Wir^a der burgermeister der rate vnd die burger gemeinlich der statt zu sant Gallen vnd wir der amman vnd die lantlute gemeinlich des landes ze Appentzelle bekennen vnd veriehen offenlich mit disem brieffe||
fur vns alle vnser eydgenossen, so tzu vns gelopt vnd gesworn hand, vnd alle vnser helffer vnd diener vnd fur alle, die von vnsern wegen in dem kriege begriffen verdaht vnd dartzu gehafft sind, das wir einen||
getruwen vngeuarlichen friden vffgenommen haben mit dem durchluhtigen fursten vnd herren hertzog Fridrich zu Osterich sinen brudern vnd vettern vnd allen iren helffern vnd dienern vnd den iren vnd mit||
allen den, die von iren wegen in dem kriege begriffen vnd dartzu gehafft sind, vnd mit allen den, die in iren landen gesessen sind, die tzu disem kriege gewand sind, vnd ouch mit den von Costentz vnd allen iren burgern helffern vnd dienern, den die edeln hern Engelhart herre tzu Winsperg hofrihter, herr Johans herre tze Zymbern vnd Aulbreht von Berwangen des allerdurchluhtigosten fursten vnd herren hern Ruprehtes Romischen kongs ze allen tzijten merer des richs vnsers gnedigen vnd lieben herren rete, die er dartzu geschicket hette, vnd die erbern botten von des heiligen richs stetten mit namen Hans Stroli von Vlme, Hainrich Maise, Jacob Glenter von Zurich, Claus Beserer von Uberlingen, Walther Pauls von Biberach vnd Hans Gramlich von Pfullendorff von des vorgenanten vnsers gnedigen herren des Romischen kungs heissens wegen beretde vnd beteidingt haben in der masz, als hernach geschriben stât, also das der fride weren sol von datum disz brieffs hin vntz vff sant Georien tag nehst kompten vnd dannen hin ein gantz jar bis vff sant Georien tag vnd den tag allen bis ze naht an alle geuerde. Des ersten so sol die egenant herschafft von Osterrich ir helffer vnd die iren alle die stette vestinen schlos teler vnd lender, die sie gewonnen vnd tzu in gesworn haben vnd yetz innehand, mit allen iren tzugehorungen innehaben vnd was darinne begriffen ist besetzen vnd entsetzen disen friden vss von vns vnd allen den vnseren vnseren^b helffern vnd dienern vnd von den, die von vns oder vnser helffer wegen in disem krieg begriffen sind, vnbekombert. Ouch sol der tumprobst von Costentz vns obgenanten von sant Gallen, von Appentzelle vnd die, die tzu vns gehornt, vnuertzogenlich an geuerde vss der auhte vnd vss banne laszen vnd disen fride uss vnbekombert lan. Were ouch, das yemant, wer der were, die obgenanten herschafft von Osterrich die iren oder ir helffer vnd diener bekriegen oder angriffen wolte, die sollen wir noch die vnsern, so tze vns gehorent, nit halten husen hofen eszen noch trincken geben noch in keinem wege tzu legen, dauon in schade oder gebrest kommen mohte, vngeuarlich. Were ouch, das yeman, wer der were, die tzu vns oder vnsern helffern gehorten oder gewant were, der disen fride nit hielte oder dehainen angriff tetde zu der vorgenanten herschafft iren helffern oder den iren, alz vorgeschriben stat, darumbe sol dirre fride nit geprochen sin, vnd als bald des ein burgermeister vnd ein rat tze sant Gallen oder der ammân ze Appentzelle von der obgenanten herschafft von Ostereich irem lantuogt oder sinem stathalter ermant werdent, so sullen wir vnuertzogenlich schaffen, das der nome oder angriff widerkeret werde. Mohte oder wolte denne der oder die, die den angriff getan hetten, die sach nit ligen laszen, darumbe der angriff bescheen were, der oder die sullent einen gemainen man nemen in der vorgenanten herschafft von Osterrich stetden oder uff dem lande geswornen reten, welhen sie wollen. Vnd wâ ouch der selbe gemain genommen wirdet, den sol ouch die obgenant herschafft ir lantuogt oder sin stathalter datzu wisen vnd halten, der ez denne vor datum disz brieffs nit versworn hât, das er sich der sache anneme vnd darumbe tag beschaide gen Tzurich in die stad in viertzehen tagen, vnd sol ouch yetweder taile tzwen erber man tzu dem gemain setzen vnd sol ouch denn der gemain vnd die vier baidertaile rede widerrede vnd kunschafft verhorn. Vnd was sie mit der mynne nit gerihten mugen, darvmbe sullen sie ein reht sprechen vff ir ayde, vnd das reht sol in einem manot ein ende nemen vnd vsz getragen werden. Vnd was auch da uszgetragen wirt mit mynne oder mit reht, den vnd die sol die obgenant herschafft ir lantuogt oder sin stathalter dartzu wisen vnd halten, das dem vsspruch gnug beschee inwennig viertzehen tagen den nehsten nach dem vsspruch. Were ouch, das wir oder die vnsern an der obgenanten herrschafft diener oder tzu dennen yht zesprechen hetden vmb eigin vmb erbe oder vmb schulde, so sullen wir vnd die vnsern dem oder den darumbe nach faren in die gerihte, da sie in gehorent, vnd da reht von in nemen, des man ouch da vns vnd den vnsern vnuertzogenlich dun vnd helffen sol. Wa das nit beschee vnd das kuntlich wurde, der mag denne sin reht suchen an den stetten, da in dunckt, daz ez im fuglich sie. Ouch ist beretde vnd beteidingt, das alle gefangen vssgeben sullen werden vff tzijtlich beschaiden trostung disen friden vss, vnd wa ouch vngegeben gelt were von gefangener wegen, das noch in burgschafften stunde oder nit gegeben were, das sol beliben stan ouch disen friden vss ane schade. Ouch ist beretde, das wir tze beidersyt zesamen wandeln sullen mit kouffen vnd verkouffen vnd mit andern sachen vngeuarlich. Vnd also uersprechen vnd gereden wir die obgenanten von sant Gallen vnd die von Appentzelle mit vnsern guten truwen in aids wise fur vns fur alle die, die tzu vns gelopt vnd gesworn hand, fur alle vnser helffer vnd diener vnd fur alle die vnsern, disen friden also getrulichen vest stett vnd vnuerbrochenlichen ze halten vnd dawider niemer tze dun noch schaffen getan in deheinen weg an alle geuerde. Des ze urkunde der warheit vnd steter sicherhait geben wir obgenanten von sant Gallen vnd von Appentzelle vnseriv insigel an disen brieff. Der geben ist ze Arbon an tzinstag nach sant Vlrichs tag nach Crists gepurte viertzehenhunder jar vnd darnach in dem sehsten jar.