Ich^a bruder Hans der Spinnler gardian vnd wir der conuent gemainlich der||
Barfuzzen closters ze Lindow¹ tund kunt vnd veriehin offenlich fur vns vnd||
fur alle vnser nachkomen mit disem brief, daz vns wilent der erwirdige||
maister Vlrich der Burgower² selig kircherre ze Gossow³ durch siner sele willen gegeben hat zwelf pfund pfening guter Lindower werung, der wir gentzlich gewert vnd bezalt vnd an dez obgenanten vnsers gemainen conuentz guten nutz vnd fromen komen sint. Vmb die selben gut tat, so er vns vnd vnserm conuent damt getan hat, so habin wir gelobt vnd verhaissen vnd verbinden vns vnd alle vnser nachkomen dez mit disem brief, daz wir vnd alle vnser nachkomen dez selben maister Vlrichs dez Burgowers seligen iarzit eweklich began sullen in dem obgenanten vnserm closter ze Lindow ellu iar vff den nechsten tag nach aller selen tag oder in den nechsten acht tagen dauor oder darnach vngeuarlich dez abentz mit ainer vigili vnd enmornent mit ainer gesungnen selmess vnd mit kertzen vff sinem grab vnd mit allen dingen, alz wir gewonlich solich iarzit in dem obgenanten vnserm closter begand, bi guten truwen âne alle geuerd, ald welez iars wir daz vbersehint vnd sin iarzit nit begand, alz vorbeschaiden ist, so sullen wir vnd vnser nachkomen darumb denne dez selben iars ze rechter buzz verfallen sin zehen schiling pfening genger vnd guter Lindower werung an den buwe gen sant Stephans pfarrkirchen hie ze Lindow⁴, die selben zehen schiling pfening wir denn och vnuergenlich^b dahin richten vnd geben sont, alz dik ez ze schulden kunt, daz wir der villig werdint. Vnd dez allez ze offem vnd warem vrkund vnd steter ewiger sicherhait haben wir disen brief daruber geuestnot vnd besigelt mit vnsers conuentes gemainem angehenkten insigel. Der geben ward an dem nechsten fritag vor vnser frowen tag zer liechtmiss nach Cristi geburt vierzehenhundert iar, dar nach in dem sechsten iar.