Wir^a die nâchgenanten Hans Ebnater von Switz¹, Hans Ebnater sin sun, Hans Gross von Vnderwalde² vnd Cunrat Nukom tun kunt vnd veriehent offenlich mit disem brief allen, die^b||
sehent oder horent lesen, alz vns die ersamen wisen der burgermaister vnd der rat gemainlich der statt ze sant Gallen gehainmot in iro vanknuss vnd banden hatten vmb||
das wir wider sy getan hatten, alz wir vss ir statt angriff getan hatten ân iro willen luten, die do ze^c mal frid mit in hielten, won aber sy vns von vnser guten frund vnd gesellen||
ernstlichen bet begnadot vnd vss ir vanknuss vnd banden gelassen hant, darumb so haben wir alle vier mit wolbedahtem mut willeklich frilich vnd vnbezwungenlich offenlich gesworn gelert aid zu got vnd zu den hailigen mit vfgehabenen vingern, vmb die vorgedahten vanknuss vnd getat der vorgedahten des burgermaisters des rates vnd aller burger vnd burgerinen gemainlich vnd sunderlich der statt ze sant Gallen vnd mit namen aller dero, wer die sint, die an der selben vanknuss vnd getat schuld gehebt hant hainlich oder offenlich mit raten ald mit getaten ald in dehain wis, luter gantz vnd gut frund ze sinne vnd alle vnser frund inen darumb ze frund ze gewinnen ân allen furzug vnd die selben vanknuss vnd getat niemer ze andenn noch ze aferrenn weder mit geriht noch ân geriht mit worten noch werken noch in dehain wis noch schaffen getan werden noch nieman andre an vnser statt noch von vnsern wegen ân geuarde. Wir haben och in den vorgeschribenn aid genomen vnd gesworn, den vorgeschribenen angriff vnd namen ân allen furzug gantzlich wider ze kerenn vnd furbaz hin kainen angriff nut ze tunne in noch vss der vorgeschribenen statt noch vss irem bunde noch darin aht tag vor vnd aht nach vngefarlich. Wir haben vns och des willeklich gebunden also, da vor got sie, das wir alle oder dehainer vnder vns besunder ald ieman von vnsern wegen die vorgeschribenn vanknuss vnd getat iemer andotin afertin ald die vorgeschribenen aide iemer uber sahint vnd uber furent mit dehainen sachen, wenne oder wa das beschach vnd kuntlich wurd, das wir danne alle vier oder welhe dann vnder vns also vber varn hetti, rehtlos vnd erlos lut sien vnd haissen ân alle widerred gen den vorgenanten dem burgermaister dem rat vnd den burgern gemainlich der statt ze sant Gallen vnd allen iren aidgnossen. Vnd des ze warem offem vrkunde so haben wir alle vier da vorgenant erbetten den ersamen Rudolf Kung von Switz wonhaft zu disen ziten ze sant Gallen, daz er sin insigel fur vns gehenkt hat an disen brief, vnder des insigel wir vns in diser sach willeklich gebunden haben, won wir aigener niht hant, des och ich obgenanter Rudolf Kung mir vnd minen erben ân schaden vergich an disem brief. Der geben ist ze sant Gallen an dem nahsten mantag vor sant Katherinen tag in dem jar, do man zalt von Cristus geburt vierzehenhundert jar vnd darnach in dem sechsten jare.