Wir^a die lute vnd die gemainde alle arm vnd rîch man vnd frowen, wer die sind ald wem die zugehorent, die da sitzent ald sesshafft werdent||
nv ald hernâch inwendig disen nachgeschribnen letzinen, item von Liehtenstaig¹ die gegni nider vntz an die letzi in Tuffnow², item von Vischinen³ entweres herLvf vntz gen Flawil⁴ an die letzi, item von dem Hurnlin⁵ obnen her vntz gen Vrnaschen⁶ an die letzi, vnd in disen nachgenamten dorffern vnd wîllern, das ist mit||
namen Jonswilr⁷, Obrenvtzwilr⁸, Bichwilr⁹ vnd in dem Rîndal¹⁰ bekennen vnd veriehen mit disem brief fur vns vnd fur alle vnd ieklich, die zu vns gehorent ald gehafft werdent, vnd fur alle vnser helffer vnd diener, wer die iedanne sind, das die ersamen wîsen der burgermaister die rat vnd die burger alle gemainlich arm vnd rîch des hailgen rîches statte ze sant Gallen vnd alle vnd ieklich, die zu inen gehorent ald gehafft werdent, gen vns in frid vnd in ainung gehorent, vnd das wir frid vnd ainung gen inen haben vnd halten sollent vnd wellent, als sie in frid vnd in ainung sind vnd als si frid vnd ainvng haltent mit den erbern wîsen vnsern guten frunden, das ist mit namen mit den von Liehtenstaig mit den von sant Johanner tal¹¹ vnd mit den vsserm Turtal¹², als der hoptbrief wol wiset vnd seit, den die obgenamten von sant Gallen innehand von den vorgenamten von Liehtenstaig von sant Johanner tal vnd von den vsserm Turtal. Item es ist och ze wissenn, was oder wieuil iedanne vnser gnadiger hêrr graf Ffridrich von Toggenburg¹³ vsserthalb den vorgenamten letzinen vnd vsserthalb den dorffern vnd willern, die mit namen an disem brief benemmet sind, luten hett ald im zugehorent, es sig von aigenschafft von vogtye von lehenschafft oder von pfandes wegen in der gegni vnd in den kraissen da vmb im Turgo¹⁴ gelegen, es sigint man oder frowen, den obgenamten von sant Gallen alle namlich an ain rodelli verschriben sond werden, das man luter wissi, wer die sigint, vnd welh danne den egenamten von sant Gallen also an ain rodelli namlich verschriben werdent, die stând vnd sind och in frid vnd in der ainung, als der vorgeseit hoptbrief wol wîset vnd seit. Es sond och mit namen alle vnd ieklich lute, die inwendig den vorgenamten letzinen vnd in den dorffern vnd willern da vorgenamt sesshafft sind ald werdent nv ald hernach, vnd och die lute, die den obgenamten von sant Gallen an das rodelli verschriben werdent, die letzinen ob Lutispurg helffen retten vnd da tun als die von Liehtenstaig die von sant Johanner tal vnd die vsserm Turtal gebunden sind ze tunne nach des obgenamten hoptbriefs lut vnd sag. Vnd was och diser brief wiset ze tunne, das alles vnd iro ieklichs sollen wir och getrulich halten vnd laisten ân alle geuerd, als wir das gelobt haben mit vnsern truwen an aides statt. Des alles ze warem vrkund vnd ze stater sicherhait hand die obgenamten vnser guten frund die burger ze Liehtenstaig disen brief von vnser bett wegen versigelt mit der burger der statte ze Liehtenstaig anhangendem aignen insigel, won wir aigens insigels nit haben, des och wir ietzgenamten burger ze Liehtenstaig offenlich veriehen. Dirre brief ist geben ze Liehtenstaig an dem nahsten samstag nach sant Martins tag in dem jar, do man zalt von gottes geburt tusent vierhundert vnd fvnf jare.