Ich^a Eglolf von Roschach¹ der elter veriech vnd tun manglichem ze wissent mit disem brief, daz||
ich fur mich fur all min bruder vnd fur all vnser erben vnd nahkomen mit wolbedachtem sinn vnd||
mut den wingartun, den man nempt daz Lochli², gelegen an dem Buchberg³, stosset ainhalb an VLlis Waggen wingartun, anderhalb an Elsen Koffmannin wingartun, er stosset och an die Kung⁴, die wingartun mit grûnd mit grat mit winreban mit stikkeln mit wûnn mit waid mit stegen mit wegen mit allen rechten nutzzen gewonhaiten vnd zu gehôrden, so von recht ald von gewonhait zu dem selben wingartun, den man nempt daz Lôchli, ald darin gehôret, vnd mit aller zugehôrde ains rechten redlichen ewigen koffs fur ledig vnd los, daz da von noch darab vber al nichtz gat noch gan sol weder zins noch ander ding weder vns noch niemand andre vber al, in sôlichen rechten verkoft vnd ze koffen geben han vnd gib in ze koffen mit disem brief dem erbern knecht Hannin Flûrin burger ze Rinegg⁵ vnd allen sinen erben nach im frowan alz mannen tochtran als knaben vmb sehs phûnt phenning Costvntzer muns, dero ich gantzlich vnd gar nach mim willen von im gewert vnd bezalt bin, die ich an minen vnd miner bruder guten nûtz bewent vnd bekert han, vnd han och fur mich vnd fur alle min bruder vnd och fur alle vnser erben vnd nahkomen den vorgescribenen wingartun, den man nempt daz Lôchli, mit aller siner zugehôrde fur lêdig vnd loss, als vorgescriben ist, recht vnd redlich dem vorbenempten^b Hannin Flûrin ze lechen gelichen, won och der selb wingart von vns obgedachten von Roschach lehen ist, vnd lich im den selben wingartun also ze lechen mit vrkund dis brieues vnd och in solichen rechten, daz wir obgedachten von Roschach vnd alle vnser erben vnd nâhkomen also den selben wingartun, den man nempt das Lôchli, mit allen sinen zugehôrden des vorgenanten Hannis Flûris erben allen frôwan als mannen tochtran als knaben ze lechen lichen sond, als dik es ze schûlden kûmpt, fur ledig vnd los, als vorbeschaiden ist, ân all widerred vnd ân alles verziechen ân all geuerde, vnd dz och wir obgedachten von Roschach noch dehain vnser erben noch nâhkomen noch niemand andre an vnser statt noch von vnser wegen den vorbenempten Hannin Flûrin noch dehain sin erben von der vorgescribnen lehenschaft noch dehains zins wegen vsser vnd ab dem vorgescribnen wingartun niemer me sond noch mûgent ansprechen vfftriben bekumberen bekrenken noch in dehain wise beswaren weder mit gaistlichem noch mit weltlichem gericht noch ân gericht noch mit dehainerlay anderr sach noch furzûg vber al ân all geuerde. Ich obgenanter Eglolf von Roschach der elter vnd ich Rudolf von Roschach⁶ der junger sin bruder vnd alle ander vnser bruder vnd och alle vnser erben vnd nâhkômen sond och bi vnsren guten truwen des vorgescribnen wingartun, den man nempt daz Lochli, mit aller siner zugehorde vnd dirr vorgescribner lehenschaft vnd dises koffs vnd aller vorgescribner dinge recht gut vnd getruw weren sin vnd den vorgenanten Hannin Flurin vnd all sin erben darvmb nach dem rechten ze versprechen vnd ze verstann, wa si des iemer bedurfent vnd notdûrftig werdent, ân alles veriechen vnd ân allen ir schaden. Vnd ist dis alles beschechen vnd vollfurt recht vnd redlich mit allen den worten werken vnd getaten, so von recht ald von gewonhait darzu hôrtent ald horen soltent vnd noturftig warent vnd als es kraft vnd macht sol vnd mag han nûn vnd hienach. Vnd des alles ze warem vrkûnd vnd stater sicherhait so hand wir obgenanten von Roschach Eglolf der elter vnd Rudolf der junger vnsru insygel fur vns vnd fur all vnser bruder vnd fur all vnser erben vnd nachkomen offenlich gehenkt an disen brief. Der geben ist an sant Lucien tag nach Cristy geburt vierzehenhûnder jar vnd im sehsten jare.