Wir^a die lantlut gemainlich in dem Gastern¹, die von Tatikon², von dem bach hin vf vntz an den Rotenbach³ gelegen sind, die ab Andmen⁴ vnd||
ab Kirchenzen⁵, die von Schennis⁶ mit dem closter, die ab Buchberg⁷, die von Kaltbrunnen⁸, die von Billiten⁹ vnd alli die lender vnd telr vnd||
gegninen, die da zwuschent gelegen sind vnd in die vogtye gen Windegg¹⁰ gehorent, sie ligent in berg oder in tal, wie die gehaissen||
oder genamt sint, vnd wir die burger gemainlich ze Wesen¹¹ vnd die zu vns gehorent, wie die gehaissen oder genamt sind, tunt kunt menglichem mit disem brief, das wir durch nutz gutes frides ruw vnd gemaches vnser vnd gemaines landes vns mit^b wolbedahtem mut mit ainberem willen armer vnd richer lieplich vnd gutlich verpfliht verstrikt vnd verainbert habent verbindent vnd verainnent vns mit kraft diss briefs mit den ersamen wisen dem amman vnd den lantluten gemainlich arm vnd rich ze Appenzell¹² vnd mit allen den, die zu inen gehorent vnd zu inen verbunden sind ald noch zu inen verbunden werdent, von disem huttigen tag hin, als dirre brief geben ist, die nahsten zehen jar nachainander volle ˆvs vmb dise nachgeseiten stuk vnd articul. Item des ersten ist berett vnd bedinget, ob das war, das die obgenanten von Appenzell oder die zu inen gehorent oder gehaft sind oder die hienach zu inen gehaft werdent ieman angriffen oder schadgen wolt in der vorgenanten jarzaln in den vorgenanten telren landen gegninen oder da durch ir lib ir gut durch die obgeseiten lender telr gegninen ziehen furren triben wolt oder tragen, wer der war oder wie die gehaissen oder genant sind, nieman vsgenomen, das wir in iedanne, als dik vnd wenn das ze schulden kumt vnd wir es von inen gemant werdent, ân allen furzug bi guten truwen vnd bi vnsern eren darzu tun vnd das retten vnd weren, als verr als wir mugent, mit lib oder mit gut, als ob dieselb sach vnd getât wider vns vnd vnser aigen sach war, ân alle geuard. Wir sollent vnd mugent och zu den von Appenzell vnd die zu inen gehorent vnd gehaft sind fruntlich wandlen werben vnd in koff essen vnd trinken geben, sie vnd das ir schirmen vnd enthalten in den obgenanten landen âne geuard vnd der von Appenzell oder die zu in gehorent oder noch zu inen gehoren werdent offen fyent nut enthaltent in dem obgenanten land noch in gross koff nit gebent noch zufurent in den obgenanten ziln an geuard. Doch mit namen mag ain vogt ze Windegg, welher danne ie daselbs vogt ist, ob er joch ir fyent wurd, das got lang wend, in den obgenanten landen vngeforlich wanlen vnd werben selb dritt oder selb vierd siner diener oder kneht, doch den vorgenanten von Appenzell vnd die zu in gehorent vnschadlich. Beschach aber also da durch vnd zu sollichen ziten den obgenanten von Appenzell von demselben vogt ze Windegg oder sinen knehten dekain schad an lib an gut, wie sich das fugti vnd das kuntlich wurd, denselben schaden vnd getât sollent wir den von Appenzell vnd den irn gantzlich ablegen vnd bekeren ân allen zusatz vnd all widerred. Och sond vnd mugent die von Appenzell vnd die, so ie danne zu inen gehorent, enkain ir fyent durch die obgenanten lender niht angriffen noch schadgen ân geuard. Och mugent die obgenanten von Appenzell vnd die zu in gehorent in fruntschaft durch vnser die obgenanten land zuhen vnd wandlen zu iren aidgnossen, si sigent von Switz¹³ oder wannen sie sind, oder si zu inen, als dik si wend, vnd dieselben ir aidgnossen zu inen in sollicher fruntschaft. Beschach och, dar vor got sig, das wir oder die zu vns gehorent der vorgenanten stuk dekains vbersah, es war mit koffen oder wo von es sig, also das die vorgenanten von Appenzell c), das inen gebrest oder schad da von vf stund oder beschehen war, vnd si vns darvmb in^d ir land mantint, das wir vnd och si ie danne ân als verziehen vnser erber bottschaft zu ainandren setzen sond ainen glichen zusatz zwen oder drig erber man von ietwedrem tail, vnd wes sich danne die gemainlich oder der mertail vnder in darvmb erkennent, es sig vmb strâff vmb bussen, wie si das furbas verkoment vnd gewent werd, da bi sollen wir ze baiden tailen beliben vnd dem gnug tun, war aber, das die selben botten stossig wurdent, so sond die obgenanten von Appenzell ainen gemainen man vss irem bund nemen zu ainem glichen zusatz, der vns vmb die stossigen sach entschaid. Wolt er es niht tun noch nit endgeben, so^e sol in^f ainer gemainer bund darzu wisen, er hab es denn vormals versworn. Wir lobent och mit disem brief vnd habent gelobt mit vnsern truwen in aides wis, wâr vnd statt ze haltent fur vns vnd die vnsern alles das, so da vor geschriben stât an disem brief, den wir die obgenanten lantlut im Gastern mit vnserm aignen insigel vnd wir die obgenanten burger ze Wesen mit vnsren aignen insigel versigelt habent. Geben ze Wesen am nahsten donstag nach aller hailgen tag in dem jar, do man zalt von gottes geburt tusent vierhundert vnd funf jar.