Ich^a Herman Nogg der buchsenmaister burger ze sant Gallen tun kunt vnd vergich offenlich mit disem brief allen, die in sehent oder horent lesen, daz ich mit wolbedahtem||
mut lieplich vnd gutlich in ain vnd uber ain komen bin mit den ersamen wisen dem burgermaister dem rat vnd den burgern gemainlich der statt ze||
sant Gallen vmb alle die stosse zuspruch misshellung vnd ansprachen, die ich mit in ald zu in gehebt han vntz her vff disen huttigen tag, als^b dirre||
brief ist geben, ez sie vmb minen dienst, alz si mich zwelf jar ze diener genomen vnd bestelt hatten, vmb den selben minen dienst si mir ieklichs jares besunder aht phunt phenning guter Costentzer munse gebunden waren ze gebenn nach lut vnd sag dez brieues, so su von mir besigelten hant, es sie von butung von sold oder von dehainer lay ander sach ald zuspruch wegen, wie die genant sint, su sien genemt oder vngenemt, also daz su noch iro erben noch nachkomen mir noch minen erben da von noch da bi niht mer schuldig sint noch gelten sont noch wider geben, vnd alz mich der burgermaister vnd der rat ze sant Gallen dez vorgedahten mines dienstes erlassen vnd mir anderswa erlobt hant ze dienenn an den stetten, daz ich wider die obgenanten den burgermaister den rat vnd die burger ze sant Gallen nut sie noch sin sulle, won aber su mich des dienstes der vorgeschribenen zwelf jar ledig gelassen hant, darumb so lass ich vnd sagen fur mich vnd min erben die vorgenanten den burgermaister den rat vnd die burger gemainlich ze sant Gallen alle iro erben vnd nachkomen vmb die vorgenanten stoss vnd zuspruch vnd vmb die aht phunt phenning, so su mir die vorgedahten zwelf jar ieklichs jares besunder vmb minen dienst pflihtig waren ze gebenn, gantzlich vnd gar quitt ledig vnd los, aber mit namen sol ich in in allen andern sachen gebunden sin ze tunne vnd iro burger ze sinne nach wisung des brieues, den si von mir besigelten hant. Vnd des ze warem vrkund so han ich Herman Nogg da vorgenant fur mich vnd min erben min aigen insigel offenlich gehenkt an disen brief. Der geben ist ze sant Gallen an dem nahsten fritag nach sant Mathyes tag des zwelfbotten des jares, do man zalt von gottes geburt vierzehenhundert jar vnd darnach in dem sibenden jâre.