Wir^a graff Fridrich von Togkenburg¹ herr in Brettengow² vnd vff Thafaus³ etc. tun kunt allen, die disen brief sechent oder horent lesen, das wir mit||
wolbedachtem mute durch vnser nutz vnd notdurft willen vnd meren schaden ze furkomen zwentzig vnd siben mut kernen jerlicher gult Liechtensteiger⁴||
mess vff vnd ab vnserm kilchensatz ze Magelsperg⁵ bi Liechtensteig gelegen vff widmen vff zinsen vff zechenden vnd vff allen nutzen vnd gelassen||
mit aller rechtung frijheit vnd ehafti, so zu dem selben kilchensatz gehoret, fur ledig frij eigen ze koffen geben haben dem erwirdigen herren hern Rudolfen abt des gotzhus ze sant Johann⁶ vnd dem convent gemeinlich desselben gotzhus vmb druhundert vnd vmb sibentzig vnd zwey pfund guter haller, der wir von dem obgenanten abt gar vnd gentzlich gewert vnd bezalt sijen, vnd ist och dasselb gelt alles in vnsern guten vnd redlichen nutz komen, den selben zinse die zwentzig vnd siben mut kernen wir vnser erben vnd nachkomen dem obgenanten abt dem convent vnd dem gotzhus ze sant Johann vnd iren nachkomen jerlich vff sant Martis tag ab vnd von dem vorgeseiten kilchensatz mit allem dem, so darzu vnd darin gehoret, vor allen andern zinsen vnd pfrunden gen Liechtensteig in die statt in weles hus si je dann wellent ane allen iren schaden richten vnd weren sullen ane allen furzug. Wir haben och fur vns fur vnser erben vnd nachkomen, die wir her zu binden, mit guten truwen gelopt, der vorgeseiten zwentzig vnd siben mut kernen jerlicher gult vff dem vorgeschriben kilchensatz mit widmen mit allen nutzen gulten zechenden zinsen rechtungen vnd frijheiten, so darzu gehoret, vmb den vorgeschriben koff vnd mit dien gedingen, als vor vnd nach ist bescheiden, in vnserm kosten wer ze sin nach recht der obgenanten des abtes des conventes vnd des gotzhus ze sant Johann vnd aller ir nachkomen fur ir ledig frij eigen vor geistlichen vnd vor weltlichen gerichten vnd mit namen an allen stetten, wo vnd wenn vnd als dik si des notdurftig sint, an all geuerd. Wir haben vns och gar vnd gentzlich entzigen alles rechten vordrung vnd ansprach, so wir vnser erben oder vnser nachkomen nach dien vorgeschriben zwentzig vnd siben mut kernen jerlicher gult vff dem obgenanten kilchensatz ze Magelsperg mit widmen mit allen zechenden zinsen gulten frijheiten vnd rechtungen, so darzu oder darin gehorent, dehein wise jemer gehaben oder gewinnen mochtin gen dien obgenanten dem abt dem convent vnd dem gotzhus ze sant Johann oder gen iren nachkomen mit gerichten geistlichen oder weltlichen ald ane gericht oder mit deheinen andern sachen an all geuerd. Wer och das der vorgenant kilchensatz nu oder hernach jemer als swach wurd oder wer, das die obgenanten der abt vnd der convent des egenanten gotzhus ze sant Johann der vorgeseiten zwentzig vnd siben mut kernen jerlich davon nicht vsgericht mochten werden in der mas, als vorgeschriben stat, wenn wir oder vnser erben vnd nachkomen des von inen oder von iren nachkomen ermant werden, so sullen wir si nach der manung in dem nechsten manot bi vnsern truwen vnd eren zu dem egenanten kilchensatz mit andern guten ligenden gutern besorgen, dar an si habend sijen, das si der vorgeseiten zwentzig vnd siben mut kernen jerlich sicher sijen in der mas, als vorgeschriben stad, an all geuerd. Wir haben och vns selber vnsern erben vnd nachkomen verdinget vnd vorbehept vnd hant och die obgenanten der abt vnd der convent ze sant Johann fur sich fur dz egenant ir gotzhus vnd fur ir nachkomen vns die fruntschafft getan, das wir die vorgeseiten zwentzig vnd siben mut kernen geltz ab dem vorgeseiten kilchensatz ze Magelsperg vnd ab andern gutern, ob deheines dar vmb furbz versetzet wirt, wider koffen vnd ablosen mugen hinnenhin wenn wir wellen och mit druhundert vnd zwey vnd sibentzig pfund guter haller. Wenn wir inen die samenthaft richtend vnd weren, da mit sullent vns der vorgenant kilchensatz ze Magelsperg vnd die andern guter, ob deheines furbz dar vmb versetzet wer, dannenhin von diser sach wegen gentzlich vnd gar ledig vnd los sin, vnd beschiht der widerkoff vor sant Johans tag ze sungichten, so sol vns der zins desselben kunftigen jares mit den gutern beliben, beschicht aber der widerkoff nach sant Johans tag ze sungichten, so sol inen der zinse desselben jares beliben vnd vns die guter ledig sin an all widerred. Her uber ze einem offennen vrkund, das dis vorgeschriben alles war vest vnd stat belib, so haben wir der obgenant graff Fridrich von Togkenburg vnser insigel fur vns fur vnser erben vnd nachkomen offenlich gehenket an disen brief. Der geben ist an dem nechsten fritag vor dem heilgen pfingstag, do man zalt von Cristus geburt vierzechenhundert jar, dar nach in dem sechsten jar.