Dem durluchtigen hochgeborn fursten hertzog Fridrichen hertzogen ze Osterrich¹ ze Styr ze Kernden ze Krain||
grâf ze Tyrol etc. vnserm gnadigen herren enbuten wir der tegan das capitel amman rât vnd gemaine||
statt dienstmannen vnd telr des gotzhus ze Cur vnser willig dienst. Gnadiger herr, als mit vwern gnaden||
betadigot ist, das ir vnserm gnadigen herren byschoff Hartman ze Cur² sollent widerkeren vnd widergeben sine geschloss sin vatterlich vnd muterlich erb, des ir in entwert hand sid siner gefangnust, vnd och vnserm gotzhus, als es grosslich geschadgot ist von den herren von Matzsch³ vnd den vwern mit vwer offen baner in ainem frid, den vwer gnad selber gemachot hatt zwuschend dem gotzhus vnd den von Matzsch, do ward vns von vwern gnaden vnd vwern raten geantwurt, ir woltind schaffen, das vns gentzlich widerkert wurde. Das selb hat vns vnser gnadiger herr hertzog Lupolt⁴ och geantwurt vnd verhaissen. Bitten wir vwer furstlich gnad mit gantzem fliss vnd manent vch der buntnust, so ir vwer bruder vnd vettern vnser genadigen herren mit vns vnd vnserm gotzhus hand, vnd wess wir vch gemanen mugent, das ir vnserm gnadigen herren byschoff vns vnd vnserm gotzhus widerkerent vnd entschadgent, des wir vwern furstlichen gnaden wol getruwent. Gnadiger herr, vns hand och vwer landvogt vnd der von Toggenburg⁵ gemant, vch vnd vwern landen vnd luten ze helfen gen den Appazellrn⁶. Des warint wir willig, wari vnserm herren von Cur gnug geschehen vnd das gotzhus entschadgot nach dem, als es betadingot vnd verhaissen ist, darvmb wir all tag von in gemant vnd angerufft werdent. Bitten wir vwer furstlich gnad mit ernst, das ir vns vwer gnadig vsrichtung vnd antwurt gebent, won wir getruwent, das es vwern gnaden vwern landen vnd luten vnd och vns trostlich vnd nutzlich werd. Geben ze Cur an sant Gallen tag vnd besigelt mit des capitels vnd der statt ze Cur insigeln vnd mit Peters von Vnderwegen⁷ insigel von gemainer dienstlut wegen vnd mit Itel Planten⁸ insigel von gemainer telrn wegen des gotzhus ze Cur anno domini MoCCCCo quinto.