Ich^a Vlrich Custer von Sant Peters zelle¹ der schumacher tun kunt vnd vergich offenlich mit disem brief allen, die in sehent oder||
horent lesen, alz mich die frômen wisen der burgermaister der rat vnd die burger gemainlich der stat ze sant Gallen gehainmat vnd in||
iro vanknust vnd banden hattent, vmb daz ich etwas wider si getan hatt, das ich nut solt getan han, won aber su mich begnâdot||
hant vnd mich durch erber lut ernstlich bet ledig vnd vss der vanknuss gelassen hant, darumb so han ich willeklich vnd vnbezwungen­lich vngebunden vnd vngefangen mit guter vorbetrahtung offenlich gesworn ainen gelerten aide liplich zu got vnd zu den hailigen mit vfgehabenn vingern, vmb die vorgedahten vanknuss vnd getat der vorgenanten des burgermaisters dez rates vnd aller burger vnd burgerinen gemainlich vnd sunderlich der statt ze sant Gallen vnd mit namen aller dero, wer die sint, die an der selben miner vank­nuss vnd getat schuld gehebt hant hainlich oder offenlich mit raten ald mit getaten ald in dehain wis, luter gantz vnd gut frund ze sinne vnd alle min frund inen darumb ze frund ze gewinnen ân allen furzug vnd die selben vanknust vnd getat niemer ze andenn noch ze aferrenn weder mit gaistlichem noch mit weltlichem geriht noch ân geriht weder mit worten noch mit werken noch in dehain wis noch nieman andre an miner statt noch von minen wegen ân alle geuarde. Ich han och in den vor­ge­dahten aide genomen vnd gesworn, wider die selben burger vnd gemain statt ze sant Gal­len gemainlich noch sunderlich niemer me ze sinne noch ze tunne in dehain wise ân arge list. Beschach och, daz ich vff disen huttigen tag iht ze sprechenn hetti oder hie nach iemer ze sprechenn gewunni zu den burgern gemainlich der statt ze sant Gallen oder zu dehai­nem burger ald burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die hie nach da selbs burger werdent, das darumb min gewisse botschaft an miner statt das reht ze sant Gallen in der statt von inen nemen sol vnd wil ân widerred vnd ân geuarde, ez war dann, das min botschaft an miner statt rehtlos gelassen wurdi vnd daz och das da kuntlich wurdi, so ist mir behalten vnd in dem aid vss gelassen, daz ich das reht ie dann, von dem min botschaft an miner statt rehtlos gelassen wirt, anderswa suchen sol vnd mag, da es dann billich vnd muglich ist, ân geuarde. Beschach aber, das got niht welle, das ich den vorgedahten aide iemer uber furi ald ieman von minen wegen an dehainen vorgeschribenen stuken, so sol ich den selben burgern vnd gemainer statt ze sant Gallen hundert phunt phenning guter vnd genamer Costent­zer munse gantzlich gefallen sin ze gebenn ân alle widerred, vnd han inen vmb daz selb gut zu mir ze merer sicherhait ze rehten wern vnd angulten geben vnd gesetzt die erbern Rudolf Custer minen êlichen bruder, Hugen Egghart vnd Hainrich Krapfen, den man nempt Kobi, baid burger ze Byschoffzelle², die hant alle driie vnuerschaiden­lich gelobt ieklicher besunder mit siner truwe, ob das wari, das ich in des selben gutes verfieli, alz vor ist beschaiden, das si dann alle driie vnuerschaidenlich den selben dem burger­maister dem rat vnd gemainer stat ze sant Gallen die selben hundert phunt phen­ning guter vnd genamer Costentzer munse gantzlich geben weren vnd rihten sont vnd in gebunden sin sont, das selb gut gantzlich ze gebenn vnd vszerihtenn ân allen furzug vnd widerred. War aber, daz ich ald die obgenanten wern vnd angulten inen das selb gut dann niht rihtin vnd gabin vnuerzogenlich bi der ersten vordrung, so hant die selben der burger­maister der rat vnd die burger gemainlich ze sant Gallen vnd iro helffer, wer die sint, friies vrlob vnd vollen gewalt dar nach, wenne su wellen, daz su mich vnd och die obgenanten wern vnd angulten darumb phenden noten heften vnd angriffen sont vnd mugent an vnserm gut ligendem vnd varendem vff dem land in dorffern vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent ald wellent, alz vil vnd alz dik, vntz das si der selben hundert phunt phenning der vorgenanten munse vnd och des schaden, in den su vnd iro helffer von des selben phendens notens heftens vnd angriffens wegen koment, gantzlich gewert vnd vsgeriht werdent. War aber, daz su mich den obgenanten dem burgermaister vnd dem rat ze sant Gallen antwurtin in iro vanknuss vnd band, da su min sicher warin, so soltin dann die obgenanten angulten vnd wern vmb die vorgedahten gult vnd werschaft gantzlich ledig sin vnd los, vnd sol mich noch min erben noch die obgenanten wern vnd angulten noch vnser gut hie vor noch hie wider niht schirmen noch gut sin enkainer lay sach behelf noch furzug, so ieman vsziehen oder erdenken kan in dehain wis. Ich han och in den vorgenanten aid genomen vnd gesworn, den vorgenanten wern vnd angulten iren schaden gantzlich ab ze tunne, in den su koment von der vorgenanten gult vnd werschaft wegen, vnd hant darumb och gewalt, mich vnd min erben an ze griffenn vnd ze notenn ze gelicher wise vnd in den rehten als die obgenanten burger, vntz in iro schad gantzlich abgelait vnd bezalt wirt. Vber diz alles han ich vorgenanter Vlrich Custer mich des willeklich gebunden also, wari, da vor got sie, das ich ald ieman von minen wegen die vorgenanten vank­nust vnd getat iemer andoti oder vberfuri ald aferti in dehain wis vnd den vorgenanten ­aide iemer uber sahi vnd vberfuri mit dehainen sachen, wenn oder wa daz beschach, das danne der burgermaister der rat vnd die burger gemainlich ze sant Gallen vnd iro ieklicher besunder vnd alle iro helffer mich an griffen hainmen vnd vahen sont vnd mugen ân alles reht ân klag vnd ân zorn vff dem land in dorffern vnd in den stetten ald wa su mich an komen oder ergriffen mugent, vnd daz su mich dann fur ­ainen schadlichen verschulten vertailten verzalten man verderben vnd von dem lib tun sont vnd mugent ân alles reht vnd ân vrtail, vnd sol mich da vor niht schirmen, alz vor ist beschaiden, won ich mich mit namen verzigen han aller helf aller gnâden alles vszugs alles schirmes vnd alles des, da mit ich mich wider die vor­genanten sachen vnd buntnust iemer gesetzen ald da wider geredan ald gewerben kundi oder mohti in dehain wis. Vnd des alles ze offem warem vrkunde so han ich Vlrich Custer da vorgenant erbetten den erbern Cvnrat Buttenbach burger ze sant Gallen, daz er sin insigel fur mich gehenkt hat an disen brief, vnder des insigel ich mich in dirre sache willeklich gebunden han, won ich aigens insigels niht han, des och ich obgenanter Cunrat Butten­bach mir vnd minen erben ân schaden vergich an disem brief. Darnach veriehent wir die obgenanten wern vnd angulten Rudolf Custer, Hugo Egghart vnd Hainrich Krâpf ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so han ich Hugo Egghart da vorgenant och min aigen insigel offenlich gehenkt an disen brief, vnd won wir die obgenanten Rudolf Custer vnd Hainrich Krâpf aigener insigel niht haben, so haben wir erbetten den ersamen Hugen Bilgrin och burger ze Byschoffzell, daz er sin insigel fur vns gehenkt hat an disen brief, vnder des insigel wir vns in diser sach willeklich gebunden haben, des och ich obgenanter Hug Bilgri mir vnd minen erben ân schaden vergich an disem brief. Der geben ist ze sant Gallen an dem nahsten zinstag vor vnsers herren vffart tag in dem jar, do man zalt von Cristus geburt vierzehenhundert jar vnd darnach in dem funften jare.