Allen^a den, die disen brief an sehent lesent oder horent lesen, denan sol ze wissent sin, dz wir farenden lut all pfifer vnd gyger, die||
mit ir namen in dem rodel verscriben stânt, den wir dar zu geordnet vnd gemachot hânt, ein bruderschaft gemachot hant ze VtzLnach¹ in der altenstatt dem heilgen crutz ze lob vnd ze eren, dz dz heilig crutz vns all behut vnd beschirm an lib vnd an sel, vnd||
hant ôch dem selben heilgen crutz ein kertzen geordnet vnd gemachet, die da brunnen sol vor dem selben heilgen crutz ze Vtznach all messen all vespern vnd als dik man gotz dienst in der selben kilchen volbringt, vnd hânt ôch wir vorgenanten farenden lut vns selber des an bedinget vnd dar vmb vnser ieklicher sin truw an geswornes eides statt geben, diss bruderschaft ze halten nach lut vnd sag diss briefs vnd diss vorg(enanteⁿ kertzen mit guten truwen ân alle geuerd vnser ieklicher iarlichen ze end siner wil mit sechzehen pfenningen Zuricher muntz. Wir hânt vns selber ôch an bedinget, dz wir elli iâr einest ze sament komen sond gen Vtznach zu dem heilgen crutz vnd dem sin opfer bringen vnd die vorg(enanteⁿ kertzen pfenning vnd sullent och vsrichten, wz wir denn ze mal ze schaffen hant von der selbigen kertzen wêgen vnd sol vns all noch vnser keinen besunder daran nut sumen noch irren, es si denn herren not siechtag oder ander redlich not, die vnser eim denn erzellen kan, die in billich hie vor schirmen sol vnd mag. War aber, dz deheiner vnder vns dz nut tat vnd sich befund, dz er dz von mutwillen gelassen hett, zu dem soltint wir denn richten als recht war mit vnser aller rât nach diss briefs lut vnd sag. Wir vorgenanten farenden lut hânt ôch all gemeinklich mit vnser aller rât vns selber des an gedinget, das vnser ieklicher ein crutz sol hân von einem lôt silbers minder oder me on all geuerd, also weler vnder vns von todes wegen ab gat, der sol das selb sin silbrin crutz geben dem heilgen crutz in vnser bruderschaft. Wir sond ôch aller der iartzit begân, die ab gand von todes wegen vnd in vnser bruderschaft sint, dar vmb dz all biderb knecht dester gerner zu vns in vnser bruderschaft komint. Wir sond och all die in vnser bruderschaft enphahen, die des begerent vnd wirdig sint. Wir sint och des vber ein komen all die, die in vnser bruderschaft ietz sint, dz wir vns mit vnser aller namen hânt gescriben an den vorgenanten rodel, den wir dar zu geordnet vnd gemachot hant. Wir sond ôch all die mit iro namen scriben an den selben rodel, die hernach iemer me in vnser bruderschaft koment. Man sol och wissen, weler sich lât scriben an den selben vnsern rodel, der sol ôch ewanklich in vnser bruderschaft sin mit den gedingen, als vorgescriben stat, vnd sol och teilhaftig sin aller der guttatt, die in vnser bruderschaft iemerme beschehent. Vnd des ze vrkund vnd ze merer sicherheit aller vorgescribner ding so hant wir farenden lut da vorgenant ernstlich erbetten den edeln vnd wolerbornen herren graff Fridrichen von Toggenburg², dz er sin insigel fur vns im vnd sinen erben vnschedlich offenlich gehenket hat an disen brief. Der geben ward am nechsten zistag nach sant Gregorien tag in dem jar, do man zalt von Cristy geburt viertzehen hundert jar vnd siben jar.