Ich^a Adelhait Hennbergerin burgerin ze sant Gallen tun kunt vnd vergich offenlich mit disem brief allen, die in sehent oder horent lesen, daz ich willeklich vnd vnbeLzwungenlich offenlich gesworn han ainen gelerten aide liplich ze got vnd zu den hailigen mit vf gehabenen vingern, war daz ich ietz oder hie||
nach iemer dehain stoss oder ansprach hetti oder gewunni zu den burgern gemainlich der statt ze sant Gallen oder zu dehainem burger ald||
burgerinen besunder ze sant Gallen, ez sie man oder frowen knaben oder tohtren, su sien ietz da selbs burger ald die hie nach da selbs burger werdent, daz ich noch nieman von minen wegen den selben burgern vnd burgerinen ze sant Gallen ân reht niht tun sullen noch wellen noch schaffen getan, wolti ald mohti ich aber von in rehtes nut enbern, daz ich oder min gewissi botschaft an miner statt daz reht ze sant Gallen in der statt vor irem geriht von in nemen sol vnd wil ân alle widerred vnd ân alle geuarde, ez war dann, das ich oder min botschaft an miner statt da selbs rehtlos gelassen wurdint vnd daz och das da kuntlich wurdi, so ist mir behalten vnd in dem aid vssgelassen, das ich daz reht ie danne, von dem ich oder min botschaft an miner statt rehtlos da selbs gelassen werdent, anderswa suchen sol vnd mag, das^b es danne billich vnd muglich ist, ân alle geuarde. Vnd des alles ze offem warem vrkunde so han ich Adelhait Hennbergerinen da vorgenant erbetten den wolbeschaidenn Hainrich Swander och burger ze sant Gallen, daz er sin insigel fur mich gehenkt hat an disen brief, vnder des insigel ich mich in diser sach willeklich gebunden han, won ich aigens insigels niht han, des och ich obgenanter Hainrich Swander mir vnd minen erben ân schaden vergich an disem brief. Der geben ist ze sant Gallen an der nahsten mitwuchen vor sant Vallentis tag des jares, do man zalt von Cristus geburt vierzehenhundert jâr vnd darnach in dem sibenden jare.