Ich^a her Rudolf Hofakrer der junger ze disen ziten lupriester ze Wetzikan¹ tun kunt vnd vergich offenlich mit disem brief fur||
mich vnd all min erben, dz ich mit guter vorbetrachtung gesund libes vnd gemutes verkoft han minen wingarten gelegen ze Luchingen²||
in dem Rintal, den man nemet an dem Bul³, der wilunt Hugen Hofakrers salgen waz vnd her Rudolfen Hofakrers miner vetter, den ich||
von inen ererbt han vnd och mir ze tail worden ist, der anhalb stosset an spitaler⁴ wingarten, der Hermans Spanhartz salgen wz, anderhalb an maister Johansen Schadlers der kinden schulmaister⁵, der von disem tail getailt ward, vnd han den selben minen wingarten mit grund mit grat mit steg mit weg mit reben vnd rebstal mit stikeln vnd mit allen sinen rechten gewonhaiten vnd zugehorden, wie die genant oder gehaissen sind, fur mich vnd all min erben aines staten ewigen gerechten koffes ze koffen geben den ersamen vnd wolbeschaidnen luten frow Claren wilant Hainrich Kumers elichi wirtinn, her Johansen iro elichem sun kilchenherr vnd lupriester ze Huntwilr⁶ vnd Agnesen iro elichen tochter vnd iren erben, ob si enwerint, vmb drissig pfund vnd vmb acht pfund alles guter Costentzer pfennig, vnd bin och des selben geltes gar vnd gantzlich von inen gewert vnd bezalt vnd han daz an minen offnen nutz bewendet, vnd dar vmb so han ich inen allen drien den selben wingarten mit allen sinen rechten vnd zugehorden ze lehen vnd ze rechter gemaind zu iro handen gefertget vnd bracht vor dem hoh erwirdigen gaistlichen fursten apt Cunen apt des gotzhus ze sant Gallen⁷ minem gnadigen herren, dannen och der selbe wingart min lehen wz, vnd han daz getan, wie recht sitt vnd gewonlich waz vnd alz es nu vnd hie nach kraft vnd macht haben sol vnd mag, vnd han mich och mit der vorgeseiten fergung willeklich vnd wie ich durch recht solt verzigen vnd entwert an des obgenanten apt Cunen mines gnadigen herren hand, vnd verzih mich och mit vrkund disz briefs fur mich vnd all min erben des vorgeschribnen wingarten genant an dem Bul mit allen sinen rechten vnd zugehorden vnd och aller aigenschaft aller lehenschaft aller kuntschaft aller gewer aller gezugnust vnd vrkund lute vnd briefen aller vordrung vnd ansprach alles gaistlichen vnd weltlichen gerichtes. Ich han och gelobt mit miner truw vnd loben mit disem brief fur mich vnd all min erben, des vorgeschribnen wingarten genant an dem Bul vnd och disz koffs mit iro zugehorden wer ze sinne nach des landes recht vnd die vorgenanten frow Claren, her Johansen iro elichen sun vnd Agnesen iro elichen tochter vnd iro erben, ob si enwerint, an allen iren schaden dar vmb ze versprechen vnd ze verstan vff gaistlichen vnd weltlichen gerichten vnd an allen stetten allenthalben, wo wenn wie gen wem vnd wie dik su des bedurffent vnd dar vmb vff getriben an gesprochen oder geschadgot werdent mit dem rechten inwendig dem zil, alz ich gelobt han wer ze sinn. Vnd des ze warem offnem vrkund vnd gantzer sicherhait aller vorgeschribner ding han ich vorgenamter her Rudolf Hofakrer min aigen insigel fur mich vnd all min erben offenlich gehenkt an disen brief. Dirre brief ist geben ze sant Gallen in der stat an dem nachsten zinstag nach sant Lucien tag der hailgen magt in dem jar, do man zalt von gottes geburt vierzehen hundert jar vnd sechs jare.