Wir^a Fridreich von gots gnaden herczog ze Osterr(eic^h ze Steyr ze Kernden vnd ze Krain graf ze Tyrol¹ etc. bekennen, als wir||
nach rat vnserr ret vnd lieben getrewen fur vns vnd den hochgeboren fursten herczog Leuppolten herczogen ze Osterreich² etc.||
vnsern lieben pruder zu den erbern vnd weisen vnsern lieben besundern .. dem burgermaister reten zunftmaistern vnd purgern||
gemainleich des heiligen reichs statt Costencz mit vnsern lannden Turgow³ Ergow⁴ Swaben⁵ vnd Kurwalhen⁶ veraynt vnd verpunden haben hinnenhin vncz auf sant Jorgen tag nechstkumftigen vnd darnach fumf gancze jar die nechsten nacheinander nach des puntbriefs lautt vnd sag, den wir in daruber besigelt vnd gegeben haben, vnd wan wir in demselben punt vnd puntbrief aussgenomen vnd aussgeseczt haben den allerdurchleuchtigisten fursten vnsern lieben herren vnd vatter hern Rupprechten Romischen kunig zu allen zeiten merern des reichs, noch denn so haben wir mit wolbedachtem mut vber dasselb aussnemen den obgenanten von Costencz versprochen vnd verhaissen, wer es, daz der egenant vnser herr vnd vatter .. der Romisch kunig oder yemandt von seinen wegen in zeit derselben veraynung mit denselben von Costencz zu schaffen gewunne oder haben wolte, es wer, daz er oder yemandt anderer von seinen wegen si treiben oder drengen welt von freyhaiten rechten oder guten gwonhaiten saczungen gaben oder anders an si vorderte mutet begert oder haben wolt denn si von alter herkomen sind, daz wir denne demselben vnserm herren .. dem Romischen kunig wider si nicht sullen beholffen sein in dhaynerlay weis an geuerde, sunder sullen wir vnd all vnser stett gesloss vnd vesten all vnser herren ritter vnd knecht in den vorgenanten kraissen vnd lannden gesessen darunder genczlich still siczen ane allen argen list. Auch sullent in darunder auss vnsern stetten kost zugeen vnd si daran nicht hindern noch si vnd die iren in kain ander weg die obgenant zeit gar auss nicht vssern noch schuhen von dhaynerlay stukch oder sach wegen an all geuerd. Als wir denn in demselben vorgenanten punt vnd puntbrief aber aussgenomen vnd aussgeseczt haben die wolgeboren vnser lieb oheim .. den marggrafen von Baden⁷, .. den von Wirttemberg⁸, das bistumb vnd cappitel ze Kur⁹ vnd die von Rotwil¹⁰, haben wir den egenanten von Costencz aber versprochen, ob das wer, daz si dieselben gemainleich oder besunder oder yemandt von iren wegen auch von iren freyhaitten rechten oder guten gewonhaiten treiben oder drengen wolt wider glimph oder recht vnd sich darumb von den von Costencz nicht rechtens wolten benugen lassen vor vnserm lantvogt vnd vnsern reten, daz denn wir vnd die vnsern darunder still sullen siczen in aller der weise, als der artikel dauor von vnserm lieben herren vnd vatter .. dem Romischen kunig auch geschriben steet, an all geuerd. Vnd des zu warem vrkund geben wir in disen brief versigelten mit vnserm anhangunden insigel. Der geben ist ze Schafhusen¹¹ an freyttag vor dem sunntag Invocavit in der vasten nach Christs gepurde in dem vierczehen hundertisten vnd dem fumften jare.