Ich Hainreich der Hettlinger¹ bekenn mit dem brief fur mich vnd mein||
erben, daz mich der durchluchtig vnd hohgeboren furst herczog Fridreich||
herczog ze Osterreich² etc. mein gnêdiger herre ausgericht vnd beczalt hat||
der drithalbhundert vnd vier guldin vnd hundert vnd zwainczig pfunt haller vnd sechs guldin, die er mir schuldig was von wegen der soldner, die ich ze Wil³ in sinem dienst hett, darumb er mir sinen brief hett gegeben, vnd also sag ich den egenanten meinen gnêdigen herren vnd all sein erben der obgenanten summ pfenning fur mich vnd all mein erben genczlich ledig quit vnd los ane geuerd. Mit vrkunt dicz briefs versigelt mit her Hanmans von Rynach⁴ insigel, wan ich das min by mir nicht hett, im vnd seinen erben an schaden. Geben ze Schafhusen⁵ an samstag nach sand Oswalds tag anno domini millesimo quadringentesimo sexto.