Wir^a der burgermaister der rât vnd die burger all gemainlich des hailgen richstatt ze sant Gallen fur vns vnd||
all vnser aidgnôssen vnd die zu vns gehorent vnd noch gehoren werdent vnd ôch fur all vnser nachkomen tund kund||
aller menglichem mit dem gegenwurtigen offenn brief von der verainung vnd buntnuss wegen, als sich die ersamen vnd||
wysen der amman der rât vnd all burger gemainlich der statt ze Veltkilch¹ zu vns vnd och vnsren lieben aidgnossen denen von Appenzell² verpflicht vnd verbunden hând nach vrkundung wysung vnd sag der buntbriefen, die wir darvmb ze baidersyt gen enander versigelt habent, sol menglichem ze wissent sin vnd veriehent och wir des wissentlich an dem brief, das si inen vnd iren nachkomenn in der selben buntnuss vnd verainung, e si zu vns schwerren woltint, all dis nachgeschribnen stukk vnd artikkel mit vnserm guten willen vnd gunst erberklich vnd redlich vorbehalten gedinget vnd vssgenomen hând. Des ersten das si der herrschafft von Osterrich ir stur vnd nutzz daselbs mugent lâssen volgen, ob si wellent. Item das och wir vnd all vnser aidgnossen vnd die zu vns gehorent all burger vnd burgerinen, die ietz burger ze Veltkilch sind vnd furbas jemer me burger da werdent, bi allen iren briefen vnd gutern vnd och bi allen iren fryghaiten guten gewonhaiten vnd rechten vnbekumbert belyben lâssen sond. Si sond ôch allweg gewalt haben, all ir gewaltsami geriht vnd ampter selb ze besetzen, vnd sond wir su furbas mit enkainem vnserm gewalt vbersetzen deweder vff der burg noch in der statt, es war denn, das su vmb ainen amman vnder enander stossig wurdint vnd si sich des nit mitenander verainberen mochtint, so sond wir vorgenanten von sant Gallen vnd von Appenzell gewalt haben, das ampt ainem biderman ze enpfelhen, der vns nutzz vnd gut darzu dunkt, vntz vff die zit, das si sich selber ains andern verainent. War och, das si oder wir die burg ze Veltkilch gewunnint vnd zu vnsern handen brachtint, wie sich das gefugti, so sond wir si doch dannenhin gemainlich mit vnser baidertail wissen vnd rât besetzen vnd damit tun, was vns denn das best dunkt. Och hand si inen selber behalten vnd habent och wir inen das mit vnserm spruch ainhelleklich erkennet, do si zu vns schwerren woltent, das si in Walgo³ vnd anderswa zu allen iren gutern gezimbern vnd zinsen vnd och zu allen iren redlichen geltschulden mit ganzter aigenschafft stân vnd gryffen sond in allen den krefften vnd rechten als vor dem krieg vngevârlich. Des ze wârem offem vrkunde vnd stater sicherhait nv vnd hienach so haben wir vorgenanten von sant Gallen vnser gemainen statt insigel offenlich gehenkt an disen brief. Der also ze sant Gallen geben ward des jâres, do man zalt von Crists geburt vierzehenhundert vnd darnach in dem funfften jâr, des nachsten zinstags nach des hailgen crutzes tag ze herbst.