Wir^a dis nachgenempten Peter vnd Wolfram frye herren von Hewen gebruder veriehen vnd tunt kund allermenlichem, als der||
hochwirdig furst vnser gnadiger herr abt Cun von gotz gnaden des gotzhus ze sant Gallen vns gunnen vnd erloubt||
hât, das wir den zehenden ze dem Willa mit siner zugehord, der mit andren lut vnd gutern vnser pfand ist von dem||
obgenanten sinem gotzhus vff einen widerkouff vmb hundert vnd sechs vnd sibentzig guldin, ze kouffent geben hânt Rudin Wingarter vnd Elsbeten ietz siner elichen frowen vnd iren erben, als der brieff wist, so sy dar vmb mit desselben vnsers herren abt Cunen vnd vnsern insigeln versigelten hânt, da bekennen vnd veriehen wir offenlich mit disem brieff, das wir beid fur vns vnd alle vnser erben vnd nachkomen von desselben zehenden vnd pfandes wegen mit dem selben vnserm herren abt Cunen an siner vnd aller siner nachkomen statt wissenklich vnd wolbedacht vber ein komen syen vnd mit vnsern truwen an gesworner aiden statt gelobt haben vnd lobent ietz in krafft dis brieffs, wenn oder welhes iars, es sye vber kurtz oder vber lang, der selb vnser her abt Cun ald sin nachkomen den obgenanten zehenden vnd andri lut vnd guter, so wir von sinem gotzhus ze pfand hant, losen went vnd vns vff die obgenanten hundert vnd sechs vnd sibentzig guldin, darvmb wir den selben zehenden ietz verkunbert hant, der vbrigen sum geltz sament vnd mit ainander betzalent, ist das wir den selben zehenden denn nit wider von dem obgenanten Rudin Wingarter vnd siner elichen frowen ald von iren erben ald nachkomen zu vnsern handen widerkoufft vnd geledgot hant, das wir inen vnd irem gotzhus ân allen furzug vnd widerred alli andru guter, so wir von dem obgenanten gotzhus ze pfand hant, dar vmb gantzlich ledig lassen sont, vnd das sy denn den selben zehenden ôch wol losen mugent von dem egenanten Rudin Wingarter ald von siner elichen frowen ald von iren erben ald nachkomen, wenn sy went, mit den obgenanten hundert vnd sechs vnd sibentzig guldin ân geuard. War aber, das der obgenant zehend in vnsern handen stundi vnd von dem obgenanten Rudin Wingarter vnd sinem wib vnd von iren erben geledgot wari ze den zitten, so der obgenant abt Cun ald sin nachkomen die losung von vns ald vnsern erben tun woltint, so sont sy von vns losen vnd wir inen der losung gestatten in glicher wis, als ob wir den obgenanten zehenden nie bracht hettind zu des obgenanten Rudi Wingarters vnd sins wibs handen, ân geuard. Des alles ze warem offem vrkund so haben wir beid vnsru insigel fur vns vnd vnser erben offenlich gehenkt an disen brieff. Der geben ist ze Winterthur in der statt nach Cristus geburt vierzehenhundert jar, darnach in dem sechsten jar, an der nechsten mitwuchen nach sant Paulus tag, als er bekert wart.