Ich^a Wilhalm von Ende¹ der elter ain friger herre vergich offenlich vnd tun kunt mit disem brief allen,||
die in ansehend oder horent lesen, als ich der fursichtigen vnd wisen der ainliff stette gemainlich||
des bundes vmb den Se vnd im Allgow mit andren weren rechter were worden bin vmb die zway tusend||
guter alter Rinischer guldin, so in der frome vnd veste herr Marquart von Emptz ritter schuldig ist vnd gelten sol, als das der houptbrief, so si von vns besigelt inne hand, aigenlicher wol wiset vnd sait, vnd alz ettlicher insigel, die in dem egenanten brief verschriben sind, daran nit komen sind, mit namen herr Mar¬quartz von Schellenbergs ritters, Albrechtz von Landenbergs vnd Rudolfs von Lan¬denbergs, die das verrett vnd verschworn hand, vnd Rudolfs von Rosenbergs von Ber¬nang, der laider nuwlichs, vor vnd e im der egenant brief geantwurt wurd, tode vnd erschlagen ist, das sin insigel daran nit komen mag, bekenn ich fur mich vnd fur min erben mit disem brieff, das daz den egenanten stetten an der egenanten sum schuld vnd gult noch dem obgenanten irem houptbrieff, den si darumb von mir vnd von andren weren besigelt hand, gen mir noch gen minen erben dehainen schaden bringen sol, vnd ensol der selb houptbrieff darumb nutzit dester vnkreftiger sin in kainen wege, wan das er allweg als kreftig nutzz vnd gute sin sol zu aller notdurft an allen stetten vnd gerichten, als ob du selben insigel ellu daran komen vnd gehenket werint. Vnd verzich mich och darumb vnd dafur vnd dawider alles rechten aller fund vszuge vnd gefarden vnd das ich vnd min erben den egenanten stetten vmb die obgenanten zway tusend guldin vnd dem obgenanten irem hoptbrief gelich als gnug tun sullen vnd wellen an allen stuken vnd artikeln, so daran verschriben stat, als ob der selb brief gantz versigelt were, bi dem aide, so ich darumb gesworn han nach des selben irs hoptbriefs lute vnd sage. Vnd des ze vrkund der warhait so han ich min aigen insigel fur mich vnd fur min erben offenlich gehenkt an disen brieff. Der geben ist am nechsten mentag nach sant Vlrichs tag nach Cristy geburte viertzenhundert jar, darnach in dem funfften jar.