Wir^a) die burgermaister rat zunftmaister vnd all burger gemainlich rich vnd arm diser nachgeschribenn dez hailigen Romischen richs stett mit namen Costentz, Rauenspurg¹, L Lyndow², sant Gallen, Wangen³ vnd Buchorn⁴, die den pund mit ainander halten vmb den Sew⁵, veriehen offenlich vnd tund kunt allermenglich mit disem brief von der zwayung crieg L vordrung zuspruch misshellung vnd stozz wegen, so der erwirdig herr maister Hans Tunnibach kilcherr ze Bladingen⁶ mit den erbern gaistlichen herren dem abt mit dem conuendt L dez gotzhus ze Salmenswiler⁷ vnd ouch mit vns biz her gehept hat, darumb er vns ouch lang zit in dem hof ze Rom mit gerichten bekumbert vffgetriben vnd ze grossem barlichem kosten vnd schaden braucht hat, der selben misshellung vnd stozz sich aber vnser hailiger vatter bapst Bonifatius der nund durch fridez willen vnderwunden gnadenclich zu sinen handen gezogen vnd vns mit dem vorgenanten maister Hansen Tunnibach fruntlich berricht uber ain braucht vnd die selben crieg vnd stozz zwischen vns gentzlich abgeleit vnd geschlicht hat in aller der wis vnd mauß, als hienach aigenlich mit worten begriffen vnd geschriben staut. Dem ist also, das alle die gericht processen pullan brief vnd vrtailan, so der vorgenant maister Hans Tunnibach oder yeman von sinen wegen daselbz in dem hof ze Rom wider vns die vorgenanten stett all gemainlich oder wider dehain besunder oder wider dehainen der vnsern ye erclegt erworben erlangt ald vf vns behept hett, gentzlich vnd gar tod ab creftlozz vnd vernicht sin sond vnd vns noch den vorgenanten vnsern stetten gemainlich noch besunder dehainen vnsern luten frowen noch mannen nu hinnanhin dehainen schaden noch gebresten bringen in dehain wis. Ouch ist in der selben richtung bedingdt worden, das wir dem vorgenanten maister Hansen Tunnibach ze end siner wil jerlichen ze rechtem lipding richten vnd weren sond hundert guldin, als daz der lipdingbrief aigenlich wiset vnd seit, dar darumb geben vnd geschriben ist. Vnd wan disu richtung vnd sun mit vnserm gunst wissend vnd willen vollgangen beschechen vnd vollfurt ist, darumb so haben wir all gemainlich vnd vnser yeglicher besunder mit gutem frigem willen vnbetwungenlich vnd mit wolbedachtem sinn vnd mut haftenclich verhaissen vnd gelopt bi den aiden, so wir dem hailigen Romischen rich vnd ouch den vorgenanten vnsern stetten gesworn haben, also daz wir noch vnser erben vnd nachkomen vnd besunder nyeman von vnsern wegen nu furbazz hin den vorgenanten maister Hansen Tunnibach noch nyeman andre, der im in der sach hilfflich gewesen ist, von der vorgedachten misshellung vnd stozz wegen vnd ouch von dez grossen kosten vnd schaden wegen, so er vf vns getriben hat, wie oder in welher wis sich daz biz her gefugt ald erhept hat, nymmer me geuehen bekumbern noch bekrenken sullen noch wellen noch die selben sach gen im nymmer me geauern gerechen noch gemelden mit worten noch mit werchen daz schaffen getan haimlich noch offenlich mit dehainen gerichten gaistlichen noch weltlichen noch ane gericht vnd besunder mit dehainen andern sachen ane geuerd, vnd sullen ouch vmb all verlouffen sachen sin gut frund haissen vnd sin vnd ain gantz luter fruntschaft sun vnd richtung mit im getruwlich halten vnd haben ane geuerd. Der selb maister Hans Tunnibach mag ouch in die vorgenanten vnser stett all gemainlich vnd in jeglich besunder wandlen werben ritten vnd gan, als dik er wil, vnd ouch darinn wonhaft vnd husshablich sitzen, in welher er wil, vnd da sullen wir denn tugentlich mit im leben als mit andren den vnsern vngeuarlich. Mit vrkund diz briefz, daran wir vnser^b) stett insigel offenlich gehenkt haben. Geben dez jars, do man zalt von Cristus geburt druzehenhundert jar vnd darnach in dem siben vnd nuntzigistem jar.