Wir die lantlüt lender vnnd gegninen in dem Gastrach, die von Tattiken von dem bach hinuf vntz an den Rotenbach gelegen sint, die ab Andman, die ab Kirentzen, die von Schendis mit dem kloster, die ab Buchberg, die von Kaltbrunnen, die von Byllaten vnd allü andru lender telr vnd gegninen, die zwüschen gelegen sint vnd in die vogtye gen Windegg gehorent, su ligen in berg oder in tal wie die genant oder gehaissen sint, vnd wir die burger gemainlich ze Wesen vnd die zu vns gehörent, wie die genant oder gehaissen sint, tun kunt aller manglichem mit disem offenn gegenwurtigen brief, daz wir durch nutz gutes frides ruw vnd gemaches willen vnser vnd gemaines landes vns mit wolbedachtem mut mit ainberem willen armer vnd richer lieplich vnd gutlich verpflicht verstrickt vnd verainbert haben verbinden vnd verainen vns mit kraft ditz brieues mit den ersamen wisen dem burgermaister dem rat vnd den burgern allen gemainlich arm vnd rich der statt ze sant Gallen, mit den ersamen wisen dem amman vnd den lantlüten gemainlichen arm vnd rich ze Appacell vnd mit allen den, die zu der obgenanten statt sant Gallen vnd dem land ze Appacell gehörent vnd verbunden sint ald noch zu in verbunden werdent, von disem hüttigen tag hin, alz dirre brief ist geben, die nähsten zehen gantze jar nach ain ander volle vs vmb disu nachgeschribenn stuck vnd artikel. Von ersten ist beredt vnd bedinget, ob das war, das die obgenanten von sant Gallen oder die von Appacell ald die zu in gehorent vnd gehaft sint oder die hienach zu inen gehaft vnd verbunden werdent, iemant angriffen oder beschadgen wolt in dem vorgenanten zil in den obgenanten lendern telren ald gegninen, oder da durch ald iro lyb oder gut durch die obgenanten lender telr vnd gegninen ziehen furen triben oder tragen wolt, wer der war oder wie die genant oder gehaissen sint nieman vßgenomen, das wir inen danne alz dick vnd wenn das ze schulden kumpt vnd wir des von iemand eruürdert oder ermant werdent, ân allen furtzug vnd bi guten truwen vnd vnseren eran dartzu tun vnd daz redten wenden vnd weren sullen, so verre wir mugen, mit lip oder mit gut, alz ob die selb sach vnd getat wider vns vnd vnseru aigenu sach war, ân alle geuarde. Wir sullen vnd mugen och zu der obgenanten statt sant Gallen vnd zu dem obgenanten land ze Appacell vnd die zu inen ie danne gehorent vnd gehaft sint, fruntlich wandlen werben vnd in koff essen vnd trinken geben vnd si vnd das iro schirmen schutzen vnd halten in den obgenanten lendern vnd gegninen getrulich vnd ân alle geuarde, vnd den obgenanten von sant Gallen vnd von Appacell ald die ietz zu in gehorent ald noch zu in gehoren werdent, offnen figent in den obgenanten lendern vnd gegninen nut schirmen halten noch in dehain grosß koff geben noch zufuren in den vorgenanten jar ziln, ân alle geuarde. Doch mit namen mag ain vogt ze Windegg, welhe ie dann da selb vogt ist, ob er ioch iro figent würd, das got lang wend, in den obgenanten lendern vnd gegninen vngefarlich wandlen vnd werben selb dritt oder selb vierd siner diener ald knecht, doch den obgenanten von sant Gallen vnd den von Appacell vnd den, die ie dann zu in gehorent vnd gehaft sind, gantzlich vnschadlich. Beschach aber also dadurch vnd ze sollichen ziten den obgenanten von sant Gallen oder von Appacell ald ieman, so ie dann zu in gehorent, von demselben vogt ze Windegg oder sinen dienern ald knechten dehain schad an lip oder an gut, wie sich der gezug vnd das kuntlich wurd, denselben schaden vnd getat sullen wir den obgenanten von sant Gallen vnd von Appacell vnd den iren, so ie dann zu in gehorent, gantzlich bekeren vnd ablegen ân all zusatz vnd an alle widerred. Och sont vnd mugent die obgenanten von sant Gallen vnd die von Appacell noch die, so ie dann zu in gehorent ald gehafft sint, dehain iro figent durch die obgenanten lender vnd gegninen nicht zugriffen noch schadgen ân geuarde. Och mugent die obgenanten von sant Gallen vnd von Appacell vnd die, so zu in gehorent, in fruntschaft durch die obgenanten lender vnd gegninen ziehen vnd wandlen zu den von Switz vnd zu iro aidgnossen, wenn vnd als dick su wellen, vnd dieselben von Switz vnd ir aidgnossen herwider vmb in sollicher fruntschafft vnd in gutem zu den von sant Gallen vnd von Appacell oder den iren ân alle geuarde. Beschach och, dauor got lang sie, daz wir oder ieman andere, der zu vns gehort, der vorgenanten stuck vnd artickel dehaines vberfurint, es war mit koffen oder mit dehainen andern sachen, also das die obgenanten von sant Gallen oder von Appacell ald die iren duncke, das in dauon gebrest oder schad vferstân wolti oder beschechen war vnd si vns darumb zu in in iro statt oder land mantin, das wir vnd och si ie dann ân als verziehen vnser erber botten zu ain ander setzen sont ainun glichen zusaz zwen oder drig erber man von ietwedren tail, vnd wes sich die dann alle gemainlich oder der mer tail vnder in darumb erkennent vnd sprechent, es sig vmb straff vmb buß oder wie daz furbaz verkomen vnd gewendet werd, dabi sullent wir zu baider sidt beliben vnd dem gnug thun. War aber das dieselben botten dann stossig oder darum sthrittig wurdin, so sont die obgenanten von sant Gallen vnd von Appacell ainen gemainen man vsser irem bunde nemen zu ainem glichen zusaz, der vns dann zu baider sitt vmb die stossigen sach entschaidi. Wolt aber derselb gemain man sich der sach also nut annemen noch der sach mit sinem spruch end geben, so sol in iro gemainer bund dartzu wißen und halten, das ers tug, ob er es vormals nut versworn hat, niemans gemain man ze werden. Wir haben och alle gemainlich arm vnd rich in disen obgenanten lendern telren vnd gegninen vnd ieklicher vnder vns besunder willeklich gelobt mit vnseren truwen in aides wise vnd lobent mit disem brief, allu vorgenanten stuk bunkten vnd artikel war vnd stat ze halten ze tunne vnd ze vollefuren ân alle geuarde. Des alles ze offem warem vrkunde vnd stater sicherhait aller der vorgenanten dinge vnd vergiht so haben wir die vorgenanten lantlut lender vnd gegninen in dem Gastrach vnd wir die burger gemainlich ze Wesen vnseru insigel fur vns vnd fur alle die vorbenempten, so zu vns gehorent vnd in disem brief begriffen sint, offentlich gehenckt an disen brief. Der geben ist ze sant Gallen an dem nahsten donstag nach aller hailigen tag des jares, do man zalt von Cristus geburt viertzehenhundert jâr vnd darnach in dem funften jare.