Wir^a des hailigen richs sette^b des bunds vmb den Se¹ vnd im Albgow² mit namen Vberlingen³,||
Lindow⁴, Rauenspurg⁵, sant Gallen, Wangen⁶ vnd Buchorn⁷, Memmingen⁸, Kempten⁹, Isni¹⁰ vnd Lukirch¹¹||
veriehin offenlich vnd tund kunt mit disem brief allen, die in ansehent oder horent lesen, von||
der gulte wegen der zway tusend guldin, die vns der fromme veste herr Marquart von Emptz¹² ritter schuldig ist vnd gelten sol, darumbe dis nachgescriben herr Hans von Fridingen¹³ ritter, Vlrich von Kungsegg¹⁴ genant Rolle, Hans von Homburg¹⁵, Egli von Roschach¹⁶ der elter, Cunrat von Stainach¹⁷, Vlrich von Ramswag¹⁸, Laurentzen des Schulthaizz erben von Wintterthur¹⁹, Vlrich von Emptz²⁰, Rudolff Maiger von Altstetten²¹, grauf Wilhalm von Montfort herre ze Tettnang²², Cunrat von Bustetten²³, herr Albrecht von Burglon²⁴ ritter, Hans von Munchwil²⁵ vnser recht weren sind nach der brief vrkund vnd wysung, die wir darumb haben, bekennen wir mit disem brief, das wir den obgenanten vnsren lieben aidgenossen dem burgermaister vnd dem rate ze Vberlingen vnd wem si das furo enphelhend, vollen gwalt vnd gantz macht geben haben vnd gebin mit crafte dis briefs, die obgenanten weren gemainlich vnd sunderlich darumb ze ladent fur den lantrichter vnd vf das lantgericht ze Rotwile²⁶, vnser clag ze tund vnd ze vollefurent vnd vnser ansprach vnd recht da gen in ze suchent vnd ze erklagnent nach dem rechten ze gewinn vnd ze verlust mit vollem gwalt vnd in aller der wise vnd in dem rechten, alz ob wir alle mit vollem gwalt selb ze gegen werint vnd es selber tatind. Des ze vrkund der warhait vnd vester vnd vnwandelberer sicherhait so hand die obgenanten vnser aidgenossen die von Lindow von vnser aller haissens wegen disen brief daruber geuestnot vnd besigelt mit ir stat ze Lindow gemainem insigel, das si offenlich von vnser aller wegen gehenkt hand an disen brieff. Der geben ist am nechsten samstag vor sant Geryen tag nach Cristus geburt viertzenhundert jar, darnach in dem sechsten jar.