Ich^a) Hans vom Land ain schuchmacher burger ze Veltkilch² bekenn vergich vnd tun kund allermanglichem mit disem offenn L brief, das ich gesundes lybes vnd mutes mit guter williger vorbetrachtung ze den zyten vnd tagen, do ich es mit L dem rechten fur mich vnd all min erben wol kreffteklich getun mocht, sunderlich mit des frommen wolbeschaiLdenn mans Hainrichs Bachlis des stattammans hand ze Veltkilch³ recht vnd redlich verkofft vnd ze koffent geben hab ains bestaten vngevârlichen ewigen koffs vnd fur recht ledig vnuerkumbert aigen gut minem lieben schweher Vlin Gumel dem schuchmacher burger ze Veltkilch vnd miner lieben schwiger Agnesen siner elicher wirtinn vnd iro baider erben vnd nachkomenn minen ledigen aigenn wingarten mitenander, der an Suldner⁴ berg in Rankwyller⁵ kilchspel zwuschent Cuntzen Brochsers vnd Hannis Tôwers wingarten gelegen vnd von allermanglichem gantzlich ledig lôs vnd vnuerkumbert ist, vnd vffwert stôsset an ammans Stokklis⁶ vnd och an Wilhelms Ammans wingarten vnd abwert an Margarethen Mullerinen gut, mit grund mit grât mit reban holtz vnd veld mit wasen mit zwy mit gestud mit gebom wildem vnd zamem vnd schlechteklich mit allen rechten nutzzen fruchten guten gewonhaiten ehafftinen vnd zugehorden benempten vnd vnbenempten, vnd ist das ewig min redlich verkoffen vnd hingeben des selben mins ledigen aignen wingarten alsuss geschehen vmb funftzig phund vnd vmb vier phund alles guter genamer phenning Costentzer munss, dero ich allersament nutzzlich vnd ôch gar vnd gantzlich nâch minem willen an barem gelt von dem obgenanten minem schweher Vlin Gumel vnd von Agnesen siner elicher wirtinn gewert vnd bezalt bin mit dem geding, das ich vnd all min erben des ewigen redlichen kôffs vnd namlich aller hie vorgeschribner ding vmb den selben minn aigenn wingarten mit aller zugehorung vnd rechtung, als vor ist beschaiden, iro baider vnd iro erben vnd nachkomenn gut vnd getruw wern sin sond nâch recht, wâ vnd geben wem su des an gaistlichem vnd an weltlichem gericht iemer bedurffent ald notdurfftig werdent, mit guten truwen an all widerred vnd gevard. Vnd des alles ze wârem offem vrkunde vnd stater fester sicherh(ait) nv vnd hienâch so hab ich inen baidensament vnd allen iren erben vnd nachkomenn disen brief hiervber ernstlich gebetten besigeln mit der statt insigel ze Veltkilch, darvnder ich mich vnd all min erben willeklich vnd festeklich verbunden hab vnd bind des obgedachten mins ewigen verkôffens vnd namlich aller hie vorgeschribner ding mit krafft vnd vrkunde dis offenn briefs, das selb der statt insigel ich vorgenanter stattamman Hainrich Bachli durch des obgenanten Hansen vom Land ernstlicher vergicht vnd bett willen nach der burger rat ze ainer wâren gezuggnuss vnd festen bestatnuss des obgeschribnen sines ewigen verkoffens, won er das alsuss mit miner hand vnd mit allen andren sachen worten werkken entzihen vnd vffgeben getân vnd vollfurt hat, das es ze recht wol krafft vnd macht haben vnd fest vnd stat belyben sol nv vnd hienâch in der wyse vnd mainung, als da vorgeschriben vnd beschaiden ist, an all gevard, gehenkt hab an disen brief. Der ze Veltkilch geben ward des jâres, do man zalt von Crists geburte druzehenhundert vnd im sibenden vnd nuntzgosten jâr, an sant Lucyen tag der hailgen magt.