Allen^a den, die disen brief ansehent oder horent lesen, kund ich Johans Honburger ze disen ziten vogt der statt ze Rapreschwil¹ vnd vergich offenlich||
mit disem brief, daz fur mich kamenn fur offenn gericht junkherr Heinrich von Wilberg² vnd fro Gepa Gielin³ sin schwoster an offner fryer strasse||
ze einem teil vnd Herman Kolomotz ze dem andern teil, vnd offnoten die vorgenanten junkherr Heinrich von Wilberg vnd Gepa sin schwoster mit ir fursprechen,||
daz sy beidu gemeinlich vnd vnuerscheidenlich fur sich vnd ir erben dem obgenanten Herman Kolomotzen vnd sinen erben recht vnd redlich ze koffenn geben habind den zehenden ze Altorff⁴, den man nempt der Schlatter, mit allen rechten vnd zugehorden, als er von ir vordern an sy komen vnd bracht ware, fur ledig eigen vmb zwei hundert vnd sechstzig guldin guter vnd gaber an gold vnd an gewicht, die sy von dem selben Herman Kolomotzen enpfangen vnd in ir guten nutz bewendet haben, als sy vor gericht veriachen. Vnd nach diser offnung fertgoten die selben Heinrich von Wilberg vnd Gepa sin schwoster dem vorgenanten Herman Kolomotzen den vorgeschriben zehenden mit aller zugehord fur ledig eigen vnd entzigent sich daran fur sich vnd ir erben aller vordrung vnd ansprach vnd lopten beidu vnuerscheidenlich mit guten truwen fur sich vnd ir erben, dis koffs vnd des vorgeschriben zehenden also wern vnd troster ze sin fur ledig eigen als vil vnd als lang, vntz daz der vorgenant Herman Kolomotz oder sin erben daran habend sind vnd daz sy ein gewêr dabi schirmet nach gewonheit vnd recht des landes, an ir schaden vngeuarlich. Vnd sunderlich mit der bescheidenheit, ware daz nu oder hienach ieman den vorgeschriben zehenden ansprache vnd den vorgenanten Herman Kolomotzen oder sin erben daran sumpti oder in dehein weg bekumberti mit geischlichen oder weltlichen gerichten ald an gericht, so soltind die vorgenanten Heinrich von Wilberg vnd Gepa sin schwoster oder ir erben den selben Herman Kolomotzen oder sin erben darumb verstan vnd versprechen vnd den vorgeschriben zehenden entrichen ledig vnd lôs vnd ansprachig^b machen von aller manglich, es ware von gemeind von geteiles von lehenschafft von vogtrecht oder von zins von selgerat von pfandung ald von ander sach wegen vngeuarlich. Vnd wie oder in welen weg der selb Herman Kolomotz oder sin erben des ze schaden kamind, den schaden allen soltind inen der vorgenant Heinrich von Wilberg vnd Gepa sin schwoster oder ir erben gantzlich ablegen vnd widerkeren an ir schaden, vnd mohtin darumb der vorbenempt Herman Kolomotz oder sin erben vnd ir helffer der selben Heinrichs von Wilberg vnd Gepen siner schwoster oder ir erben ligend vnd varend gut in stetten vnd vff dem land angriffen mit gericht oder an gericht, wie es inen fugklich ware, als ferr vnd als vil, vntz daz der vorgenant zehend entrichen ledig vnd lôs wurde vnd daz inen aller ir schad abgeleit vnd widerkert wurde in der sach, als dik daz ze schulden kame, an geuerd, vnd solte denn die selben Heinrich von Wilberg, Gepen sin schwoster ir erben noch ir gut dauor nit schirmen kein geischlich noch weltlich gnad gericht fryheit noch recht kein stettrecht burgrecht lantzrecht noch hofrecht vnd mit namen kein ander sach vngeuarlich, vnd beschach dis alles also an des gerichtz stab mit allen den worten vnd werchen, so darzu hort vnd notdurfftig waz vnd als gericht vnd vrteil gab, daz es billich krafft vnd macht hette nu vnd hienach. Vnd des alles ze warem vrkund han ich der obgenant vogt min eigen insigel von des gerichtz vnd von beider teil bett wegen mir vnd minen erben vnschadlich offenlich gehenkt an disen brief. Darzu haben wir vorbenempten Heinrich von Wilberg vnd Gepa sin schwoster vnser ietwedras sin eigen insigel offenlich gehenkt an disen brief. Der geben ist an dem nachsten zinstag nach sant Vlrichs tag nach Crists geburt vierzehen hundert jar, darnach in dem funften jare.