Ich^a Hainrich der Klinger burger ze Wil¹ vergich vnd tun kunt allermenglichem, als mir der hochwirdig furst||
abt Cun von gottes gnaden des gotzhus ze sant Gallen² geben vnd bezalen sol iarlich ze rechtem libding zwelf||
mut kernen gutes vnd genames Wiler messes vngeuarliches vnd besunder der from vest herr Herman von Landenberg||
von Griffense³ sesshaft ze Bychelsew^b4 ritter demselben obgenanten her Herman von Landenberg desselben obgenanten gotzhus von sant Gallen ze disen ziten zins vnd nutz beuolhen warent, das da derselb herr Herman von Landenberg ritter mich derselben obgenanten zwelf mut kernen gutes vngeuarliches Wiler messes gantzlich nach allem minem nutz vnd willen bezalt vnd gewert hat vor allem schaden vff den nahsten verrukkten sant Martins tag vff dis hurig iar, als dirr brief geben ist, vnd ouch der zwelf mut kernen geltz von dem iar vnd von sant Martins tag anno domini millesimo CCCCo quarto, vnd vff daz vnd dar vmb so sagen vnd lass ich dieselben min gnadigen herren abt Cun vnd sin gotzhus vnd alle sin nachkomen vnd den ietzgenanten herr Herman von Landenberg vnd sin erben vnd alle sin nachkomen von des obgenanten gotzhus pfleg wegen dar vmb vnd vmb allen schaden, war ob dehainer dar vff komen vnd gangen war, fur mich vnd alle min erben vnd nachkomen gantzlich vnd aller ding quidt ledig vnd los mit vrkund dis gegenwirtigen briefs, der ze warem offnem vrkund versigelt vnd geben ist vnder des fromen vesten Johansen Asters schulthaissen ze Wil insigel von miner ernstlichen flissigen bett wegen, douch im vnd sinen erben vnuergriffenlich vnd aller ding vnschadlich, ze Wil in der statt an sant Thomans des hailgen zwelfbotten abent anno domini millesimo CCCCo quinto etc.