Ich^a Nycolaus Blârrer burger ze sant Gallen tun kunt vnd vergich offenlich mit disem brief allen,||
die in sehent oder horent lesen, daz ich mit wolbedahtem mut willeklich vnd vnbezwungenlich offenLlich gesworn han ainen gelerten aide liplich ze got vnd ze den hailigen mit vfgehabenen vingern,||
war daz ich dehainer lay sach stoss oder ansprach zu den burgern gemainlich der statt ze sant Gallen oder zu dehainem burger ald burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die noch da selbs burger werdent vff disen huttigen tag, alz dirre brief ist geben, ze sprechenn hetti oder hie nach iemer ze sprechenn gewunni, das ich noch nieman von minen wegen den selben burgern vnd burgerinen ze sant Gallen ân reht niht tun sullen noch wellen noch schaffen getan. Wolti ald mohti ich aber darumb rehtes nut enbern, daz ich noch nieman andre an miner stat noch von minen wegen die selben burger gemainlich noch dehainen burger noch burgerinen besunder mit dehainen fromden gerihten niht vf triben aischen noch beklagen sont, won daz ich oder min gewissi botschaft daz reht ze sant Gallen in der statt von inen nemen sol vnd wil ân widerred vnd ân alle geuarde, es war dann, daz ich oder min botschaft an miner statt rehtlos gelassen wurdi vnd das och das da kuntlich wurd, so ist mir behalten vnd in dem aid vss gelassen, das ich daz reht ie danne, von dem ich oder min botschaft an miner statt rehtlos gelassen werdent, anderswa suchen sol vnd mag, da ez dann billich vnd muglich ist, ân geuarde. Vrkund diz briefs geben vnd versigelt mit minem aigenn angehenkten insigel an dem nahsten mantag nach mittem maiien in dem jar, do man zalt von Cristus geburt vierzehenhundert jar vnd darnach in dem funften jare.