Ich^a Jacob von Langenhart schulthaizz ze Wil¹ vergich vnd tun kunt allermenglichem, das fur mich kam ze Wil in der statt||
offenlich der erwirdig abt Johans von gottes verhengnust des gotzhus ze Vischinen² vnd bracht da fur mich||
die nachgenanten erbern lut, vnd batt mich ernstlich, dieselben erbern lut ze uerhorren, daz ich ouch tatt. Vnd verhort||
sy alle aigenlich von wôrt ze wort, alz hie nach geschriben stât, vnd frâgt dieselben erbern lut alle gemainlich vnd ieklichen besunder, ob sy nach dem vnd sy veriehen vnd sagen wolten, dar vmb sweren vnd daz recht tun mochten, war ob es also zeschulden kami. Des antwurten sy alle vnd ieklicher besunder mit wissendem mut, daz sy wol dar vmb daz recht tun mugent vnd ouch gern tun wellint, vnd saiten, alz hie nach geschriben stat. Item es sait Cuni Wingarter, ist ob LXXXX jarn alt vnd ist von Mitlen³, daz Haini der Wisman von Mitlen der waz des von Munchwilles⁴ aigen von dem lib vnd nam ain wib, die hiess Ness von Sterrenberg⁵ vnd was Berschis Bongarters genant Kallnner vnd Hainr. vnd Rudis Sterrenbergs swester, die alle vieru warent des gotzhus ze Vischinen. Wan nû dieselb Nezz Ste[r]renbergerin^b Hainr. dem Wisman nit nach hort, do besatzt sich Haini Wisman mit dem von Munchwille vmb die vngenossami. Item do Haini Wisman abgieng von tods wegen, do nam der von Munchwille den tail durch den bank von der frowen, won Haini Wisman sin aigen waz gesin. Item derselb Haini Wisman hatt dru lebende kind by Nessen Sterrenberginen sinem wib zwo tohtran hiess aini Metzzi, die ander Gret nam ainen man hiess Vli Dietzis von Asperruti⁶. Item ainen knaben hiess Hans Wisman. Item do Haini Wisman abgieng, do trug Nezz sin wib ain kind, dasselb kind hub Cunr. Wingarter vsser toff vnd hiess Ita. Derselb Cunr. Wingarter dis alles hett gesait. Item es hett gesait Hans Lutenegger genant Rimly der elter, der ist ob LXXX jarn alt, daz daz gotzhus ze Vischinen Hansen Wisman Hainr. Wismans saligen sun von Mitlen inne hab gehebt ob LXX jarn. Item er sait ouch, daz Wismans muter, die hiess Ness, ouch des gotzhus ze Vischinen waz vnd waz ain Sterrenbergerin vnd hiess Nezz Sterrenbergerin vnd hatt drye bruder, vnd hiess der elst Berschi Bonggarter, den man nempt Kallner, der metmost hiess Haini Sterrenberger, der jungst hiess Rudi Sterrenbergen, dieselben warent all des gotzhus vnd dieselben hett ouch daz gotzhus ze Vischinen all geuallet vnd hand ouch kind gelassen noch hutt dis tags, die alle des gotzhus sint. Item dieselb Nezz Sterrenbergerin hatt ain swester, kam gen Costentz hiess die Ruch Elli, die waz ouch ain Sterrenbergerin vnd waz des gotzhus ze Vischinen. Item Hans Wisman hatt ouch ain swester, hiess Greta Wismannin, nam ainen man haist Vli Dietzis von Asperruti, der ist aigen vnd hett in ietz zemâl inne her Albrecht von Burglen⁷. Do dieselb Gret Wismannin abgieng von tods wegen, do besatzt sich Vli Dietzis mit dem gotzhus vmb den tail, wan Gret des gotzhus waz gesin, derselb Vli noch lebt. Item Hans Wisman Hainrichs Wismans saligen sun von Mitlen nam ain wip, die hiess von irem geschlecht Anna Ponttin von Mulhan⁸ vnd hort an daz gotzhus gen Ôw⁹, by derselben Annen Ponttinen hatt er vier kind, drye knaben haist der elst Hans Wisman, der metmost Peter, der jungst Berschi Wisman, vnd ain tohter haisset Nezz, dieselb Nezz hett ainen man genomen haisset Werli Staimer von Mulhan, derselb Werli hort an vnser frôwen gen Costentz¹⁰, vnd hort im nû dieselb Nezz sin wib nach von des wechselss wegen, so die gotzhuser ze samen hant. Item Hans Wisman Hainr. Wismans saligen sun von Mitlen nam ouch ain nach wib, dieselb hiess Metzi ab dem Berg¹¹ vnd waz Hainr. ab dem Berg tohter vnd kam von Wietzikon¹² vnd wz des gotzhus, by derselben frowen gewan er zwen sun, haisset ainer Hensli der ander Rudi, dieselb frow Metzi vnd die zwen knaben noch lebent vnd sint des gotzhus. Item waz Hans Lutenegger genant Rimly der elter sait, alz vor geschriben stat, dasselb sagent ouch Cuni Wingarter von Mitlen, ist ob LXXXX jarn alt, vnd Vli^c Burkart von Bussnang¹³, ist ob LXXX jarn alt. Vnd des alles ze warem offem vrkund sô han ich obgenanter Jacob von Langenhart schulthaizz min aigen insigel von ernstlicher flissiger bett wegen des obgenanten abt Johansen von Vischinen^d vnd och der obgenanten erbern luten aller vnd iekliches besunder ze end der geschrift offenlich getrukt vff disen brief, douch also mir minen erben vnd allen minen nachkomen gantzlich vnd gar vnschadlich. Dis geschach an dem nechsten zinstag nach sant Georyen tag anno domini millesimo quadringentessimo septimo.