Wir^a Johans lantgraue zu dem Leutemberg vnd graue zu Hals embieten dem ersamen in got vatter hern Conraten||
abbt vnd dem conuente gemeinlich des closters zu sant Gallen¹ vnsern grusz vnd alles gut vnd tun uch kunt mit disem brief,||
das wir an stat des allerdurchluchtigisten fursten vnd heren hern Ruprechts von gotes gnaden Romischen kungs zu allen ziten||
merers des richs vnd von sins gebottes wegen sin vnd des heiligen richs hofgerichte besessen haben zu Amberg vf disen tag, als diser brief gegeben ist, vnd das Heinrich Walther von Ramswag die hofe zu Geygelmar, zu Wernczenberg, zu Baldewille, zu Vneke, zu Sweinberg, zu Vtzwille vnd die frienlute daselbs vnd nemlich die frienlute derselben geliche vnd ouch alles, das in vnd zu denselben hofen gehorend ist, besuchcz vnd vnbesuchts, vor vns an dem egenanten hofgerichte vf ein genant summe drihundert marke silbers minner oder mere erclagt erlanget vnd eruolget hat vnd der ouch in nuczlich gewere geseczet ist, als reht ist, als das soliche eruolgsbrieue doruber gegeben eigentlicher vszwisen. Dorumb von des obgenanten vnsers heren des kunigs gewaltes vnd hofgerichtes wegen gebieten wir vch ernstlich mit disem brief, das ir denselben Heinrich Walther an solichen vorgenanten sinen erclagten vnd eruolgten hofen vnd iren zugehorungen vnd ouch den vorgenanten frienluten furbassmere weder hindern oder irren sunder im ernstlich dorczu beholfen vnd in ouch getrulichen dabij hanthaben schuczen vnd schirmen sollet dem heiligen riche dem rehten vnd dem egenanten hofgerichte zu eren vnd zu liebe, wann wer des nit entete, zu dem oder den wurd man dorumb rihten, als des egenanten hofgerichtes reht ist. Geben zu Amberg vnder desselben hofgerichtes vfgedruktem insigel nach Crists geburt vierczehenhundert jare vnd dornach in dem funften jare, des nechsten donerstags vor vnserer frowen tag assumptionis.