Wir^a Leupolt von gots gnaden hertzog ze Osterreich¹ ze Steyr ze Kernden vnd ze Krain graue ze Tyrol etc. bechennen||
fur vns vnser bruder vnd erben, als der hochgeboren furst vnser lieber bruder hertzog Fridreich² hie zu lande beleiben||
vnd vnsern gegenwurtigen krieg mit den Appentzellern³ getrewlich fur hand nemen vnd den vnd all ander sach nach||
iren notdurften treiben verwesen vnd ausrichten wirdet in all weg, vnd darumb vnd das also zu tun vntz auf sand Jorgen tag schieristkumftigen wir von vnserr bruder vnd vnsern wegen mit im vberain komen sein, also haben wir demselben vnserm pruder hertzog Fridreichen vollen vnd gantzen gewalt gegeben vnd geben auch wissentlich denselben vnsern vnd seinen krieg zu treiben vnd all vnser land hie dishalb des Arls⁴ mit aller gewaltsam geistlicher vnd weltlicher lehenschaft zu besetzen vnd entsetzen vnd in all ander weg ze tun vnd ze lassen nichts ausgenommen nach allen iren notdurften zu verwesen auszerichten vnd ze versorgen, frid richtung tayding vnd puntnuss mit den Waltstetten⁵ vnd andern herren vnd stetten vnd auch mit den Appentzellern auf ze nemen ze tun vnd ze machen im vns vnd vnsern prudern zu nutz vnd frumen, doch ausgenommen Ellsezz⁶ vnd Suntgow⁷ vnd der herscheft, die vnserr lieben gemaheln verschriben sind, damit er nichts zu schaffen haben sol, vnd auch also daz meniklich, die von vns brief habent, bey denselben brieuen beleiben, es sein gnad brief oder vmb ander sach, an geuerde, vnd was er also damit tut vnd handelt, daz das vnser will vnd geuallen ist, vnd auch das gentzlich stet halten wellen vngeuerlichen. Dauon emphelhen wir den edeln vnsern lieben oheimen allen grafen vnd vnsern lieben getrewen allen herren rittern vnd knechten vogten haubtleutten pflegern purggrafen vnd amptleutten burgermaistern schultheissen reten in stetten vnd auf dem lande vnd allen andern vnsern vndertanen in den egenanten vnsern kraissen vnd wellen ernstlich, daz sy die vorgenant zeit vntz auf sand Jorgen tag vnd darnach all die weil, vntz daz wir ainer andern ordnung mit im vberain werden, dem vorgenanten vnserm bruder hertzog Fridreichen also gehorsam vnd gewertig sein in all weg, dartzu er ir bedurffen vnd sy darumb anruffen werde von der obgenanten vnserr bruder vnd vnsern wegen, wan wir das ernstlich maynen. Mit vrkund ditz briefs. Geben ze Newnburg⁸ an freytag nach dem suntag Cantate nach Christs geburde viertzehen hundert jar, darnach in dem sechsten jare.