Wir^a) dis nachgenempten Rudger vnd Johans Hartzer Vlrich Hartzers salgen elichen sun gebruder vnd Rudolf Hartzer Rudger vnd Johansen vetter vnd L rechter vogt tunt kund vnd veriehen offenlich mit disem brief fur vns vnd fur alle vnser erben, alz wir von dem hochwirdigen fursten Cunen von gottes L gnaden abt vnd dem cappitel gemainlich des gotzhus ze sant Gallen¹ sant Benedicten ordens in Costentzer bystum vnsern gnadigen herren ains rechten L redlichen vngeuarlichen ewigen vnwiderruflichen kôfs gekôft haben hundert vnd zwaintzig pfund guter vnd Ytaliger haller, die geng vnd gab sient, war aber, daz haller verruft abgesetzt vnd vnwerd wurdin, so sol man vns weren vnd vssrichten souil geltz mit der muns, die dann fur haller geng vnd gab ist vnd dar mit ain kôfman den andern ze Costentz in der statt alzuil geltz geweren vnd bezaln mag, ze rechtem zins vnd iarlichem ewigem gelt ab vnd vsser allen iren vnd ires gotzhus nutzen, die si ze Appentzell² in dem land hând, es sye von sturen von zinsen ald von zehenden, mit dem gedingd vnd mit der beschaidenhait, daz dieselben obgenanten abt Cun vnd daz cappitel vns oder vnsren erben, ob wir enwarent, dz vorgenant iarlich gelt von den vorgenanten nutzen vnd dar vzz nu hinnan hin iarlichen ân alle minrung ân allen furzug vnd ân allen vnsern schaden je daz halbtail sehtzig pfund haller der muns, alz vorgeschriben stat, vff vnser frowen tag ze der liehtmizz vnd daz ander halbtail ôch sehtzig pfund haller derselben muns vff sant Johans tag des Tôffers ze sunnwendi geben vnd richten sullent, vnd sollent nu ze vnser frowen tag ze der liehtmezz, der schierost kumpt, dz erst iarlich gelt sehtzig pfund haller der egedahten muns anfahen richten vnd vff den nahsten sant Johans tag des Tôffers ze sunnwendi dz ander gelt ôch die sehtzig pfund haller, alz vorgenant stât, also iarlichen richten vnd geben vnd vff dieselben zwai zil dehaines iares dar wider nut ze wort haben, vnd hânt vns ôch dar vff angulten vnd burgen geben, alz der koffbrief wiset, den wir von den obgenanten vnsern gnadigen herren abt Cunen vnd dem cappitel des gotzhus ze sant Gallen iren angulten vnd burgen versigelt inne habent, tun wir allermenglichem ze wissent mit disem brief fur vns vnd fur alle vnser erben, die wir vestenklich her zu bindent, daz wir dem obgenanten abt Cunen dem cappitel iro nachkomen vnd dem gotzhus ze sant Gallen von fryem willen die fruntschaft gutlichi vnd gnad getân haben vnd in ôch tunt mit disem brief fur vns vnd all vnser erben, daz si vnd ir nachkomen daz vorgenant iarlich gelt die hundert vnd zwaintzig pfund haller, alz vorgeschriben stât, mit ahtzehen hundert pfund hallern derselben muntz, alz vorgeschriben stât, vollen vnd gantzen gewalt hânt von vns vnsren erben, ob wir enwarin, wider zelosen vnd ze wider kôffen, alz hie nach geschriben stât. Daz ist also, wenn oder welhes iares vns oder vnsren erben dieselben egenanten vnser gnadiger herr abt Cun oder sin nachkomen ermanent mit botten oder mit briefen vnd vns gebent sament vnd mit ainander die vorgenanten ahtzehen hundert pfund haller der muns, alz vor beschaiden ist, vor dem vorgenanten vnser frowen tag ze der liehtmezz oder vor dem egenanten sant Johans tag des Tôffers ze sunnwendi, so sont dannanhin demselben vnserm herren abt Cunen sinen nachkomen vnd dem gotzhus ze sant Gallen die vorgenanten hundert vnd zwaintzig pfund haller iarliches vnd ewiges geltz ab vnd vsser allen iren vnd ir gotzhuses nutzen ze Appentzell, es sye an sturen an zinsen oder an zehenden, von vns vnd allen vnsren erben gantzlich vnd gar ledyg vnd los sin, es war dann, ob vns dehain iarlich gelt geuallen war, so si widerkôffen woltent, daz sont si vns mit dem widerkôff geben, vnd wenn si ôch also widerkôffen went, dz sont si tun zu vnsrer oder vnsrer erben handen ze Costentz in der statt oder zwo mil wegs von Costentz, war wir went, fur âht fur bann vnd fur allermenglichs verbieten vnd heften vnd dar an noch dar zu niemermer sprechen noch ansprâch haben, vnd sollent ôch wir vnd vnser erben von inen daz vorgenant gelt vnd den widerkôf enpfahen vnd nemen vnd vns des nut sperren noch dawider sprechen noch daz in dehainen weg verziehen, ân all geuard. War aber, dz wir oder vnser erben den selben widerkôff vnd losung, alz vorgeschriben stât, von dem dikgenanten vnserm herren abt Cunen sinen nachkomen ald von iren botten in der mâzz vnd vor den ziln, alz vor beschaiden ist, von inen nit enpfiengent vnd namin, so hât derselb vnser gnadiger herr abt Cun sin nachkomen vnd ir botten vollen vnd gantzen gewalt, daz si die obgenanten ahtzehenhundert pfund haller, dar mit si dann losen went, alz vorgeschriben stât, legen sollent vnd mugent gen Costentz in die muns oder gen Winterthur³ in die muntz, in weder der zwayer stett si wellent, zu vnsren vnd vnsrer erben handen, vns dar mit ze wartent, vnd sol dar mit die vorgeschribnen hundert vnd zwaintzig pfund haller iarlichs zins demselben vnserm gnadigen herren abt Cunen sinen nachkomen vnd dem vorgenanten gotzhus ze sant Gallen ledig sin von vns vnd allen vnsren erben. Vnd sont ôch dar zu wir vnd vnser erben dannanhin den hoptbrief, den wir vmb dasselb iarlich gelt von den obgenanten vnsern herren abt Cunen vnd dem cappitel des vorgenanten gotzhus vnd iren angulten vnd iro burgen versigelt inne hânt, demselben vnserm herren abt Cunen sinen nachkomen vnd dem gotzhus wider zu iren handen antwurten vnd ingeben bi den truwen, die wir inen in aides wîs dar vmb gelobt haben. War aber, daz wir oder vnser erben, ob wir enwarent, daz nit also tatent, so solti doch derselb koffbrief dannan hin iemermer vnd eweklich vns vnd allen vnsren erben gentzlich vnd gar ab tod vnnutz vnd vnkreftig sin allenthalben, wa wir den fürbuttin oder zogtin an gaistlichem vnd an weltlichem gericht ald anderswa vssrent gerichten, wa daz war nut vssgenomen, vnd solti dem obgenanten vnserm gnadigen herren abt Cun dem cappittel vnd iren nachkomen vnd dem vorgenanten gotzhus ze sant Gallen vnd iren angulten vnd dero erben vnd och den burgen niemermer dehainen schaden bringen in dehainen weg, won daz si alleklich gantzlich vnd gar von der gelubt vnd verhaissentz wegen, alz si sich in demselben brief verschriben vnd verbunden hânt, von vns vnd vnsren erben mit disem brief gantzlich vnd gar ledig lôs vnd quit sollent sin ân alles vnser widersprechen. Vnd des alles ze warem vnd offnem vrkund vnd stater sicherhait aller vorgeschriben ding vnd gedingde hân ich Rudolf Hartzer da obgenant fur die obgenanten Rudgern vnd Johansen die Hartzer min vettern vnd der rechter vogt ich bin vnd fur alle ir erben vnd ôch fur alle min erben in vogts namen min aigen insigel offenlich gehenkt an disen brief, won dieselben min vettern aigner insigel nit hânt. Dar zu hân ich an derselben miner vettern statt vnd ôch von min selbs wegen erbetten die fromen wisen Hainrichen Schilter vnd Lutfrid im Turn baid burger ze Costentz min vnd miner vettern lieben frund, daz si ze ainer zugnust vnd merer sicherhait aller vorgeschribnen ding vnd vergicht iru aignen insigel zu minem insigel offenlich gehenkt hânt an disen brief, des ôch wir dieselben Hainrich Schilter vnd Lutfrid im Turn veriehent, daz wir von ernstlicher bett wegen Rudolfs Hartzers vnd ôch siner egenanten vettern bett wegen vnser lieben frund ze ainer zugnust vnd merer sicherhait aller vorgeschribnen ding habent och vnsri aigni insigel offenlich gehenkt an disen brief, vns vnd allen vnsren erben gantzlich vnschadlich. Der geben ist ze Costentz in der statt des iares, do man zalt von Cristi geburt druzehenhundert vnd nuntzig iar, dar^b) in dem sibenden jar an dem nahsten zinstag vor sant Andres des hailgen zwelfbotten tag.