. Tatind wir dez nitt vnd mustind sy sich selb dar vmb versprechen, wie sy denn dez selben versprechentz ze schaden komend, den selben schaden allen sullen ich vnd min erben inen vssrichten vnd ab tun an allen iren schaden, vnd sol vns da vor nitt schirmen weder gaistlich noch weltlich gericht noch gemainlich dehain sach. Vnd dez alles ze waurem vnd offnem vrkund so han ich egenanter Ledergerw min aigen insigel fur mich vnd all min erben offenlich gehenkt an disen brief, dar zu han ich gebetten den erbern Jaken den Maiger stattamman ze Lindow⁴, daz er sin aigen insigel im selb an schaden ze ainer waren gezugnuss aller vorgeschribnen sach ouch offenlich gehenkt haut an disen brief. Geben am nechsten zinstag vor aller hailigen tag nauch Cristi geburt drutzehenhundert vnd im siben vnd nuntzigosten jar.